Вы тут

У Белтэлерадыёкампаніі прайшло жывое праслухоўванне дзіцячага «Еўрабачання-2019»


У аўторак у самай вялікай студыі «600 метраў» тэлецэнтра на Макаёнка, 9 прайшло адкрытае праслухоўванне юных артыстаў, якія жадаюць прадставіць сёлета Беларусь на дзіцячым «Еўрабачанні» ў польскіх Глівіцах.


Як расказалі «Звяздзе» ў прэс-службе медыяхолдынга, гэтым разам на нацыянальны адбор паступіла 44 заяўкі — яны, дарэчы, прымаліся выключна ў электронным фармаце, праз сайт tvr.by. Аднак пасля праверкі на адпаведнасць усім умовам конкурснага палажэння колькасць удзельнікаў жывога праслухоўвання яшчэ крыху зменшылася — да 38. Але геаграфія канкурсантаў не звузілася: акрамя мінчан, заўважаем у спісе прэтэндэнтаў калектывы і сольных выканаўцаў з Жодзіна, Гомеля, Віцебска, Ашмян, Магілёва, Брэста, Лепеля. Даволі многа ўжо вопытных канкурсантаў, хто ўдзельнічае ў адборы не першы раз: Маша Жыліна, Арына Пехцерава, Арцём Скароль, Ліза Мея, гурты Monkey Tops і «Нясумны ўзрост». Але, бадай, самая відавочная адметнасць цяперашняга нацыянальнага адбору — амаль стапрацэнтная гегемонія дзяўчат, артыстаў-хлопцаў можна пералічыць па пальцах адной рукі.

Пакуль канкурсанты размінаюцца на хуткамоўках, распяваюцца, распраўляюць сцэнічныя ўборы і папраўляюць прычоскі ўсіх колераў вясёлкі, знаёмімся з яшчэ адным спісам — прафесійнага журы. Ацэньваць выступленні юных артыстаў ва ўзросце ад 9 да 14 гадоў гэтым разам запрасілі старшыню Саюза кампазітараў Алену Атрашкевіч, выкладчыка кафедры мастацтва эстрады БДУКМ Таццяну Дробышаву, мастацкага кіраўніка Нацыянальнага цэнтра мастацкай творчасці дзяцей і моладзі Надзею Коршунаву, намесніка начальніка ўпраўлення прафесійнага мастацтва Галоўнага ўпраўлення дзяржаўных спецыяльных мерапрыемстваў і прафесійнага мастацтва Міністэрства культуры Таццяну Пархамовіч, тэлевядучага і каментатара «Еўрабачання» Яўгена Перліна, прадзюсара і кампазітара Максіма Алейнікава, а таксама Лідзію Заблоцкую і Аляксандра Мінёнка, якія прадстаўлялі нашу краіну на дзіцячым «Еўрабачанні» ў 2011 і 2016 гадах адпаведна. У кожнага з іх свае крытэрыі ацэнкі і рэцэпты поспеху. Так, Яўген Перлін мяркуе, што «песня мусіць быць моднай і сучаснай, а выканаўцы — спяваць шчыра і чыста». А малады спявак Аляксандр Мінёнак з пазіцыі былога канкурсанта перакананы, што галоўнае — каб песня ішла ад сэрца: «Вельмі бачна, калі некаторыя ўдзельнікі занадта хвалююцца і нават баяцца, і гэта не ідзе на карысць. Галоўнае, выходзячы на сцэну, не баяцца, а быць самім сабой і выкладвацца так, як быццам у цябе апошняе выступленне на сцэне, перадаць свае пачуцці і эмоцыі гледачам».

Зрэшты, большасць удзельнікаў, здаецца, і без гэтай парады атрымлівае сапраўдную асалоду ад выступленняў, і пакуль бацькі і педагогі нервуюцца лініяй тэлекамер, падпяваюць і прытанцоўваюць асабліва ўдалым нумарам. Нават калі ў гурта «Нясумны ўзрост» пачынаюць «фаніць» мікрафоны, хлопцы і дзяўчаты не зважаюць на тэхнічныя праблемы, а круцяць рэквізіт-чамадан з вышыванкай, і працягваюць выступленне — дарэчы, вельмі завадную беларускамоўную песеньку «Файна», якая расказвае пра тое, як файна ў Беларусі «знаёміцца, вучыцца і тусіць» — і не толькі.

«Чамадан для выступлення зроблены, можна сказаць, гэтымі самымі рукамі!» — з усмешкай расказвае за кулісамі актрыса і тэлевядучая Вера Палякова — яе сын якраз выступаў у гэтым складзе гурта. Наогул, «Нясумны ўзрост» — калектыў вялікі, гэта цэлая эстрадная студыя, якая зладжана на базе аддзялення эстраднага вакалу сталічнай школы мастацтваў № 2 і ў якой кожны ўдзельнік вывучае сальфеджыа, харэаграфію, а пры жаданні і розныя музычныя інструменты. Калектыў раней двойчы ўдзельнічаў у адборах на дзіцячае «Еўрабачанне» і штораз выглядаў пераканаўча. Хоць Вера Палякова, якая глядзела выступленне і як мама, і як педагог, настроена даволі крытычна: «Я сама заўжды імкнуся да ідэалу, і ведаю, дзе магло быць лепш. Але ўсякі вопыт, я лічу, карысны, таму не засмучаюся, ці трапім мы ў фінальную дзясятку. Галоўнае, што дзеці ўпэўнена трымаюцца на сцэне і што гэта песня дакладна не згубіцца, бо мы спецыяльна зрабілі яркі нумар, маленькае шоу, якое можна паказваць не толькі ў нашай краіне: усюды разумеюць слова «файна». А яшчэ актрыса падзялілася, што спецыяльна дзеля таго, каб трапіць у «Нясумны ўзрост», яе сын Арцём Макей... сеў на дыету і з красавіка скінуў 8 кілаграмаў!

