Вы тут

Аўстрыйскі Тыроль. Чаму варта наведаць гэты рэгіён?


Якія першыя асацыяцыі ўзнікаюць, калі чуем пра Аўстрыю: Вена, Моцарт, Шуберт?... А ці бывалі вы ў Тыролі? Гэта федэратыўная зямля Аўстрыі. Яе называюць сэрцам Альпаў. Рэгіён з’яўляецца вельмі паспяховым у турыстычным бізнэсе. Прыгожыя краявіды, гісторыя, традыцыі і спорт — вось, на думку начальніка аддзела маркетынгу Савета па турызму Тыроля Флорыяна Кара, чым абумоўлена прыцягальнасць гэтай мясцовасці для гасцей.


Адпачынак на любы густ

Безумоўна, краю пашчасціла з геаграфіяй, але яго папулярнасць і запатрабаванасць у турыстаў — напрацоўвалася гадамі. І сёння Тыроль з’яўляецца свайго роду чэмпіёнам у Аўстрыі, калі гаворка ідзе пра турыстычны бізнес: яго доля ў УВП рэгіёну складае больш за 17 працэнтаў (у той час як па краіне гэты паказчык усяго 7 працэнтаў). Сюды едуць адпачываць з Германіі, Швейцарыі і многіх іншых краін свету. У турыстычнай сферы на сёння задзейнічана 55 тысяч супрацоўнікаў. Больш за палову ўсяго патоку гасцей сюды наведваецца ў зімні перыяд, калі можна катацца на лыжных трасах, глядзець на заснежаныя горныя схілы і грэцца ва ўтульных хіжынах-гатэлях, кавярнях адкрываючы для сябе мясцовыя кулінарныя рэцэпты альбо гуляць па пераднавагодніх кірмашах і натхняцца прыгажосцю пейзажаў.

Як варыянт, можна завітаць у Інсбрук — сталіцу Тыроля. Прыхільнікі спорту згадаюць, што тут праходзілі Зімовыя Алімпійскія гульні ў 1964 і 1976 гадах. Горад размяшчаецца на захадзе Аўстрыі, яго сімвалам лічыцца Залаты дах, які насамрэч толькі крыты балкон, дэкарыраваны 2500 медных пялёсткаў, пакрытых золатам. Кажуць, тут нават можна правесці вясельную цырымонію — чым не шанец адчуць сябе сапраўднай прынцэсай. У самім будынку размешчаны музей, дзе ўдасца даведацца і пра стварэнне залатога даху і пра значныя вехі ў гісторыі Тыроля. А ў музеі народнага мастацтва прадстаўлены культура, традыцыі і звычаі рэгіёну: нацыянальныя строі з розных гарадоў, калекцыя званочкаў для кароў, і нават звычайны пакой тырольскай хаты розных вякоў.

Гасціннасць па крытэрыях

Каб пранікнуцца атмасферай традыцый і стаць адным з удзельнікаў, то прыязджаць у Тыроль варта, напрыклад, восенню на свята перагону жывёлы. Кароў упрыгожваюць вянкамі, званочкамі, мясцовыя жыхары апранаюцца ў нацыянальныя строі і гоняць жывёлу з высакагорнай пашы ў нізіну. Такім вялікім святам адзначаецца завяршэнне сезону выпасу скаціны. На рынку можна пакаштаваць разнастайныя ласункі, паслухаць музыку і набыць у мясцовых майстроў сувеніры. Альбо іншы варыянт — зладзіць сабе адпачынак на ферме. Тут усё арганізоўваецца ў адпаведнасці з мноствам крытэрыяў, сярод якіх сістэма якасці, бяспека, таварны знак, наяўнасць у гападарцы пэўнага віду земляробства ці жывёлагадоўлі; дом павінен адпавядаць канонам тыповай сельскай архітэктуры і не менш важна, ці будзе ў гасцей магчымасць адчуць каларыт мясцовага жыцця і традыцый, у тым ліку і з дапамогай фальклору.

