01 кастрычніка, чацвер

Вы тут

Штотыднёвы спартыўны агляд «Звязды»


У штотыднёвым спартыўным аглядзе «Звязды» расказваем пра найбольш актуальныя падзеі выхадных.


1. Дзюдаіст Даніэль Мукетэ адкрыў лік узнагарод беларускай дэлегацыі на VІІ Сусветных ваенных гульнях у Кітаі, выйграўшы залаты медаль у вагавой катэгорыі 100 кг. Нагадаем, больш за 9300 спартсменаў-ваеннаслужачых са 109 краін свету спаборнічаюць з 18 да 27 кастрычніка ў 27 відах спорту па 329 дысцыплінах. У праграму спаборніцтваў увайшлі бадмінтон, стральба з лука, веласпорт, бокс, гольф, футбол, дзюдо, парашутны спорт, стральба, плаванне, трыятлон, валейбол, настольны тэніс, сучаснае пяціборства, конны спорт, фехтаванне, арыентаванне на мясцовасці, спартыўная барацьба, ваенна-авіяцыйнае пяціборства, ваенна-марское пяціборства, ваеннае пяціборства і іншыя віды.

2. Таццяна Шаракова выйграла «бронзу» і «серабро» на чэмпіянаце Еўропы па веласпорце на трэку ў Нідэрландах. Трэцяе месца беларуска заняла ў омніуме, а другое ў гонцы па ачках.

3. Людміла Псышчаніца (вагавая катэгорыя 55 кг) заваявала залатую ўзнагароду на маладзёжным чэмпіянаце Еўропы па цяжкай атлетыцы, які праходзіць у Бухарэсце. Беларуска паказала вынік у 189 кг (83 + 106) у суме дваябор'я (рывок і штуршок).

У Бухарэсце на юніёрскім (U20) і маладзёжным (U23) чэмпіянатах Еўропы ўдзельнічаюць каля 500 спартсменаў з 40 краін. Абодва турніры ліцэнзійныя і даюць атлетам права зарабіць ачкі ў алімпійскі рэйтынг Токіа-2020. Юніёрскі чэмпіянат носіць залаты статус, маладзёжны — сярэбраны.

4. Беларускі баксёр Мікалай Весялоў на турніры ў Бельгіі абараніў чэмпіёнскі пояс Сусветнай баксёрскай асацыяцыі — WBА Соntіnеntаl. Наш спартсмен выйграў бой у сярэдняй вагавой катэгорыі (72,5 кг) у датчаніна Абдула Хатаба.

5. Адбыліся матчы 25-га тура чэмпіянату краіны па футболе. Брэсцкае «Дынама» ўмацавала сваё лідарства, перамогшы футбалістаў «Слуцка» — 3:2, а іх асноўныя канкурэнты — БАТЭ — страцілі ачкі, згуляўшы ўнічыю з «Гомелем» — 1:1. Салігорскі «Шахцёр» сенсацыйна прайграў у Магілёве мясцоваму «Дняпру» — 0:2. Такім чынам, адрыў брэсцкага «Дынама» ад найбліжэйшых праследавацеляў складае ўжо 7 ачкоў.

Вынікі іншых сустрэч 25-га тура: «Дынама» (Мінск) — «Віцебск» — 0:2, «Тарпеда-БелАЗ» (Жодзіна) — «Іслач» (Мінскі раён) — 1:3, «Славія» (Мазыр) — «Нёман» (Гродна) — 0:1.

Становішча ў групе лідараў зараз такое: «Дынама» (Брэст) — 64 ачкі (25 матчаў), БАТЭ — 57 (24), «Шахцёр» — 57 (25), «Дынама» (Мінск) — 45 (24).

6. Брэсцкі гандбольны клуб імя Мяшкова пацярпеў чацвёртае паражэнне ў Лізе чэмпіёнаў, саступіўшы на сваёй арэне польскаму «Віве» з Кельцаў — 27:31.
У складзе гаспадароў самым выніковым стаў Вільям Акамбрэ, які закінуў 6 мячоў, у гасцей столькі ж разоў адзначыўся беларус Уладзіслаў Кулеш.

Турнірнае становішча пасля пяці гульнявых дзён: «Кіль» — 9 ачкоў, «Веспрэм» — 6, «Манпелье» — 6, «Вардар» — 6, «Віве» — 5, «Порту» — 5, БГК — 2, «Матор» — 1.

БГК імя Мяшкова свой наступны паядынак правядзе 3 лістапада ў Скоп'е супраць «Вардара».

Выбар рэдакцыі

Грамадства

Чым здзівілі фіналісты праекта TEDxYouth@Mіnsk?

Чым здзівілі фіналісты праекта TEDxYouth@Mіnsk?

Канферэнцыя прайшла ў анлайн-фармаце на відэасэрвісе VOKA.

Грамадства

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Інтэр'ер для эстраднай зоркі. Глусчане сведчаць, што Філіп Кіркораў заказваў на іх фабрыцы дзверы

Зараз такой фабрыкі няма, але ёсць людзі, якія могуць згадаць гісторыю яе існавання.

Грамадства

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі

У Мінску пасля рэканструкцыі адкрыўся Музей гісторыі камсамола і маладзёжнага руху Беларусі.