Вы тут

“Лірыца” ў Заўраллі


У Курганскай вобласці Расіі выступала вядомае інструментальнае трыа з Беларусі


Гэтую навіну паведаміла ў рэдакцыю Людміла Урванцава — яна ўзначальвае Курганскую абласную грамадскую арганізацыю “Нацыянальны культурны цэнтр беларусаў Заўралля “Батькавщина”, спявае ў народным ансамблі беларускай песні “Журавачка”. Скінула спасылку на відэасюжэт, які быў паказаны, відаць, на ўсю краіну — бо выйшаў у праграме “Вести” на тэлеканале “Россия 1”.

Адкрываем. Глядзім. Тэлевядучая паведамляе, што ў Курган прыехала выступаць інструментальнае трыа “Лірыца” з Беларусі. А перад канцэртамі музыканты заглянулі ў госці ў Культурны цэнтр “Батькавщина”. І вось у кадры бачна, як рыхтуюццца сустракаць супляменнікаў курганскія беларусы. Накрылі вялікі прыгожы стол, на якім шмат розных страў. “Кожны беларус, калі прыходзіць да нас у госці — ніколі не ідзе з пустымі рукамі: такая ў народзе традыцыя, — расказвае тэлежурналістам Людміла Урванцава. — І гасцей у “Беларускай хаце” таксама заўсёды сустракаем са шчодра накрытым сталом”.

Камера паказвае, што гэта сапраўды так. Сярод іншых страваў на стале — пірагі, сала, грыбы. Актывіст “Батькавщины “ з гумарам расказвае, чаму беларусы толькі ў дождж па грыбы ходзяць — бо ў сонечныя дні заўсёды ж працуюць. На стале ў “Беларускай хаце”, дарэчы, ёсць грузды. Журналісты ўдакладняюць, што мясцовыя, але згатаваныя па беларускім рэцэпце: з кропам, лаўровым лістом і душыстым перцам. А зверху смятанка...

І вось — госці ў хату! Прама з Гомеля, з інструментамі. Журналісты расказваюць: калектыву “Лірыца” 20 гадоў, гэта — ну проста музычная пярліна беларускага Палесся. Ёсць, дарэчы, сайт у нэце — гляньце: http://www.lіrіtsa.com. Алена Сочнева ў трыа грае на цымбалах, Андрэй Сочнеў — на балалайцы-кантрабасе, баян у руках Дзяніса Лабачова. Сустракаюць гасцей курганцы вясёлай, бадзёрай вітальнай песняй “Запрашаем вас да нас”.

Ну а потым — відаць, падмацаваўшыся з дарогі, музыканты паказалі свой клас. Вельмі хвалюючым быў момант: заўральцы спяваюць, а беларусы з Палесся — граюць. Проста супер!

Музыканты потым выступалі ў Шадрынску й Кургане. А ў кадры Андрэй Сочнеў, крануты цёплай сустрэчай, казаў: “Такое адчуванне, быццам мы — дома”. Ну бо хто ж удалечыні ад Бацькаўшчыны лепш сустрэне, чым родныя людзі з “Батькавщины”!

Іван Ждановіч

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».