Пераможца дзіцячага конкурсу «Славянскага базару ў Віцебску» Ксенія Галецкая пасля вялікага поспеху вырашыла не збаўляць абароты і ўгаварыла маці і педагогаў падаць заяўку на дзіцячае «Еўрабачанне». І хоць на праслухоўванне 12-гадовая спявачка прыйшла з моцнай прастудай, песню «A better world» пра герояў новага пакалення, якія могуць змяніць свет да лепшага, яна выканала ўпэўнена і моцна — вось што значыць характар і конкурсная загартоўка.

Прыемным уражаннем ад сёлетняга адбору стала значная колькасць не проста сучасных, модных аранжыровак, але і тэкстаў з сэнсам, і пры гэтым — на роднай мове. Карэспандэнты «Звязды» налічылі добры дзясятак песень, напісаных часткова альбо цалкам на беларускай. «Мы з Машай Жылінай мэтанакіравана б’ём у адну кропку, — расказвае кіраўнік Нацыянальнага цэнтра музычнага мастацтва імя У. Мулявіна Святлана Стацэнка, — і летась, і пазалетась у яе былі выдатныя беларускамоўныя песні, якія высока ацанілі гледачы і журы. Хоць многія ўгаворвалі нас паспрабаваць штосьці іншае, але сёлета мы вырашылі не здраджваць традыцыям. У песні «Спявала, гукала, чакала» ўсё сышлося: прыгожая, стыльная, модная і беларускамоўная. Машы Жылінай і Арцёму Скаролю, якія па ўзросце апошні раз могуць спрабаваць прайсці на дзіцячае «Еўрабачанне», я так і сказала: «Не думайце, ці выберуць вас, ці не выберуць, а выходзьце, атрымайце поўны кайф, перадайце гэта задавальненне гледачам і пастаўце прыгожую, тлустую кропку». І калі далей яны захочуць падавацца ўжо на дарослае «Еўрабачанне» — я іх толькі падтрымаю».

У спісах канкурсантаў заўважаем прозвішчы некаторых удзельнікаў дарослага адбору, якія спрабуюць скарыць «Еўрабачанне» ў тым ліку ў якасці аўтараў песень: некалькі юных артыстаў выконваюць кампазіцыі Майкла Соўла, Юзары, Юліі Быкавай і Яўгена Алейніка, NavіBand, Alen Hіt. Праўда, часам адчуваецца пэўны дысананс ва ўзросце ўдзельнікаў і песень ці аранжыровак — хто б растлумачыў, чаму радкі «цукеркі, мармеладкі нашы лепшыя сябры» гучаць пад агрэсіўную музыку, і чаму дзяўчаты-падлеткі выконваюць цалкам дарослыя балады пра ролі, якія мы выбіраем, нас выбіраюць?.. Тым не менш журы ўважліва праслухоўвае абсалютна ўсіх ахвотных — на гэта спатрэбілася без малога тры гадзіны — і ўжо сёння ўвечары абвесціць шчаслівую «дзясятку». А мо, «сямёрку» ці «васьмёрку» — паводле палажэння нацыянальнага адбору, фіналістаў можа быць ад сямі да дзесяці.

Не пазней за 27 верасня пройдзе і ўласна фінальны гала-канцэрт, на якім гледачы і журы выберуць чарговага дэлегата на дзіцячае «Еўрабачанне». Сам жа сямнаццаты па ліку міжнародны конкурс, нагадаем, пройдзе 24 лістапада ў Глівіцах (Сілезія, Польшча) пад крыламі сваёй афіцыйнай эмблемы — паветранага змея і дэвізам Share the Joy — «Падзяліся радасцю».

Па выніках жывога праслухоўвання, якое прайшло ў студыі медыяхолдынгу, журы склала спіс удзельнікаў фінальнага гала-канцэрту. У ім 10 выканаўцаў і калектываў:

  • Марыя Ермакова,
  • Сафія Храловіч,
  • Марыя Жыліна,
  • Арына Пехцерава,
  • Анастасія Жабко,
  • Елізавета Міснікава, 
  • Сафія Рустамава,
  • Гурт «Зефір»,
  • Ксенія Галецкая,
  • Гурт «Monkey Tops».

Такім чынам, барацьбу за права прадставіць Беларусь на дзіцячым «Еўрабачанні-2019» працягнуць выключна дзяўчаты — прадстаўніцы Мінска, Магілёва, Гомеля і Брэста. 21 жніўня пройдзе жараб’ёўка ўдзельнікаў, а сам фінальны канцэрт адбудзецца ў прамым эфіры не пазней за 27 верасня.</p>

Вікторыя ЦЕЛЯШУК

Фота Ганны ЗАНКАВІЧ

Выбар рэдакцыі

Грамадства

Як будзе праходзіць перапіс насельніцтва

Як будзе праходзіць перапіс насельніцтва

Старшыня Нацыянальнага статыстычнага камітэта Іна МЯДЗВЕДЗЕВА адзначае, што іх ведамства разлічвае перапісаць максімальную колькасць грамадзян з дапамогай укаранёных інавацый.

Грамадства

Адзіныя дзяўчаты-паркуршчыцы ў Беларусі распавядаюць пра свой спорт

Адзіныя дзяўчаты-паркуршчыцы ў Беларусі распавядаюць пра свой спорт

Гэты кірунак спорту ўвайшоў у жыццё былых студэнтак дзяржаўнага ўніверсітэта фізічнай культуры выпадкова.