У Мінску стартавала спецыялізаваная выстаўка «Будпрагрэс-2019»

Учора ў Мінску стартаваў штогадовы міжнародны будаўнічы форум — 27-я спецыялізаваная выстаўка «Будпрагрэс-2019».

Футбольны манеж на мінскім праспекце Пераможцаў ужо даўно стаў аб'ектам «двайнога» прызначэння. Тут рэгулярна праводзяцца і знакавыя спаборніцтвы, і буйныя міжнародныя выставачныя форумы. Вось і цяпер пад дахам манежа і тэрыторыі вакол яго працуе «Будпрагрэс-2019».

Намеснік прэм'ер-міністра Уладзімір Кухараў, які ва ўрадзе адказвае за пытанні развіцця будаўнічага комплексу, транспарту і камунікацый, жыллёвай і камунальнай гаспадаркі, у час цырымоніі адкрыцця выстаўкі назваў яе правядзенне добрай традыцыяй. Ён адзначыў, што яго радуе пастаянны рост удзельнікаў «Будпрагрэса». Уладзімір Кухараў вітаў удзел у выстаўцы замежных фірмаў і кампаній, якія дэманструюць свае сучасныя напрацоўкі і дасягненні. Паводле яго слоў, правядзенне такіх мерапрыемстваў садзейнічае развіццю будаўнічай галіны, з'яўляецца пляцоўкай для знаёмства з яе новымі кірункамі і тэхналогіямі, у тым ліку БІМ-тэхналогіямі, падкрэсліў намеснік прэм'ер-міністра.

Па словах Уладзіміра Кухарава, Міністэрства архітэктуры і будаўніцтва правяло вялікую работу па пераводзе праектаў жылых дамоў на выкарыстанне электрычнай энергіі. З Міністэрствам энергетыкі вырашаецца пытанне забеспячэння аб'ектаў неабходнай колькасцю электраэнергіі, уводу ў эксплуатацыю дадатковых падстанцый.

«Сёння ў частцы будаўніцтва ніякіх праблем няма», — адзначыў віцэ-прэм'ер.

Урад разлічвае, што электрычнае ацяпленне будзе шырэй выкарыстоўвацца і пры індывідуальным жыллёвым будаўніцтве. «Думаю, у найбліжэйшы час убачым значны ўсплёск будаўніцтва такога жылля», — адзначыў Уладзімір Кухараў.

І сапраўды, свае навінкі тут прадставілі больш за 150 вядучых будаўнічых кампаній з Беларусі, Кітая, Літвы, Бельгіі, Расіі, Украіны і іншых краін. Калектыўныя экспазіцыі сфарміравалі кампаніі-вытворцы з Польшчы, якія традыцыйна праяўляюць дзелавы інтарэс і зразумелую цікавасць да гэтай выстаўкі, а праз яе і да беларускага рынку будаўнічых матэрыялаў. Напрыклад, 15 польскіх вытворцаў прадставілі шырокі асартымент матэрыялаў і абсталявання: герметыкі, сучасныя ацяпляльныя прылады, грылі і каміны, сантэхніку, кантрольна-вымяральнае абсталяванне для выпрабаванняў бетону, асвятляльныя прыборы і дэкаратыўнае асвятленне, дахавыя аксесуары і плёнкі, а таксама канструкцыі зборных драўляных каркасных дамоў і іншае.

Дарэчы, «Будпрагрэс» уяўляе інтарэс не толькі для прафесіяналаў, але і ўсіх тых, хто будуе дом, дачу, робіць рамонт, займаецца дызайнам і добраўпарадкаваннем тэрыторыі вакол новай пабудовы. У ходзе семінараў і канферэнцый, майстар-класаў, на якія багатая праграма выстаўкі, можна атрымаць адказы на пытанні, якія хвалююць прыватнага забудоўшчыка.

Новыя шматабяцальныя кантакты паміж удзельнікамі мерапрыемства і наведвальнікамі ўжо наладжваюцца на стэндах выстаўкі. Ці перарастуць яны ва ўзаемавыгадныя для бакоў кантракты? Хутчэй за ўсё так. У прыватнасці, у дзелавой частцы праграмы выстаўкі запланавана абмеркаванне праблемных пытанняў павышэння эфектыўнасці экспарту будаўнічага комплексу Беларусі.

Леанід Тугарын

Фота БелТА