Вы тут

Як працуюць Маладзёжныя паслы Мэт устойлівага развіцця


— Моладзь — актыўныя ўдзельнікі рэалізацыі Мэт устойлівага развіцця (МУР), скіраваных на ліквідацыю беднасці, барацьбу з няроўнасцю і несправядлівасцю, рашэннем праблем, звязаных з кліматычнымі змяненнямі, і г.д. Для яе прыцягнення да гэтай тэмы ў краіне дзейнічае каардынацыйны цэнтр «Адукацыя ў інтарэсах устойлівага развіцця», — расказала намеснік начальніка галоўнага ўпраўлення выхаваўчай работы і маладзёжнай палітыкі, начальнік упраўлення па справах моладзі Міністэрства адукацыі Таццяна СІМАНОЎСКАЯ.


У канцы мінулага года сумесна з Міністэрствам адукацыі ўпершыню быў праведзены конкурс «Маладзёжныя паслы Мэт устойлівага развіцця — будучыня планеты ў нашых руках». 17 маладых людзей сталі пераможцамі і цяпер займаюцца рэалізацыяй сваіх праектаў па МУР. Акрамя таго, сумесна з фондам ААН ЮНІСЕФ у 25 гарадах краіны рэалізуецца праект «Горад, дружалюбны дзецям». Гэтая міжнародная ініцыятыва заклікае рэалізоўваць правы дзяцей у кожным горадзе. Яна аб'ядноўвае органы кіравання, грамадскія і прыватныя арганізацыі, установы адукацыі — усіх тых, хто хоча зрабіць гарады лепшым асяроддзем для юнага пакалення.

— Сістэма адукацыі ў краіне актыўна займаецца рэалізацыяй Мэт устойлівага развіцця, — адзначыла сакаардынатар тэматычнай групы адукацыі партнёрскай групы ўстойлівага развіцця, намеснік начальніка Каардынацыйнага цэнтра «Адукацыя ў інтарэсах устойлівага развіцця» Беларускага дзяржаўнага педагагічнага ўніверсітэта імя М. Танка Сафія САВЕЛАВА. — Работа вядзецца як з дзецьмі дашкольнага ўзросту, так і са школьнікамі, студэнтамі. Мы арганізоўваем шмат мерапрыемстваў, сярод іх — інтэрнэт-гульня «Мэты ўстойлівага развіцця: Шлях наперад».

У верасні з дапамогай удзельнікаў прайшла маштабная інфармацыйная кампанія ў 60 населеных пунктах краіны. Летась у сталіцы быў праведзены конкурс «Супергероі для супермэт» — мерапрыемства, скіраванае на павышэнне інфармаванасці юнакоў і дзяўчат пра Мэты ўстойлівага развіцця. Ад іх прыйшло больш за 500 работ. Штогод у пачатку верасня праходзіць міжнародны «Форум годнага даўгалецця», дзе з дапамогай маладых людзей абмяркоўваецца аднайменнае пытанне, разглядаюцца асноўныя палажэнні Нацыянальнай стратэгіі актыўнага даўгалецця да 2030 года, якая цяпер распрацоўваецца ў краіне.

Што датычыцца найбліжэйшых падзей, то 19—20 мая ў педагагічным універсітэце пройдзе маладзёжны медыяфестываль «Галасы маладых за ўстойлівае развіццё». Яго ўдзельнікі — тыя, у каго ёсць уласны погляд на працэсы пераадолення актуальных праблем жыцця грамадства. Таксама ў той жа ВНУ да 11 кастрычніка будзе функцыянаваць адукацыйная дэкада ў інтарэсах Мэт устойлівага развіцця. У яе рамках — майстар-класы, лекцыі на тэмы «Адукацыя ў глабальнай супольнасці», «Адаптацыя да кліматычных змяненняў», «Школа без пластыку», «Роля моладзі ў сучасным кліматычным руху», «Культура памяці ў мясцовай гісторыі», «Адукацыя дарослых ва ўстойлівым развіцці рэгіёнаў».

