Вы тут

Лапці, якія знайшлі ў Шклове, перадалі на захаванне ў раённы гісторыка-краязнаўчы музей


Каля тысячы лапцей, якія былі знойдзены ў Шклове на гарышчы аднаго са старых будынкаў падчас рэканструкцыі, перададзеныя на захаванне ў раённы гісторыка-краязнаўчы музей.


Лапцям на выгляд каля 100 гадоў (магчыма, з большай дакладнасцю іх узрост вызначаць супрацоўнікі этнаграфічнага музея ў Магілёве, куды са Шклова перадалі частку каштоўнай знаходкі), яны падзеленыя па парах і знаходзяцца ў вельмі добрым стане — то-бок іх, пэўна, падрыхтавалі да продажу, але чамусьці так і не прадалі. «Гэты будынак, у якім праводзілася рэканструкцыя і дзе знайшлі лапці, да рэвалюцыі належаў яўрэям, а потым быў замацаваны за райспажыўкааперацыяй, — расказала «Звяздзе» дырэктар Шклоўскага раённага гісторыка-краязнаўчага музея Ларыса СІЛІВЕСТРАВА. — Як мы мяркуем, вырабілі іх усё ж не мясцовыя майстры, бо на Шклоўшчыне мы не выявілі такіх буйных рамесных арцеляў, а набылі вялікую партыю, магчыма, на Смаленшчыне, для продажу насельніцтву. Але пачалася вайна, і лапці прыбралі на гарышча, а потым замоўленая партыя не знайшла збыту, бо пасля вайны ўжо былі шырока распаўсюджаны гумовыя боты».

Яшчэ адзін аргумент на карысць «нетутэйшага» паходжання лапцей — іхняе пляценне: касое, з досыць вузкіх палосак, шчыльна падагнаных адна да адной. Спецыялісты распазналі ў знаходцы так званыя «пахлопні», на якія патрабавалася ў некалькі разоў больш лыка, чым на звычайныя лапці, — адпаведна, і каштавалі яны значна даражэй і скарыстоўваліся не на кожны дзень, а для свят і ўрачыстых выпадкаў.

Каля 250 пар лапцей ужо выстаўлена ў музеі, а ў будучыні тут плануюць аформіць асобную інтэрактыўную экспазіцыю — своеасаблівы «арцельны куток», які наглядна праілюструе ўвесь працэс вырабу папулярнага ў свой час абутку. «Думаю, можна будзе і паглядзець, і памацаць, і нават памераць», — смяецца Ларыса Сілівестрава.

Вікторыя ЦЕЛЯШУК

Загаловак у газеце: Лыкам шытыя

Выбар рэдакцыі

Грамадства

Карэспандэнт «Звязды» высвятляла, чаму так цёмна на асветленых вуліцах Магілёва

Карэспандэнт «Звязды» высвятляла, чаму так цёмна на асветленых вуліцах Магілёва

Вечарам прайсціся ўздоўж цэнтральнай вуліцы Першамайскай у Магілёве адно задавальненне.

Спорт

Баскетбаліст Бенджамін-Павел Дуду: У Гане мяне называлі белым

Баскетбаліст Бенджамін-Павел Дуду: У Гане мяне называлі белым

Мама Бена — беларуска, тата — ураджэнец Ганы.

Эканоміка

Куды звяртацца, калі грамадзяніну затрымліваюць зарплату?

Куды звяртацца, калі грамадзяніну затрымліваюць зарплату?

Адказ на гэта і іншыя пытанні — у гутарцы з Дзмітрыем Шаўчуком.