Вы тут

Чаму з дзяцінства ў галовах захоўваецца шмат міфаў


...Звыкла глядзім з дзецьмі ўвечары Vіаsаt Nаturе — ад замалёвак з жывой прыроды і карысці больш, чым ад мульцікаў, і на лагодны «сонны» лад яны настройваюць няблага, прынамсі маіх малых. Раптам чую захоплены вокліч: «Ой, мама, глядзі, які міленькі!» Гляджу, хто там такі міленькі і харошанькі, — мамачкі мае, кракадзіл! Ні разу не Гена, а самы сапраўдны буйны алігатар, з падманліва-нежывымі жоўтымі вачыма і зубамі, параўноўваць памер якіх з чалавечымі нават не хочацца. Але гэта нам, дарослым, а дзяўчаткам — бач ты, міленькі.

Другая карцінка, ужо з натуры. Зладзілі сабе на выхадныя пазнавальную вылазку за горад, пяць у адным: і пагуляць па-за межамі горада, каляровым лісцем пашамацець, і накрычацца на тыдзень наперад, і свежым лясным паветрам падыхаць, і паздымаць прыгожых фота, і наведаць экатурыстычны комплекс недалёка ад сталіцы. Вось у апошнім, разглядаючы вялікі заапарк, сустрэліся мы са смелым, калі не сказаць нахабным, буслом — ходзіць за паўкрока ад людзей, дазваляе рабіць з сабой сэлфі, прымае дары ў выглядзе мясных кавалачкаў. «Мама, а можна я яму хлеба дам?» — просіць нейкі хлопчык і, атрымаўшы дазвол, доўга бегае следам за буслом, частуючы таго акрайцам. Птушка не ўзяла. «Значыць, не галодны», — зрабіла выснову маладая мама і вельмі здзівілася, калі работнік комплексу растлумачыў, што буслы, на хвілінку, не вераб'і і харчуюцца жывёльнымі кармамі, а не хлебам, пячэннем і чыпсамі.

Цяжка адказаць, колькі міфаў з дзяцінства захоўваецца і ў нашых галовах, — скажам, мая сяброўка і да трыццаці гадоў верыла, што вожыкі ядуць яблыкі. А ўсё чаму? Да мозгу касцей гарадская, да таго ж прыезджая з іншай краіны, яна не мела сваякоў на вёсцы і не бачыла блізка ні каровы, ні казы, ні гусей, качак, зайцоў, вожыкаў, не ведала, што ў Беларусі «ў дзікай прыродзе» жывуць чарапахі, і, як сама жартуе, дзесьці ў глыбіні душы лічыла, што куры нясуць адразу мытыя яйкі...

Гэта ўсё было б забаўна, каб не цягнулася з пакалення ў пакаленне. І ўжо нашы дзеці не баяцца ваўкоў, таму што ніколі іх не бачылі, жахаюцца, што ад каровы дрэнна пахне, а ў каня жоўтыя зубы. Таму, каб не пачуць аднойчы ад нашчадкаў, што булкі растуць на дрэвах, вывозьце іх на прыроду — хоць у абмежаваную прастору заапарка: нават калі вы самі яго не любіце, гэта першы і самы просты спосаб пазнаёміць дзіця з насельнікамі блізкіх і далёкіх лясоў, палёў і рэк. (Я ні ў якім выпадку не маю на ўвазе так званыя «кантактныя заапаркі», дзе жывёлы — разменны матэрыял на пацеху наведвальнікам і патэнцыйны рассаднік бактэрый, з-за чаго такія заапаркі ўжо забаронены ў многіх краінах свету — застаюцца толькі вялікія стацыянарныя ўстановы, дзе працуюць спецыялісты, якія могуць даходліва і праўдзіва расказаць пра паводзіны жывёл і як з імі абыходзіцца.) Выязджайце часцей у лес ці на возера — гэта выдатная магчымасць пабыць усім разам, праветрыць галаву ад гарадскіх праблем і тлуму, паказаць жыўцом: вось — вожык, а вось — вужык, гэта — касцяніцы, гэта — воўчае лыка, а там — мухамор, які можа быць зусім не падобны да малюнкаў у кніжцы, але ад таго не менш небяспечны. У маіх малых дагэтуль адно з самых яркіх уражанняў лета — «знаёмства» з вялізным сомам, якога злавілі незнаёмыя рыбакі на возеры. А бераг турэцкі ці які іншы — безумоўна, таксама добра, аднак толькі пасля таго, як у галовах малых адкладзецца, што кракадзіл не «міленькі».

Вікторыя ЦЕЛЯШУК

Прэв'ю: yandex.ua

Загаловак у газеце: Праўда пра вожыкаў

Выбар рэдакцыі

Эканоміка

Усё, што трэба ведаць пра змены ў Жыллёвым кодэксе

Усё, што трэба ведаць пра змены ў Жыллёвым кодэксе

Мы паспрабавалі адшукаць самыя вострыя вуглы новаўвядзенняў і ўявіць, як будзе працаваць гэты дакумент пачынаючы з 2020 года.

Калейдаскоп

Вясёлыя гісторыі нашых чытачоў

Вясёлыя гісторыі нашых чытачоў

Як запрасіць чалавека, каб ён не прыйшоў, і знойдзены кашалёк.

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...