Вы тут

«Мінскі дыялог» пра еўрапейскую бяспеку —нейтральная пляцоўка і высокі ўзровень даверу


Абмеркаваць выклікі XXІ стагоддзя, у прыватнасці сістэму кантролю над узбраеннямі, напружанасць паміж геапалітычнымі сапернікамі і адсутнасць камунікацый і паразумення паміж ваеннымі і палітыкамі з'ехалася каля 700 экспертаў, дыпламатаў і палітыкаў з 61 краіны свету. На сустрэчы ў Мінску разважаюць, як не даць свету саслізгнуць у бездань.


У сучаснай сітуацыі татальнага абвастрэння супярэчнасцяў, калі бакі нават не размаўляюць адно з адным, тое, што яны сабраліся тут, ужо само па сабе важнае дасягненне, заўважыў Яўген ПРЭЙГЕРМАН, заснавальнік і дырэктар Савета па міжнародных адносінах «Мінскі дыялог», які з'яўляецца арганізатарам мерапрыемства:

— Ад нашых партнёраў мы пачулі, што Мінск мае такую аўру, што людзі нават з самымі супрацьлеглымі пунктамі гледжання знаходзяць тут магчымасць скончыць дыскусію канструктыўна, нават калі яна пачыналася на эмоцыях. Таму мы чакаем сёлета, што аўра гэтая будзе ўмацоўвацца і падобнага кшталту дыскусіі будуць працягвацца. Гэты форум не абстрактна акадэмічны, тут сабралася шмат дзеючых палітыкаў, якім неабходны дакладныя прапановы і рашэнні. Таму наша задача па выніках сустрэчы сабраць усё самае цікавае ў выніковым дакуменце, каб гэтыя ідэі можна было распрацоўваць.

Еўрапейскі рэгіён імкліва ўваходзіць у эпоху стратэгічнай нестабільнасці і непрадказальнасці. Існуючыя правілы гульні ў сферы бяспекі ўжо не ў стане перадухіліць новыя і вырашыць існуючыя канфлікты ў Еўропе. Усё гэта павышае верагоднасць развіцця сілавых сцэнарыяў, мяркуе Уладзімір МАКЕЙ, міністр замежных спраў Беларусі:

— Еўропа і Беларусь як яе неад'емная частка заўжды асоба востра адчувалі любы подых ветру міжнароднай бяспекі. А ў апошнія гады мы жывём пры пастаянным штармавым папярэджанні. Часы, калі на Еўрапейскім кантыненце ўладарыў дух міру і здаровага партнёрства, знесены парывамі геапалітычнай напружанасці і канфрантацыі. Магчымасць узаемнага стрымлівання праз нарошчванне ваенных патэнцыялаў — небяспечная ілюзія бяспекі, якая не аднойчы прыводзіла да трагедый. Гэта прамы шлях да халодных войнаў.

Ён падкрэсліў як важнасць прысутнасці экспертаў розных узроўняў, так і актуальнасць ды тэматычнасць абмяркоўваемых пытанняў міжнароднай і рэгіянальнай бяспекі. І адзначыў, што форум — унікальная магчымасць не проста абмяняцца думкамі, але і паспрабаваць выпрацаваць агульныя падыходы, а таксама практычныя алгарытмы вырашэння праблем, якія не проста наспелі, а нават і пераспелі.

Мяркуючы па колькасці ўдзельнікаў і краін, у свеце вераць у патэнцыял мінскай пляцоўкі як міжнароднага перагаворнага круглага стала для вырашэння найбольш значных праблем, якія існуюць не толькі ў нашым рэгіёне, але і ў цэлым у Еўразіі і ў свеце, бо ўсе яны звязаныя, падкрэсліў важнасць форуму Валерый ВАРАНЕЦКІ, старшыня Пастаяннай камісіі Палаты прадстаўнікоў па міжнародных справах:

— Аўтарытэт і імідж мінскай перагаворнай пляцоўкі сапраўды падрос, і многія вераць, што на ёй як на нейтральнай пляцоўцы можна весці шчырую і адкрытую размову. Мае калегі са Швейцарыі ўжо кажуць, што мы сталі другой Жэневай для Усходняй Еўропы і нават Еўразіі. Важна разумець, што такія пляцоўкі дазваляюць фармуляваць падыходы і пазіцыі, і калі яны скіраваны на ўзаемаразуменне, а не на стварэнне напружанасці, то гэта вельмі важна.

Гэта важна для краіны і з пункту гледжання забеспячэння бяспекі, стабільнасці і супрацоўніцтва, гэта наш нацыянальны інтарэс. Мы зацікаўлены ў існаванні дыялогу паміж Захадам і Усходам.

Ірына СІДАРОК

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам спецыялістам Нацбанка

Тонкае мастацтва дабрабыту. Складаем сямейны бюджэт разам спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.