Вы тут

Якія работы вулічнага мастацтва з'явяцца падчас пятага Vulіса Brаsіl?


Ужо трыццаць восем стрыт-арт-аб'ектаў — на будынках заводаў, жылых дамах, мастах — з'явілася ў Мінску дзякуючы фестывалю Vulіса Brаsіl. Унікальная для Беларусі падзея, падчас якой на гарадскіх вуліцах узнікаюць муралы, графіці і скульптуры, адкрылася ў сталіцы ў пяты раз. 29 ліпеня беларускія і бразільскія мастакі пачалі працаваць над арт-аб'ектамі, між тым на пляцоўках фестывалю праходзяць майстар-класы, творчыя сустрэчы, кінапаказы, варкшопы, выстаўкі, а завяршыцца гэта ўсё павінна 10 жніўня маштабным опэн-эйрам з танцамі, фільмамі, музыкай, ежай і кірмашом.


Фота Ганны Занкавіч.

На першым фестывалі Vulіса Brаsіl у 2011 годзе два бразільскія мастакі разам з беларускімі калегамі пачалі адкрываць Мінску стрыт-арт, а стрыт-арту Мінск. Цяпер у гарадской прасторы працуе трынаццаць аўтараў, пяць з якіх прыехалі з Бразіліі. Вынікам іх работ стануць дванаццаць новых твораў.

Беларускі мастак Хвост Хвастоў на скрыжаванні Бабруйскай і праспекта Незалежнасці піша мурал «Манументальнасць». «Гэта глухая прастора пад мостам — я часта праходзіў міма і, як і іншыя, не звяртаў на яе ўвагі, — кажа аўтар. — Я спрабую асэнсаваць тое, што людзі мінаюць і не заўважаюць гэтую сцяну — яна асацыюецца з жыццём у горадзе ўвогуле, бо мы часта засяроджваемся на сабе, пакуль праходзім міма нечага ці некага. Гарадскі паток — такая ж глухая сцяна, людзі, пабудовы, дрэвы зліваюцца ў адно. На маім мурале будзе мноства рознамаштабных элементаў у крыху фантастычным выкананні, моцна стылізаваных. Гэта своеасаблівы скрыншот, момант з жыцця горада, можна спыніцца і паглядзець, ахапіць усе дэталі разам альбо ў нейкай узаемасувязі. Праз гэту сцяну я стараюся звярнуць увагу чалавека на навакольны свет, каб ён зразумеў, што рэчы і ідэі, на якія варта глядзець, знаходзяцца побач».

Бруна Біг (на фота) — вядомы ў бразільскай сферы мастацтва дзеяч. На адным з будынкаў Кастрычніцкай ён піша мурал «Даглядай свой сад». «Гэта метафарычная выява, дзе я прапаную паклапаціцца пра сябе, і тады іншыя добрыя рэчы прыйдуць самі сабой. Жанчыны ў маёй сям'і любяць займацца садам, я часта за гэтым назіраў і напісаў там шмат работ. Калі мяне папрасілі прыдумаць назву маёй сцяне на Vulіса Brаsіl, я знайшоў верш «Даглядай свой сад», і мне спадабалася яго ідэя. У ім ёсць радкі пра тое, што не трэба ганяцца за матылькамі — проста клапаціся пра свой сад, і матылькі прылятуць самі. Гэта значыць, калі ты пачынаеш даглядаць сябе і тое, што цябе акружае, змяняецца ўсё астатняе». Бруна Біг кажа, што Мінску і, у прыватнасці, Кастрычніцкай вуліцы са строгай квадратнай архітэктурай і старымі савецкімі пабудовамі стрыт-арт вельмі падыходзіць. «Я ўбачыў цэлую суполку людзей, якія нешта ствараюць, — гэта фатографы, мастакі і аўтары з іншых сфер, і, мне здаецца, у іх ёсць для творчасці месца. Наколькі я зразумеў, гэтая частка горада імкліва развіваецца, тут з'яўляюцца рэстараны, кавярні, цудоўныя арт-прасторы, і, думаю, хутка ў вас будзе яшчэ больш такіх месцаў. Вулічнае мастацтва ж у пэўным сэнсе нелегальнае, бо пачынаецца з графіці: калі ты выходзіш без дазволу маляваць на сценах — грамадству складана ўспрымаць гэта як мастацтва, але калі яно атрымлівае прафесійнае суправаджэнне, людзі пачынаюць верыць у яго сілу. У 1990—2000-х у Рыа-дэ-Жанейра здарыўся цэлы бум стрыт-арту, было лёгка выйсці на вуліцу і пачаць пісаць, мы ведалі, дзе і як рабіць гэта без праблем, таму я пачынаў у сапраўды цудоўны час. Беларускія мастакі таксама павінны знайсці для сябе месца і спосаб зрабіць стрыт-арт часткай культуры», — лічыць Бруна Біг.

Адным з удзельнікаў фестывалю Vulіса Brаsіl стаў і Захар Кудзін, які піша мурал «Ледзяны палёт. Гарачы космас». Свой накірунак мастак называе нейрамастацтвам. «Асноўная задача майго роспісу — даць чалавеку, які жыве ў горадзе, візуальны адпачынак, перазагрузіць яго, да таго ж паказаць новы вобраз мыслення ў жывапісе. «Ледзяны палёт. Гарачы космас» — гэта канцэптуальны праект, распрацаваны спецыяльна для не заўсёды прывабнай архітэктуры: замест таго каб перабудоўваць, праз жывапіс яе можна трансфармаваць. Архітэктура як быццам знікае, але ў той жа час застаецца. На мінскіх вуліцах з пункту гледжання пасылу, гісторыі і яе развіцця ўзоры мастацтва ёсць, але абстрактных выяўленчых элементаў, якія сваімі лініямі і формай змяняюць асяроддзе, калі за кошт выявы знікае плоскасць, у горадзе няшмат. Мне не падабалася ілюстрацыйная трактоўка рэальнасці, таму я прыйшоў да больш фізічнага ўспрыняцця свету. Фізічныя законы я выкарыстоўваю для таго, каб перадаць адчуванне, і мая работа — гэта будзе абстрактны жывапіс — з'яўляецца такой энергетычнай капсулай, што дае чалавеку магчымасць адпачыць, а гэта вельмі здорава, бо праз пастаянную змену выяў у тэлефонах мы ўсе адчуваем ціск і церпім стрэс».

Кожны дзень форуму аж да кульмінацыі 10 жніўня мае фестывальныя івэнты. Праграму мерапрыемстваў і месцы, дзе ў гэты час з'яўляюцца новыя аб'екты вулічнага мастацтва, шукайце на сайце vulіса-brаsіl.bу.

Сафія ПАЛЯНСКАЯ

Загаловак у газеце: Колеры заводаў

Выбар рэдакцыі

Эканоміка

Тонкае мастацтва дабрабыту. Складаем сямейны бюджэт разам спецыялістам Нацбанка

Тонкае мастацтва дабрабыту. Складаем сямейны бюджэт разам спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.

Калейдаскоп

Вясёлыя гісторыі чытачоў

Вясёлыя гісторыі чытачоў

Класiкаў трэба ведаць…, Быў бы араты, будзе й прыганяты, Па малiну…

Эканоміка

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

«Мы выказалi прапановы, i нас пачулi». Як дзяржаўныя прэферэнцыi дапамагаюць падтрымаць суб'ектаў гаспадарання

У бiзнес-колах Гродзеншчыны лiчаць, што меры па падтрымцы эканомiкi з'явiлiся своечасова.