Вы тут

«Падпрацоўваць становіцца нават модна»


Будучы выкладчык — аб рабоце ў дзіцячым лагеры і не толькі.

Пачаць зарабляць самастойна — адно з найважнейшых рашэнняў, з неабходнасцю прыняцця якога маладыя людзі абавязкова сутыкаюцца на пэўным этапе свайго жыцця. Зараз для юнакоў і дзяўчат ёсць шырокі выбар магчымасцяў як для летняй падпрацоўкі, так і для работы на пастаяннай аснове. Канешне, усё залежыць ад індывідуальных здольнасцяў і талентаў саіскальніка, яго зацікаўленасці ў той ці іншай сферы дзейнасці. Калі ў вас ёсць жаданне выбраць шлях да фінансавай незалежнасці, давайце пазнаёмімся з вопытам работы ў дзіцячым лагеры студэнткі трэцяга курса лінгвагуманітарнага каледжа МДЛУ Лізаветы Кемен.


Лі­за­ве­та (край­няя спра­ва) з вы­ха­ван­ца­мі.

— Што было галоўным штуршком у гэтым тваім рашэнні?

— Раней я раздавала рэкламныя лістоўкі, шчыравала ў кол-цэнтры, таму магу сказаць, што знаходзіць падпрацоўку ў пазавучэбны час для мяне было не ў навінку. Сёлета задача па яе пошуку ў разы стала лягчэйшай у сувязі з тым, што наш каледж дае для студэнтаў трэцяга курса магчымасць на летні час праходзіць практыку, якая аплачваецца, у аздараўленчых лагерах па ўсёй краіне. Я была рада такой магчымасці, бо з самага дзяцінства ездзіла ў іх на канікулах і, калі назірала за дзейнасцю выхавальнікаў-важатых атрадаў, заўсёды хацела сама апынуцца на іх месцы. Гэта выдатны і цікавы вопыт, тым больш, яшчэ і нядрэнны заробак. Хоць кіраўніцтва каледжа прапаноўвала нам шэраг лагераў, з якіх мы маглі выбіраць, вырашыла самастойна знайсці адпаведнае для сябе месца. Праштудзіравала водгукі ў інтэрнэце, у прыватнасці, даведалася меркаванне дзяцей, знайшла варыянт, патэлефанавала туды і — дамовілася на гутарку...

— Ці наведвала спецыяльныя майстар-класы, семінары або вэбінары, каб неяк падрыхтавацца да паездкі?

— Я вучуся на выкладчыка англійскай мовы і мая будучая прафесія мае на ўвазе непасрэднае ўзаемадзеянне з дзецьмі, іх навучанне і выхаванне. У каледжы мы наведвалі майстар-класы па арганізацыі гурткоў, семінары па фізічнай падрыхтоўцы, прыдумлялі гульні для дзяцей, назвы атрадаў, дэвізы, малявалі плакаты і рабілі многія іншыя цікавыя рэчы. А за два дні да прыезду дзяцей падрыхтоўвалі карпусы і праходзілі розныя семінары ўжо непасрэдна ў самім лагеры.

— Што найперш патрэбна, каб працаваць выхавальнікам-важатым?

— Безумоўна, ён павінен валодаць пэўным наборам якасцяў. Гэта і камунікабельнасць — уменне выбудоўваць стасункі і знаходзіць агульную мову з дзецьмі, і арганізатарскія здольнасці, і творчы падыход да працы, і крэатыўнасць, і стрэсаўстойлівасць. А яшчэ спагадлівасць і адказнасць, што асабліва важна, калі вы працуеце з дзецьмі, гатоўнасць праяўляць не толькі творчую, але і фізічную актыўнасць. Я лічу, што валодаю многімі якасцямі з гэтага спіса.

У атра­дзе бы­лі дзе­ці ад 9 да 12 га­доў.

— Ці ўзнікалі складанасці падчас знаходжання ў лагеры?

— Былі, але не крытычныя. Трэба браць пад увагу, што ўсе дзеці — розныя, да кожнага патрэбны індывідуальны падыход. У нас у атрадзе сабралася 50 хлопчыкаў і дзяўчынак ва ўзросце ад 9 да 12 гадоў. Першыя тры дні былі самыя цяжкія: трэба было пазнаёміцца з кожным, запомніць усіх па імёнах, пастарацца даведацца пра іх псіхафізіялагічныя асаблівасці... Складаней за ўсё было адаптавацца дзецям, якія ўпершыню прыехалі ў лагер. Яны сумавалі па бацьках, часам плакалі, а мы, у сваю чаргу, павінны былі прыкласці ўсе намаганні, каб стварыць спрыяльную атмасферу і даць ім магчымасць хутчэй прывыкнуць да новага месца. Узнікалі некаторыя цяжкасці ў падрыхтоўцы да розных конкурсаў, але мы справіліся. Наш атрад заняў першае месца ў малодшай дружыне, больш за тое, на працягу ўсёй змены мы займаем толькі прызавыя месцы. І, як я лічу, гэта і ёсць паказчык таго, што мы з маленькімі выхаванцамі сталі выдатнай зладжанай і дружнай камандай.

— А як ты ўвогуле лічыш: ці трэба маладым людзям акрамя вучобы яшчэ і падпрацоўваць?

— Калі ёсць магчымасць, чаму б і не? Асабліва калі хлопцы і дзяўчаты, як і я, вучацца на платным і здымаюць кватэру. Грошы дакладна лішнімі не будуць. Тым больш, калі студэнт пачынае працаваць па спецыяльнасці, на якую вучыцца, то да заканчэння навучальнай установы ў яго будзе рэальны досвед у абранай сферы, адпаведна больш высокія шанцы знайсці высокааплатную работу. І калі падчас вучобы з-за падпрацоўкі можа пагоршыцца паспяховасць, то летняя прынясе толькі карысць. Цяпер можна знайсці розныя варыянты дадатковага заробку і выбраць той, які падыдзе менавіта вам. Падпрацоўваць становіцца нават модна. Таму, калі ў вас ёсць такое жаданне, то — наперад!

Надзея БОБРЫК, студэнтка І курса факультэта міжкультурных камунікацый МДЛУ

Выбар рэдакцыі

Грамадства

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

У 72-м аб'яднаным вучэбным цэнтры юнакі атрымліваюць і грамадзянскія спецыяльнасці

72-і аб'яднаны вучэбны цэнтр, што ў Печах, — самая вялікая воінская часць у Беларусі. 

Грамадства

Распавядаем, як арганізавана меддапамога ў Паставах

Распавядаем, як арганізавана меддапамога ў Паставах

Самым аддаленым ад абласнога цэнтра раёне краіны.

У свеце

Чаму Дональд Трамп захацеў набыць Грэнландыю?

Чаму Дональд Трамп захацеў набыць Грэнландыю?

Цяпер гэтая аўтаномная тэрыторыя ўваходзіць у склад Каралеўства Данія.

Грамадства

Школы Гомельшчыны прайшлі праверку на гатоўнасць да навучальнага года

Школы Гомельшчыны прайшлі праверку на гатоўнасць да навучальнага года

Сё­ле­та ў да­школь­ныя ўста­но­вы ра­ё­на прый­дзе 2 700 ма­лых.