Вы тут

Адкрылася выстаўка «Душой я вольны чалавек»


Учора ў Дзяржаўным літаратурным музеі Янкі Купалы пачала працаваць выстаўка «Душой я вольны чалавек», прымеркаваная да 110-годдзя прыезду беларускага паэта ў Санкт-Пецярбург.


«Горад, у якім паэт жыў і вучыўся ў 1909—1913 гадах, адыграў вялікую ролю ў станаўленні яго літаратурнага майстэрства: тут убачылі свет яго першыя зборнікі, адбылася трыумфальная прэм'ера «Паўлінкі» — славутай п'есы, якая і сёння з'яўляецца візітоўкай беларускага тэатра», — нагадваюць супрацоўнікі музея.

Экспазіцыя расказвае пра «купалаўскі Пецярбург» як цэнтр беларускага нацыянальнага адраджэння, у якім паэт знайшоў сяброў і аднадумцаў: прафесара Браніслава Эпімаха-Шыпілу, этнографа Антона Грыневіча, Вацлава Іваноўскага, Алаізу Пашкевіч. Унікальныя архіўныя дакументы асвятляюць дзейнасць першай беларускай легальнай выдавецкай суполкі «Загляне сонца і ў наша аконца», Беларускага навукова-літаратурнага гуртка студэнтаў Пецярбургскага ўніверсітэта, пецярбургскую пастаноўку «Паўлінкі» ў 1913-м, пазнейшыя візіты паэта ў Ленінград у 1920—1930-х гадах. А карта з «беларускімі адрасамі» дапамагае адшукаць купалаўскія мясціны і ў сучасным Санкт-Пецярбургу. Асобны раздзел выстаўкі знаёміць наведвальнікаў з перакладамі вершаў Янкі Купалы, якія рабілі яго блізкі сябар Апалон Карынфскі, Максім Горкі, Валерый Брусаў, Сяргей Гарадзецкі, а таксама з купалаўскім перакладам паэмы Пушкіна «Медны коннік», які даследчыкі называюць адным з самых значных у творчай спадчыне песняра. Акрамя дакументаў, у экспазіцыі прадстаўлены работы айчынных мастакоў: жывапісцаў і графікаў Уладзіміра Сулкоўскага, Янкі Раманоўскага, Віктара Александровіча, скульптараў Валяр'яна Янушкевіча і Паўла Лука.

Выстаўка «Душой я вольны чалавек» будзе працаваць у музеі да 5 снежня.

Вікторыя ЗАХАРАВА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».