Вы тут

У Мінску адкрылася татальная экспазіцыя Алеся Родзіма


І яна фенаменальная.

Беларуска-нямецкі арт-фестываль «Міфалагема тысячагоддзя», што адкрыўся ўчора ў Ок16, апелюе да беларускага ўдзелу ў жыцці легендарнага берлінскага сквота Тахелес. Названы ў гонар аднайменнага палатна Алеся Родзіма — мастака, што правёў у Тахелесе дванаццаць гадоў аж да пераходу будынка да новага ўласніка, — фэст прадстаўляе татальную экспазіцыю самога Родзіма і запрашае да ўдзелу яго беларускіх і нямецкіх калег. Гэта адна з самых значных імпрэз нашай культурнай прасторы за апошні час.


Зачынены ў якасці арт-сквота ў 2012 годзе Тахелес быў легендай Берліна. Будынак у цэнтры яўрэйскага квартала з’яўляўся прыстанкам авангарду і нефармальнага мастацтва. Значную ролю ў яго жыцці адыгралі і беларусы: у пачатку 2000-х там прайшла першая беларуская мастацкая выстава, дзе сярод іншых удзельнічаў Алесь Родзін, якому прапанавалі там застацца. Мастак застаўся, заняў цэлы шосты паверх і разам са Зміцерам Юркевічам працягнуў арганізоўваць беларускія фестывалі.

Вядомыя «Дахі» дазволілі нашым аўтарам выстаўляцца ў Берліне і прадстаўляць сваю творчасць велізарнай публіцы, якой у Тахелесе заўсёды было даволі. У рэшце рэшт будынак Тахелеса павінен быў адысці аднаму з нямецкіх банкаў, у сувязі з чым і Алесь Родзін, і арт-сквот прагучалі на ўсю Еўропу: новы ўласнік вырашыў забраць Тахелес раней прызначанага тэрміну і з гэтай мэтай літаральна арыштаваў шосты паверх будынка. Мастак застаўся без сваіх палотнаў і толькі амаль праз год, калі высветлілася незаконнасць дзеянняў банка, змог іх вярнуць.

Так ці інакш, Тахелес усё роўна закрыўся, але застаўся як легенда, гарадскі дух і знак мастацтва. Фестываль «Міфалагема тысячагоддзя» вяртае мінулае і ўзнаўляе яго ўжо ў Мінску: у Ок16 зараз можна паглядзець татальную экспазіцыю Родзіма, у цэнтры якой — яго велізарная «Міфалагема» памерам 15 на 4 метра, што стваралася цягам пяці гадоў. То-бок, тое, дзеля чаго некалі хадзілі на шосты паверх арт-сквота ў Берліне, зараз выстаўляецца ў Мінску. Удзельнічаюць у экспазіцыі і калегі Родзіма па Тахелесе, і беларускія творцы, што мелі дачыненне да «Дахаў». На ўчарашняе адкрыццё таксама прыехаў колішні дырэктар Тахелеса Марцін Райтэр.

Таму чарговы «Дах», які пачынаўся ў Берліне і працягваўся ў Мінску, зараз базуецца ў Ок16. Фестываль «Міфалагема тысячагоддзя» працягнецца да 28 верасня, але нямецкія госці застануцца ў Мінску толькі на тры дні, за якія правядуць перформансы і творчыя сустрэчы. Мяркуем, тыя, хто завітае на выставу Родзіма, па традыцыі ўбачаць за працай і самога мастака — усё, як гэта было ў Тахелесе.

Сафія ПАЛЯНСКАЯ

Фота Ганны ЗАНКАВІЧ


Выбар рэдакцыі

Эканоміка

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Энергія смецця, якасць вады і зніжэнне затрат удвая. Камунальнікі і навукоўцы абмеркавалі ўплыў інавацый на жыццё галіны

Святлодыёды са шматслойнымі нанаплёнкамі, якія мяняюць колер у залежнасці ад часу сутак і падстройваюцца пад біярытм чалавека...

Спорт

Сёлета футбольнаму клубу «Віцебск» спаўняецца 60 гадоў

Сёлета футбольнаму клубу «Віцебск» спаўняецца 60 гадоў

«У юбілейны сезон хацелася сур'ёзна адзначыць дзень нараджэння. Але пандэмія каранавіруса ўнесла свае карэктывы».

Эканоміка

 Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансiстам патрэбны банкноты — прымаюць любыя. Банкi гарантуюць, што захаваюць нашы грошы

Фiнансавыя паслугi адзiн аднаму людзi аказваюць ужо тысячы гадоў.