Вы тут

У Беларусі стартавала інфармацыйная кампанія #МастацтвадляЗдароўя


10 кастрычніка Вялікі тэатр Беларусі і Еўрапейскі фонд Рудольфа Нурыева падпісалі мемарандум аб супрацоўніцтве з Аб'яднанай праграмай ААН па ВІЧ/СНІДзе (ЮНЭЙДС) у Беларусі. У гэты ж дзень у нашай краіне ўзяў пачатак маштабны праект #ARTforHealth — #МастацтвадляЗдароўя, які фінішуе акурат 1 снежня дабрачынным спектаклем «Ор і Ора» ў пастаноўцы Аляксандры Ціхаміравай. Частка грошай ад продажу білетаў на гэты балет будзе перададзена Міністэрству аховы здароўя Беларусі для суправаджэння людзей, якія жывуць з ВІЧ.


Адна з Мэт устойлівага развіцця, абвешчаных ААН, — спыненне эпідэміі СНІДу. Гэтага выніку неабходна дасягнуць да 2030 года. Спецыялісты мяркуюць, што тэрмін можна скараціць, калі ісці да мэты сумеснымі намаганнямі. «Трэба працаваць і па-за межамі сферы аховы здароўя, — упэўнены рэгіянальны дырэктар ЮНЭЙДС для краін Усходняй Еўропы і Цэнтральнай Азіі Віней САЛДАНА. — Бо перамога над СНІДам — агульная задача не толькі для медыцыны, а для ўсяго грамадства». Таму ў Беларусі ў размову пра прафілактыку і ранняе выяўленне хваробы разам з урачамі ўключыліся і грамадскія арганізацыі, і прадстаўнікі бізнесу, і дзеячы мастацтва.

Важнасць праблемы безумоўная: эпідэмія СНІДу ўжо забрала жыцці 37 мільёнаў людзей ва ўсім свеце. У велічэзным сумным спісе — адзін з самых вядомых рок-музыкантаў у гісторыі, франтмен гурта Queen Фрэдзі Мерк'юры, легендарны артыст балета Рудольф Нурыеў, мастак Кейт Харынг, акцёр Энтані Перкінс, пісьменнік-фантаст Айзек Азімаў і іншыя. Каля 36 мільёнаў жыхароў Зямлі сёння жывуць з ВІЧ-інфекцыяй, прытым многія з іх наогул не ведаюць уласны ВІЧ-статус. Дыскрымінацыя і стыгма ВІЧ-пазітыўных людзей перашкаджаюць многім, хто сумняваецца, прайсці тэст і рэгулярна прымаць лячэнне. Паводле слоў першага намесніка міністра аховы здароўя Беларусі Дзмітрыя ПІНЕВІЧА, у нашай краіне, паводле ацэначных лічбаў, каля 21 тысячы чалавек з прыблізна 24 тысяч ВІЧ-пазітыўных ведаюць пра свой статус і атрымліваюць належную тэрапію: «Аднак пакуль ёсць хоць адзін чалавек, які не ўпэўнены ў сваім ВІЧ-статусе і не праходзіць эфектыўнае лячэнне, наша работа павінна працягвацца».

Уласна, якраз інфармаванне беларусаў пра ВІЧ-інфекцыю і магчымасці антырэтравіруснай тэрапіі і стане задачай Вялікага тэатра ў межах кампаніі #ARTforHealth, дзе АRТ — і мастацтва, і медыцынская абрэвіятура. З 10 кастрычніка да 1 снежня тут правядуць серыю семінараў па прафілактыцы ВІЧ-інфекцыі, майстар-класы для аматараў балета, медыямарафон у сацсетках, а таксама збор дабрачынных сродкаў — паўдзельнічаць у ім можа кожны, хто набывае білеты на культурныя імпрэзы з дапамогай kvіtkі.by. Дзякуючы фонду Рудольфа Нурыева ў Мінску пройдзе адкрыты паказ сёлетняга фільма Рэйфа Файнса «Белы воран» і сустрэча з выканаўцам галоўнай ролі Алегам Івенкам, які ўвасобіў на экране вобраз Нурыева, а таксама выстаўка фотаздымкаў славутага танцора, прадстаўленая адным з музеяў Францыі. Прыгожым фіналам — але ні ў якім выпадку не заканчэннем супрацоўніцтва, адзначаюць у тэатры — стане балет «Ор і Ора» на музыку Міхаіла Крылова. «Ужо невылечна хворым Нурыеў прыязджаў у Санкт-Пецярбург і выступаў на сцэне Марыінскага тэатра, — згадвае балетмайстар-пастаноўшчык Вялікага тэатра Беларусі Аляксандра ЦІХАМІРАВА. — Гэта быў сапраўдны подзвіг, дэманстрацыя сілы духу. Наш спектакль — таксама пра сілу духу. І мы вельмі ганарымся, што ўдзельнічаем у падобнай акцыі. Бо мастацтва заўжды стаіць вышэй за палітыку, вышэй за любыя адрозненні паміж людзьмі...»

Вікторыя ЦЕЛЯШУК

Выбар рэдакцыі

Культура

«Звязда» з'ездзіла на кінафестываль Żubrоffkа

«Звязда» з'ездзіла на кінафестываль Żubrоffkа

Раім вам у наступным годзе адправіцца туды самім.

Культура

Мастачка Алеся Скарабагатая: Няма мэты падабацца

Мастачка Алеся Скарабагатая: Няма мэты падабацца

Імя мастачкі гучыць усе пяць гадоў правядзення «Асенніх салонаў».

Спорт

Спартсмен Валерый Макарэвіч: Мара ў мяне адна — стаць прафесіяналам сваёй справы

Спартсмен Валерый Макарэвіч: Мара ў мяне адна — стаць прафесіяналам сваёй справы

Як варатар зборнай Беларусі па пляжным футболе сумяшчае гульню з роляй настаўніка і бацькі.  

Калейдаскоп

Вясёлыя гісторыі чытачоў

Вясёлыя гісторыі чытачоў

Языку дай волю..., Хвалі дзень вечарам, Людзі — добрыя.