Вы тут

Букеты могуць хаваць шмат непрыемных сюрпрызаў


Першае верасня без кветак — гэта быццам Новы год без ёлкі ці мандарынаў. Згодныя? Насамрэч цяжка ўявіць школьніка, які ідзе да свайго любімага настаўніка з пустымі рукамі. Але за традыцыямі вельмі важна не забыцца і на бяспеку. Бо, на жаль, нават бяскрыўдныя на першы погляд букеты сёння могуць хаваць шмат непрыемных сюрпрызаў. Што тады рабіць? Давайце разбірацца!


Цудоўны набор... таксінаў

Памятаю, у дзяцінстве мяне вельмі здзіўляла, чаму кветкі ў краме так доўга жывуць, тады як нашы з агародчыка не могуць прастаяць і дня. Сакрэт аказаўся просты — уся справа ў вялікай колькасці хімікатаў. Спачатку, каб кветкі раслі хутчэй, іх шчодра ўгнойваюць, як вы разумееце, далёка не арганікай, пасля чаго апрацоўваюць біяцыдамі і пестыцыдамі, якія знішчаюць пустазелле, паразітаў і насякомых у цяпліцах. Пасля гэтых працэдур кветкі зразаюць і адразу кансервуюць зноў жа з дапамогай усіх дасягненняў хімічнай прамысловасці, бо інакш яны не змогуць «даляцець» да крамы. І вось мы атрымліваем цудоўны букецік таксінаў. Важна адзначыць, што большая частка кветак прыязджае да нас з краін з нястрогім экалагічным заканадаўствам (напрыклад, Калумбіі, Кеніі, Эфіопіі), дзе да гэтага часу дазволена выкарыстоўваць пестыцыд ДДТ, які лічыцца надзвычай небяспечным і таму забаронены ва ўсіх краінах Еўропы.

Трэба таксама памятаць пра транспартны след, які цягнецца за ўсімі гэтымі прывезенымі букетамі, і вялікую колькасць выдаткаваных на іх вырошчванне рэсурсаў (ваду, электраэнергію і г. д.). Напрыклад, толькі для вырошчвання аднаго цюльпана патрэбна каля 13 літраў вады.

Цікава

Падчас вырошчвання ўсяго адной кветкі і яе транспарціроўкі выдзяляецца каля трох кілаграмаў вуглякіслага газу.

Якая ёсць альтэрнатыва?

Школьнікам вельмі няёмка цягнуць вялізарныя букеты ў школу (па сабе ведаю), а потым стаяць з імі яшчэ і на лінейцы. Не патрэбны яны і настаўнікам, якія проста не ведаюць, куды дзець усю гэту прыгажосць, таму большую частку вельмі хутка адпраўляюць у сметніцу. А бачыць, як твой букет выкідаюць, вельмі непрыемна, асабліва маленькім дзецям. Таму лепш за ўсё падарыць невялікую кветачку ў гаршку, якую можна нават пакінуць у класе. Не падабаецца такі варыянт? Паспрабуйце знайсці кветкі мясцовых вытворцаў, якія вырошчваюць іх без хімікатаў, альбо складзіце прыгожы букет з кветачак са свайго саду. І, вядома, старайцеся выкарыстоўваць упакоўку і іншыя ўпрыгажэнні з натуральных матэрыялаў: паперы, льну, дрэва і лазы.

А калі ўсё ж вы лічыце, што кветкі з крамы нічым нельга замяніць, шукайце беларускія альбо тыя, што былі прывезены з найбліжэйшых да нас краін. Яны таксама апрацаваны хімікатамі, але ў іх усё ж меншы транспартны след.

Важна!

Больш за палову супрацоўнікаў кветкавых прадпрыемстваў у Коста-Рыцы маюць сімптомы хранічнага атручвання пестыцыдамі.

Прыемнага вам свята!

Маша ЗЯЛЁНАЯ

Загаловак у газеце: Букет для настаўніка

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».