У некаторых гарадах краіны функцыянуюць рэсурсныя цэнтры адукацыі ўстойлівага развіцця (АУР) дашкольнай адукацыі — напрыклад, у дзіцячым садку № 45 Гродна. Таксама функцыянуюць студэнцкія навукова-даследчыя лабараторыі АУР аб дашкольнай адукацыі — як, напрыклад, у педагагічным універсітэце. Малыя добра запамінаюць інфармацыю ў гульнявой форме. Часцей за ўсё дзеці пачынаюць шукаць тое, што ім цікава, ужо на ранніх этапах жыцця. А пасля работы, якая з імі праводзіцца, яны рэалізоўваюць свае мэты і ідэі ў паўсядзённасці. Акрамя таго, праз дашкольнікаў можна ўздзейнічаць і на іх бацькоў.

Ірына ПАНЯДЗЕЛАК — каардынатар ініцыятывы «Моладзь за ўстойлівае развіццё», якая прыцягвае маладых людзей у экалагічны рух. Яна з'яўляецца міжнародным членам маладзёжнага аддзялення Сеткі па пошуку рашэнняў у галіне ўстойлівага развіцця (SDSN Yоuth).

— Сумесна з Міністэрствам адукацыі ў розных школах па ўсёй краіне мы праводзім «Самы вялікі ўрок у свеце». Гэта глабальная ініцыятыва ЮНІСЕФ, скіраваная на азнаямленне падрастаючага пакалення з Мэтамі ўстойлівага развіцця. Вопыт правядзення такога мерапрыемства летась паказаў, што ў беларускіх ВНУ розны ўзровень падтрымкі падобных ініцыятыў з боку адміністрацый і розныя механізмы ўключэння ў іх студэнтаў. Сёлета другі раз правялі форум «Моладзь за МУР», дзе збіраюцца маладыя лідары, прадстаўнікі грамадскіх арганізацый і бізнесу для стварэння карысных і перспектыўных праектаў, заснаваных на пытаннях МУР, — расказала Ірына Панядзелак.

Штогод экалагічная ініцыятыва сумесна з рознымі ВНУ краіны праводзіць дзясяткі мерапрыемстваў для паляпшэння навакольнага асяроддзя і ўкаранення канцэпцыі «зялёнага» ўніверсітэта: «Да дня экалагічных ведаў мы арганізоўваем «ВНУ Эка/Фэст». У 2018 годзе ўніверсітэтаў-удзельнікаў было чатыры, сёлета — ужо дзевяць».

Паказаць сваю цікавасць да тэмы можа кожны ахвотны праз апытанне «Мой свет 2030», размешчанае на афіцыйным сайце «Мэты ўстойлівага развіцця ў Беларусі». Звесткі збіраюцца для таго, каб убачыць агульны прагрэс па рэалізацыі розных праблем грамадства на працягу наступных пятнаццаці гадоў.

Дар'я ШЛАПАКОВА

Выбар рэдакцыі

Грамадства

Як адбываюць пакаранне асуджаныя да абмежавання волі «ў хатніх умовах»

Як адбываюць пакаранне асуджаныя да абмежавання волі «ў хатніх умовах»

«Хатняя хімія» — гэта турма, толькі на свабодзе», — з сарказмам кажуць самі асуджаныя пра абмежаванне волі без накіравання ў папраўчую ўстанову.

Здароўе

​Як абараніць сябе ад кардыялагічных праблем у халодны перыяд?

​Як абараніць сябе ад кардыялагічных праблем у халодны перыяд?

Менавіта зімой павялічваецца колькасць інфарктаў і павышаецца артэрыяльны ціск.

Культура

Успаміны пра Яўгенію Янішчыц

Успаміны пра Яўгенію Янішчыц

Піша Зіновій Прыгодзіч.

Грамадства

У 2023 годзе з'явяцца квоты на рабочыя месцы для людзей з інваліднасцю

У 2023 годзе з'явяцца квоты на рабочыя месцы для людзей з інваліднасцю

У Беларусі на сённяшні дзень звыш 570 тысяч чалавек маюць інваліднасць.