Вы тут

Штотыднёвы спартыўны агляд «Звязды»


Беларускія весляры напярэдадні чэмпіянату свету ў Венгрыі заваявалі дзевяць узнагарод на міжнародным турніры. Гэтыя і іншыя актуальныя навіны спорту — у штотыднёвым аглядзе «Звязды».


1. Дзевяць узнагарод заваявалі беларускія атлеты на маладзёжным і юніёрскім чэмпіянатах свету па веславанні на байдарках і каноэ ў Піцешці (Румынія). Залатымі медалісткамі сталі Алена Наздрова ў каноэ на 500 метраў сярод атлетаў да 23 гадоў і Вераніка Леанюк у веславанні на байдарках сярод юніёраў (U-19) на 200 метраў. Чэмпіёнкі свету таксама сталі ўладальніцамі яшчэ дзвюх узнагарод. Вераніка Леанюк заваявала «серабро» ў байдарцы на 500 метраў, а Алена Наздрова заняла трэцяе месца ў алімпійскім відзе праграмы для жанчын на 200 метраў у каноэ. Другое месца ў каноэ на 1000 метраў сярод юніёраў на сусветным форуме ў Румыніі занялі Уладзіслаў Палешка і Мацвей Шалак. Бронзавымі прызёрамі сталі Дарына Саланенка і Каміла Бобр у каноэ на 200 м (U-23), а таксама юніёры ў каноэ-чацвёрцы на 500 метраў — Уладзіслаў Палешка, Мікіта Агародны, Станіслаў Савельеў, Мацвей Шалак. У веславанні на байдарцы-двойцы на 500 метраў Ганна Пашчанка і Марыя Калугіна ўзышлі на трэцюю прыступку п'едэстала, Лізавета Вількова і Уладзіслава Скрыганава былі трэція ў катэгорыі да 23 гадоў. Галоўным стартам сезона ў веславанні на байдарках і каноэ стане дарослы чэмпіянат свету, які пройдзе з 21 да 25 жніўня ў венгерскім Сегедзе.


2. Арына Сабаленка не здолела перамагчы на турніры ў амерыканскім Сан-Хасэ з прызавым фондам 876 тысяч долараў. У вырашальным паядынку беларуска саступіла ў двух сэтах кітайскай тэнісістцы Чжэн Сайсай — 3:6, 6:7. Матч працягваўся 1 гадзіну 47 хвілін.

Да гэтага на спаборніцтвах у Сан-Хасэ Сабаленка абыграла амерыканку Кока Вандэвеге (6:3, 6:3), іспанку Карлу Суарэс Навара (3:6, 6:2, 6:4) і харватку Дону Векіч (6:4, 6:3). Для Арыны гэта быў сёмы фінал турніраў пад эгідай Жаночай тэніснай асацыяцыі — у трох з іх яна перамагала. Пасля турніру ў Сан-Хасэ Арына Сабаленка паднялася на 9-е месца ў сусветным рэйтынгу.

Раней у Сан-Хасэ ў паядынку 1/8 фіналу Вікторыя Азаранка саступіла харвацкай тэнісістцы Доне Векіч у двух сэтах — 4:6, 3:6. На старце турніру беларуска перайграла прадстаўніцу Францыі Армоні Тан — 6:2, 6:4.


3. Беларускія баскетбалісты паспяхова пачалі выступленне ў другім кваліфікацыйным раўндзе чэмпіянату Еўропы 2021 года. На старце турніру ў групе Е яны ўпэўнена выйгралі ў зборнай Албаніі з лікам 73:51. Самым выніковым у складзе пераможцаў стаў Максім Салаш, які набраў 16 ачкоў. Свой наступны паядынак беларускія баскетбалісты правядуць 7 жніўня ў Мінску супраць датчан. 14 жніўня на сваёй пляцоўцы прымуць зборную Албаніі, а 17 жніўня беларусы завершаць турнір сустрэчай у Даніі. У асноўны адборачны раўнд выйдуць толькі пераможцы груп. Калі беларусы зоймуць першае месца, то трапяць у квартэт С, дзе іх сапернікамі будуць зборныя Літвы, Бельгіі і Чэхіі. Фінальны этап кантынентальнага першынства з удзелам 24 камандаў пройдзе ў жніўні 2021 года на арэнах Грузіі, Чэхіі, Германіі і Італіі.


4. Сталі вядомыя ўсе ўдзельнікі чвэрцьфінальнай стадыі Кубка Беларусі па футболе. У заключных матчах «Шахцёр» абыграў у Гомелі мясцовы «Лакаматыў» — 2:1, а мазырская «Славія» на сваім полі перайграла «Віцебск» — 3:1. Да гэтага ў чвэрцьфінал прабіліся жодзінскае «Тарпеда-БелАЗ», магілёўскі «Дняпро», барысаўскі БАТЭ, мінскае і брэсцкае «Дынама», а таксама «Іслач» з Мінскага раёна.

Дар'я Лабажэвіч

Загаловак у газеце: Да сустрэчы ў Сегедзе

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.