Вы тут

Годны вынік жніва на Гомельшчыне быў дасягнуты пры пастаяннай барацьбе з надвор'ем


Удзельнікаў і гасцей свята ў Рэчыцы прывітальным адрасам павіншаваў Прэзідэнт Беларусі. Кіраўнік дзяржавы выказаў удзячнасць усім, хто працуе на палях, фермах і перапрацоўчых прадпрыемствах самай вялікай у краіне Гомельскай вобласці. «Перакананы, што выкананне тэхналогій і адказнае стаўленне да справы кожнага з вяскоўцаў, ад механізатара да кіраўніка, дапаможа нам вырашыць важныя задачы, якія стаяць перад аграпрамысловым комплексам Гомельшчыны і ўсёй Беларусі», — зачытаў прывітальны адрас старшыня Гомельскага аблвыканкама Генадзь Салавей.


Для аграрыяў Гомельшчыны 2019 год быў вельмі няпросты з пункту гледжання кліматычных умоў. Ім давялося пераадольваць наступствы то бязлітаснай спякоты, то вельмі нізкай для лета тэмпературы. Вецер і град таксама паўплывалі на канчатковыя вынікі. Загінула каля 5 % пасеваў, дзясятая іх частка была пашкоджана. Між тым сельгасвытворцы вытрымалі гэты экзамен на трываласць. Было сабрана 692 тысячы тон збожжавых і зернебабовых культур. Гэта на 12 % больш, чым летась. З улікам кукурузы агульная вага гомельскага каравая наблізілася да мільёна тон.

— Пакуль раса не ляжа, мы не сыходзілі з поля, — успамінае сёлетняе жніво Мікалай Сышчанка. — Прыходзім раніцай, рыхтуем камбайны і працуем столькі, колькі надвор'е дазваляе.

Старшы камбайнер з КСУП «Ельск» стаў пераможцам абласных «Дажынак» сярод маладзёжных экіпажаў. Малады чалавек працаваў на камбайне КЗС-10К «Палессе» і ўбраў 628 гектараў з умоўным намалотам 1488 тон.

Так, сёлетняе жніво на Гомельшчыне вызначыла новыя прозвішчы перадавікоў і нагадала пра тых, хто не саступае лідарскія пазіцыі. Экіпажы старшых камбайнераў Васіля Коваля і Івана Вырвіча з агракамбіната «Холмеч» Рэчыцкага раёна штогод становяцца першымі ў вобласці тысячнікамі. 188 экіпажаў намалацілі звыш 1000 тон збожжа. Большасць з іх працуе ў Рэчыцкім раёне. На цырымоніі ўзнагароджання ў Рэчыцы старшыня Гомельскага аблвыканкама Генадзь Салавей адзначае, што лідарам расце годная змена:

— Сёлета 23 маладзёжныя экіпажы перасягнулі тысячную мяжу па намалоце. Упершыню ў лік тысячнікаў увайшлі сямейныя пары: сужэнцы — Андрэй і Таццяна Бухмілер, Дзмітрый і Валянціна Тарасенкі з Рэчыцкага раёна, а таксама бацька і дачка Сяргей і Настасся Жураў з Брагінскага раёна. У цэлым у вобласці кожны шосты экіпаж мае ганаровае званне тысячніка.

Між іншым, аграрыі рэгіёна нарыхтавалі і неабходную колькасць кармоў для добрай зімоўкі жывёл — па 27,5 цэнтнера кармавых адзінак на ўмоўную галаву. Найлепшым у нарыхтоўцы кармоў прызнаны Ельскі раён. Мазырскі дасягнуў самых высокіх паказчыкаў у жывёлагадоўлі, радуецца старшыня райвыканкама Алена Паўлечка:

— Нашы людзі вельмі адказныя. Яны нарошчваюць аб'ёмы вытворчасці і рэалізацыі прадукцыі жывёлагадоўлі. Ад гэтага наўпрост залежыць іх заробак. Ён сёння ў аграпрамысловым комплексе Мазыршчыны складае 1100 рублёў.

Дарэчы, найлепшым прадпрыемствам сезона па зборы збожжавых прызнаны саўгас-камбінат «Зара» Мазырскага раёна. Другое месца паміж сабой падзялілі агракамбінат «Холмеч» Рэчыцкага раёна і прадпрыемства «Палессе-Аграінвест» Петрыкаўскага. А вось раёнаў — лідараў па вытворчасці збожжа сёлета вырашылі не вызначаць.

Намеснік старшыні Палаты прадстаўнікоў Баляслаў Пірштук, які быў абраны дэпутатам ад Рэчыцкай акругі № 44, на абласных «Дажынках» адзначыў, што Гомельшчына зрабіла важкі ўнёсак у агульную скарбонку краіны:

— Прыродна-кліматычныя ўмовы, у тым ліку і нізкая бальнасць зямлі, пастаянна прыносяць пэўныя выпрабаванні гэтай паўднёвай вобласці краіны. І ўсё ж Гомельшчына годна трымае марку. Працаўнікі знаходзяць новыя тэхналогіі: напрыклад, першымі ў краіне асвоілі тэхналогію вытворчасці кукурузы як на сілас, так і на зерне. На Гомельшчыне працавітыя людзі, якія вельмі адказна ставяцца да справы і атрымліваюць той вынік, які супастаўны з іншымі абласцямі. Дарэчы, каб яго атрымаць, тут трэба працаваць удвая больш. Я жадаю, каб вашы даходы раслі прапарцыянальна ўкладзенай вамі працы. Ну і добрага надвор'я налета.

Між тым абласному святу ў Рэчыцы з надвор'ем пашанцавала. Таму з вынікамі працы аграрыяў на выстаўцы падворкаў можна было азнаёміцца падрабязна. Вуліцы горада ператварыліся ў адзін вялікі квартал з гандлёвымі і рамеснымі радамі. Дзеці і дарослыя з задавальненнем фатаграфаваліся на фоне сучаснай сельгастэхнікі, дэгуставалі сёлетнюю прадукцыю і шчыра віншавалі ўсіх працаўнікоў аграрнага комплексу.

Ірына АСТАШКЕВІЧ, Рэчыца

Фота аўтара

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».