— У нас вельмі трапяткое стаўленне да традыцый, якія мы імкнемся зберагчы ў тым выглядзе, у якім яны былі шмат гадоў таму. Бо разумеем, насколькі гэта аўтэнтычна. Ёсць карнавал, фестывалі, калядны кірмаш. І кожнае свята мае вялікае значэнне для нас, саміх тырольцаў, магчыма, нават большае, чым для нашых гасцей, — расказаў падчас лекцыі-прэзентацыі Флорыян Кар.

Цікавы накірунак — даліна Эцталь. Тут здымалі кінафільм «Джэймс Бонд. Спектр», а зараз у Альпах ёсць музей 007 Elements, які размяшчаецца на вышыні 3048 метраў і спраектаваны такім чынам, што частка залаў знаходзіцца пад зямлёй, а з іншых адкрываецца маляўнічы від на горы. Увазе наведвальнікаў у дзевяці залах прапаноўваецца мультымедыйная экспазіцыя, прысвечаная гісторыі Джэймса Бонда і фільмам пра суперагента. Кінакамісія (гэта асобны аддзел Савета па турызму) тут актыўна займаецца прыцягваннем у гэтую мясцовасць вытворцаў кіно і рэкламы, што таксама дае сродкі для развіцця турызму.

Адданасць справе — гарант поспеху

Веліччу і зіхаценнем сустракае гасцей Музей крысталаў Свароўскі ў Ватэнсе. Унікальны парк мастацтваў і прыгод тут стварылі ў 1995 годзе, каб адзначыць 100-годдзе Свароўскі. На тэрыторыі плошчай у 7,5 га раскінуўся ландшафтны сад з мноствам славутасцяў: узяць хоць бы воблака з 800 000 крысталаў апрацаваных уручную! А башня з атракцыёнамі ў чатыры паверхі — сапраўдны свет цудаў для дзяцей.

А вось Кітцбюэль — з тых месцаў, дзе раздолле для прыхільнікаў горных схілаў, бо тут з кастрычніка па май уладарыць зіма. Гарналыжны Кітцбюэль прапаноўвае гасцям 170 кіламетраў лыжных трас, што зручна размясціліся на 60 схілах рознага ўзроўню складанасці.

Вышэйназваныя месцы — толькі кропкі на карце тых шматлікіх магчымасцей для адпачынку, якія вабяць сюды турыстаў з розных куточкаў свету. І на першы погляд можа здавацца, што проста ўсё ўдала склалася ў тых, хто тут жыве і зарабляе на турызме. Але ж ці было б гэта магчыма без адданасці сваёй справе і любові да таго, што маеш?

— Сакрэт поспеху — у тым ліку і ў нашай кампетэнцыі. Напрыклад, Савет па турызму існуе 130 гадоў. Столькі часу мы займаемся турыстычным маркетынгам. У нас турызм вельмі важная справа для кожнага, пачынаючы ад губернатара і заканчваючы самімі тырольцамі, — адзначае Флорыян Кар. — Мы ведаем і любім наш брэнд больш за саміх турыстаў. І ў кожнай сферы, будзе гэта гатэль, ферма ці горналыжны схіл — паўсюль заўважна, як прафесійна і з якой увагай да дэталяў кожны робіць свой унёсак у агульную справу.

Алена ДРАПКО

Фота з афіцыйнага сайта visittirol.ru

Выбар рэдакцыі

Эканоміка

Усё, што трэба ведаць пра змены ў Жыллёвым кодэксе

Усё, што трэба ведаць пра змены ў Жыллёвым кодэксе

Мы паспрабавалі адшукаць самыя вострыя вуглы новаўвядзенняў і ўявіць, як будзе працаваць гэты дакумент пачынаючы з 2020 года.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Як запрасіць чалавека, каб ён не прыйшоў, і знойдзены кашалёк.

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...