Вы тут

Гродна: «Аб градзе гэтым і ўсіх, хто вераю жыве ў ім»


Фотаальбом «Каложская царква» гродзенскага фотамайстра Аляксандра Ласмінскага выдадзены ў пярэдадзень Дня беларускага пісьменства ў Слоніме. Увогуле, на Гродзеншчыне актыўна развіваецца краязнаўчы рух у розных праявах. І візуалізацыя аб'ектаў даўніны — адзін з кірункаў у гэтай справе.


З прадмовай да сімпатычнай і красамоўнай праз выдатныя фотаздымкі фотакнігі, «зялёнае святло» якой дало выдавецтва «Беларусь», выступае архіепіскап Гродзенскі і Ваўкавыскі Арцемій. Вось што, у прыватнасці, ён зазначае: «Акрамя гісторыка-культурнай каштоўнасці для горада Гродна, Свята-Барыса-Глебскі храм на Каложы мае яшчэ і вялікае духоўнае значэнне. Па-першае, гэты адзіны з храмаў, што захаваўся з XІІ стагоддзя, выразна сведчыць пра тое, што менавіта ўсходняя хрысціянская традыцыя, якая атрымала пасля назву праваслаўнай, была першаснай у Гродне — горадзе, які ў перыяд Сярэднявечча быў сапраўдным фарпостам на заходніх межах Старажытнай Русі. Па-другое, той факт, што храм быў асвячоны ў гонар святых дабраверных князёў і пакутнікаў Барыса і Глеба, сыноў святога роўнаапостальнага вялікага князя Уладзіміра — хрысціцеля Русі, кажа пра асаблівую духоўную і культурную супольнасць усходніх славян — продкаў сучасных беларусаў, рускіх і ўкраінцаў — і дае нам выдатны пырклад іх адзінства ў Хрысце, у якім, па словах апостала Паўла, «няма ні эліна, ні іўдзея... але ўсё і ва ўсім Хрыстос». І, па-трэцяе, старажытная Каложская царква справядліва лічыцца сярод жыхароў Гродна адным з самых святых месцаў у горадзе. Бо тут, у сценах старажытнага храма, з XІІ стагоддзя ўзносіцца малітва «аб богаахаванай нашай краіне», «аб градзе гэтым і ўсіх, хто вераю жыве ў ім». Пад гэтыя старажытныя скляпенні прыходзяць людзі рознага ўзросту і сацыяльнага статусу па малітвеную дапамогу да святых Барыса і Глеба, пад жыватворнае Покрыва Маці Божай дзеля цудатворнай іконы «Каложскай». Многія менавіта тут імкнуцца атрымаць благаславенне Божае на ўступленне ў шлюб і далейшае сумеснае сямейнае жыццё, а затым прыносяць сваіх дзяцей, каб спадобіць іх благадаці Святога Хрышчэння».

«Несмяротным тварэннем нашых продкаў» называе Аляксандр Ласмінскі Каложскую царкву. А сваім фотапаглядам унікліва сягае ў сэрца і душу Каложы, паказвае яе палёт і яе ўзвышанасць у гарадскім інтэр'еры, у сённяшнім дні старажытнага горада. Поруч з арыгінальнымі здымкамі сапраўднага майстра — рэпрадукцыі старых паштовак з выявай Каложскай царквы ў пачатку XX стагоддзя, выявы варыянта рэканструкцыі Каложскай царквы М. Вароніна (1954 год), абмернага чарцяжа перыметра храма. На здымках Аляксандра Ласмінскага — дэталі, фрагменты каложскіх артэфактаў, літаральна ўсе куточкі царквы.

Тыраж выдання — 2000 экзэмпляраў. Няма ніякіх сумненняў, што фотакніга Аляксандра Ласмінскага шырока разыдзецца не толькі па Гродзеншчыне, але і па ўсёй нашай краіне. Варта адзначыць, што Аляксандр Ласмінскі — знаны фоталетапісец Гродзеншчыны. Дзякуючы яго творчай руплівасці пабачылі свет фотальбомы «Аўгустоўскі канал», «Прынёманне. Гродзенская вобласць», «Возера Свіцязь», «Гродзенская зямля з вышыні птушынага палёту». У 2011 годзе Аляксандра Ласмінскага ўзнагародзілі медалём Францыска Скарыны.

Сяргей ШЫЧКО

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.