Свята, прысвечанае восеньскаму плоду – гарбузу, стала для Беларускага дзяржаўнага педуніверсітэта ўжо добрай традыцыяй. У бягучым годзе яно праводзіцца ўжо ў трэці раз. Па словах рэктара Аляксандра Жука, гэта наш адказ Хэлоўіну. Дарэчы, менавіта яму належыць ідэя правядзення фэсту.
Праграма сёлетняга фестывалю абяцае быць насычанай. Адзінаццаць студэнцкіх каманд дзевяці факультэтаў і двух інстытутаў возьмуць удзел у гульнях і конкурсах спартыўнай накіраванасці пад агульнай назвай “Гарбузовыя забаўкі” (на званне самай спартыўнай прэтэндуе і каманда рэктарата).
Каманда з найлепшай кулінарнай стравай з гарбуза і іншай гародніны і садавіны вызначыцца падчас конкурсу “Восеньскія прысмакі”. На выставе дэкаратыўна-прыкладнога мастацтва “Восеньскія дзівосы” будзе абраны найлепшы з прадстаўленых вырабаў, а ў конкурсе “Чароўная красуня” – прыгажуня з дзяўчат-першакурсніц. Па выніках прэзентацыі “Восень каляровая” журы аб’явіць самы цікавы творчы нумар, а па выніках узважвання – самы важкі гарбуз. Па суме балаў за ўсе конкурсныя заданні і выпрабаванні будуць вызначаны пераможцы і прызёры “Гарбузовага фэсту”.
Падчас фестывалю ўсе ахвотныя змогуць паназіраць за прыгатаваннем розных нацыянальных беларускіх і замежных страў і пачаставаць іх, а на “дармарцы” абмяняцца сезоннай прадукцыяй. І, безумоўна, усіх чакае пачастунак ад рэктарата – смачная каша з гарбуза.
На працягу ўсяго фэсту будуць функцыянаваць пляцоўкі рэсурснага цэнтра “Greenoffice”, псіхалагічнай гасцёўні “Таямніцы душы”, РНПЦ “Кардыялогія” “Пульс восені”. Гасцей чакаюць таксама на спартыўнай пляцоўцы “Дужы, спрытны, трапны” і пляцоўцы “Надзвычай незвычайна”, дзе будуць ладзіцца эксперыменты, інтэрактыўныя майстэрні па маляванні і дэкаратыўна-прыкладным мастацтве.
Фестываль распачнецца ў 11 гадзін у пасёлку Зялёнае, Мінскі раён (аграбіястанцыя “Зялёнае”, вучэбны корпус № 10).
Дабрацца да пасёлка Зялёнае можна на аўтобусе БДПУ, які будзе адпраўляцца ад галоўнага корпуса ўніверсітэта (вул. Савецкая, 18) у 9.00, а таксама электрацягніком з вакзала Мінск-Пасажырскі ў маладзечанскім напрамку.
Надзея НІКАЛАЕВА
Сумесныя праекты ядзерных тэхналогій.
