Вы тут

Беларусь далучыцца да выпрацоўкі мер супраць дэградацыі зямель


Чарговая, 14-я па ліку канферэнцыя ўдзельнікаў Канвенцыі ААН па барацьбе з апустыньваннем пройдзе з 2 да 13 верасня ў Дэлі (Індыя).


Як расказаў нацыянальны каардынатар КБА ААН Андрэй Кузьміч, для Беларусі, якая актыўна ўдзельнічае ў рабоце канвенцыі, на сустрэчы асабліва важна далучыцца да выпрацоўкі мер па ахове і аднаўленні лясоў і тарфянікаў як ключавых рэсурсаў у барацьбе са зменай клімату, стратай біяразнастайнасці і дэградацыяй зямельных угоддзяў.

Фота: pixabay.com

— Беларусь едзе на чатырнаццатую сустрэчу ўдзельнікаў з устаноўленымі нацыянальнымі паказчыкамі нейтральнага балансу дэградацыі зямель, а таксама палітычнай воляй да іх дасягнення. У нас ужо назапашаны пэўны практычны вопыт аднаўлення такіх тэрыторый, у прыватнасці тарфянікаў, і мы будзем рады падзяліцца гэтым вопытам, — расказаў Андрэй Кузьміч.

Сярод праблем, на якія звяртае ўвагу канвенцыя, для нашай краіны асабліва актуальныя водная і ветравая эрозіі глебы, мінералізацыя арганічнага рэчыва тарфяных глеб, тэхнагеннае забруджванне, парушэнне зямель падчас здабычы карысных выкапняў і г. д. Акрамя таго, з-за змены клімату ў Беларусі павялічылася колькасць засух. Напрыклад, такога сухога красавіка, як сёлета, не адзначалася ніводнага разу за перыяд з 1940-х гадоў.

Каб стрымаць і мінімізаваць уплыў гэтых працэсаў, у 2015 годзе беларускім урадам зацверджаны Стратэгія па рэалізацыі КБА ААН і Нацыянальны план дзеянняў па прадухіленні дэградацыі зямель на 2016—2020 гады. Створаны адпаведны каардынацыйны савет пад кіраўніцтвам міністра прыродных рэсурсаў і аховы навакольнага асяроддзя.

Адзін з кірункаў дзейнасці, па якім наша краіна знаходзіцца у ліку лідараў, — аднаўленне асушаных тарфянікаў. Для гэтага Беларусь прыцягвае ў тым ліку і міжнародныя сродкі. Так, рэалізаваны праект міжнароднай тэхнічнай дапамогі Рэспублікі Карэя і КБА ААН «Аднаўленне асушаных тарфянікаў у Беларусі». На працягу года ў Магілёўскай вобласці было адноўлена больш за 1000 га дэградзіраваных і неэфектыўна асушаных балот.

«Мы чакаем ад канферэнцыі прыняцця рашэнняў, якія дапамагалі б краінам прасунуцца ад устанаўлення нацыянальных задач нейтральнага балансу дэградацыі зямель да іх практычнай рэалізацыі. Адным з ключавых пытанняў на гэтым шляху з'яўляецца мабілізацыя рэсурсаў. Таксама неабходна кваліфікавана прааналізаваць справаздачы краін пасля прыняцця новых стратэгічных рамак КБА ААН і зрабіць усё магчымае, каб у будучыні атрымліваць рэпрэзентатыўныя даныя аб прагрэсе ў дасягненні стратэгічных мэт і задач канвенцыі, а таксама задач 15 Мэты ўстойлівага развіцця», — дадаў Андрэй Кузьміч.

Чакаецца, што падчас канферэнцыі бакоў краіны разгледзяць вынікі глабальнай ацэнкі па дэградацыі зямель. Яна ўпершыню была праведзена з дапамогай дыстанцыйнага зандзіравання і верыфікацыі даных нацыянальнымі экспертнымі групамі. Гэта дазволіць устанавіць базавую лінію па стане якасці зямель на перыяд з 2015 года.

На парадку дня таксама будзе пытанне па засухах — якія механізмы па змякчэнні іх наступстваў могуць быць распрацаваны ў рамках канвенцыі. Пагавораць эксперты і пра важнасць прынцыпаў адказнага землеўладання для дасягнення нейтральнага балансу дэградацыі зямель.

Настасся АЛЯКСЕЕВА

Загаловак у газеце: Каб Зямля не ператварылася ў пустыню

Выбар рэдакцыі

Грамадства

Як сапраўдныя мужыкі засвойваюць «жаночую» справу

Як сапраўдныя мужыкі засвойваюць «жаночую» справу

У апошнія гады тэма раўнапраўя паміж мужчынамі і жанчынамі перажывае новую хвалю росквіту.

Культура

Згадкі пра Аркадзя Куляшова

Згадкі пра Аркадзя Куляшова

Гісторыя аднаго выступлення.