Вы тут

Працягваюць падводзіцца вынікі Еўрапейскіх гульняў


Вопыт Еўрапейскіх гульняў у кантэксце іміджу краіны, турызму і інфраструктуры

Пасля завяршэння мультыспартыўнага турніру ў Мінску прайшоў ужо амаль месяц, але спецыялісты галіны працягваюць падводзіць яго вынікі.


Намеснік міністра спорту і турызму Беларусі Міхаіл Партной паведаміў, што ў час ІІ Еўрапейскіх гульняў у Беларусі пабывала больш за 37 тысяч замежных турыстаў. Ён адзначыў, што да пачатку турніру яго арганізатары ставілі перад сабой мэту па колькасці замежных гасцей перасягнуць Еўрапейскія гульні ў Баку, куды ў 2015 годзе прыехала 28 тысяч замежнікаў.

«Паводле звестак Дзяржаўнага пагранічнага камітэта, па квітках ІІ Еўрапейскіх гульняў, якія замянялі візы, у нашу краіну ўехала 8167 замежных грамадзян, але ў гэтай статыстыцы не ўлічаны турысты з Расіі, Украіны і тых краін, з якімі ў нас уведзены бязвізавы ўезд, а таксама тыя, хто заехаў у краіну праз аэрапорт. Агульная колькасць замежных турыстаў па заніжанай ацэнцы складае 37 450. Але гэта папярэднія звесткі, і, думаю, пасля справаздачы турфірмаў і апублікавання статыстычных даных іх колькасць будзе вышэйшая», — расказаў Міхаіл Партной.

Канчатковая колькасць арганізаваных турыстаў, якія пабывалі ў Мінску і Беларусі падчас ІІ Еўрапейскіх гульняў, назавуць толькі ў канцы года. Вызначыць, колькі Беларусь у цэлым зарабіла на гэтых гульнях, таксама можна будзе толькі па выніках года, калі будзе сабрана ўся неабходная статыстыка суб'ектаў гаспадарання і дзяржорганаў.

З моманту ўвядзення бязвізавага рэжыму (20 мая) і да 10 ліпеня пагранічнікі зафіксавалі 766 183 перасячэнні мяжы. Найбольшая колькасць турыстаў прыязджала з Расіі, Украіны, Латвіі, Літвы, Польшчы, а самым распаўсюджаным відам транспарту, на якім была перасечана граніца, быў аўтамабільны, на другім месцы — авіятранспарт, на трэцім — чыгунка.

Пасажырапаток у Нацыянальным аэрапорце Мінск вырас у чэрвені амаль на 10 %, а ў перыяд правядзення ІІ Еўрапейскіх гульняў — амаль на 80 %. C 19 чэрвеня па 1 ліпеня аэрапорт абслужыў 390 101 пасажыра — гэта на 78 % больш за аналагічны леташні перыяд (тады было 218 677 пасажыраў). Лік абслужаных за гэты перыяд рэйсаў вырас на 11 % — да 2458 (год таму было 2214), паведамілі ў прэс-службе Нацыянальнага аэрапорта Мінск. У перыяд правядзення Гульняў зафіксаваны рэкордныя для авіяпрадпрыемства паказчыкі па абслужаных самалёта-вылетах і пасажырах за адны суткі, напрыклад, 21 чэрвеня абслужана 208 рэйсаў, 1 ліпеня — 20 276 пасажыраў.

Начальнік аддзела ўпраўлення пагранічнага кантролю Дзяржаўнага пагранічнага камітэта Кузьма Лясняк лічыць, што дзяржаўны пагранічны камітэт Беларусі падчас падрыхтоўкі і правядзення ІІ Еўрапейскіх гульняў выканаў пастаўленыя задачы. Перад правядзеннем турніру да прыёму турыстаў загадзя рыхтавалі як непасрэдна пункты пропуску, так і асабісты склад. Па словах прадстаўніка Дзяржпагранкамітэта, падчас турніру былі адзначаны выпадкі, калі замежнікі хацелі трапіць у Беларусь па падробленых дакументах, але такія спробы былі спынены. «Атрыманы вопыт мы будзем выкарыстоўваць пры падрыхтоўцы да чэмпіянату свету па хакеі, які ў 2021 годзе прымуць Беларусь і Латвія», — адзначыў Кузьма Лясняк.

У 195 краінах гледачы ўбачылі 521 гадзіну прамых трансляцый спаборніцтваў ІІ Еўрапейскіх гульняў. Агульная аўдыторыя гледачоў склала 250 мільёнаў чалавек без уліку тэлегледачоў з Расіі і некаторых іншых краін Еўропы, дзе канчатковыя даныя яшчэ не падлічаны. Мультыспартыўны форум асвятляла больш за 1200 прадстаўнікоў СМІ. У вядучых сродках масавай інфармацыі было зроблена амаль 3,5 тысячы ўнікальных публікацый. «Так канцэнтравана і ў пазітыўным ключы пра Беларусь не пісалі яшчэ ніколі, — заўважыў намеснік дырэктара фонду «Дырэкцыя ІІ Еўрапейскіх гульняў 2019 года» Анатоль Котаў, які прывёў гэтую статыстыку. — Мы чакаем, што такая масіраваная пазітыўная рэклама нашай краіны дапаможа не толькі падвесці добрыя вынікі для турыстычнай галіны сёлета, але яшчэ больш сур'ёзны эфект прынясе ў наступныя гады. Вялікая тэле- і медыяаўдыторыя ўбачыла наш прыгожы край, і для многіх гэта стане пазітыўным матыватарам, каб прыехаць у адпачынак у Беларусь».

«На ІІ Еўрапейскія гульні ў Беларусь мы запрасілі генеральнага сакратара Сусветнай турысцкай арганізацыі Зураба Палалікашвілі. У ходзе візіту адбыліся яго сустрэчы з Аляксандрам Лукашэнкам, намеснікам прэм'ер-міністра Ігарам Петрышэнкам, міністрамі спорту і турызму, замежных спраў, старшынёй Мінгарвыканкама, — расказаў Міхаіл Партной. — Генеральны сакратар Сусветнай турысцкай арганізацыі наведаў спартыўныя і турыстычныя аб'екты, у тым ліку «Дудуткі», вуліцы Кастрычніцкую і Зыбіцкую ў Мінску, дзе быў уражаны колькасцю замежных турыстаў. Зураб Палалікашвілі высока ацаніў наш турыстычны патэнцыял. Цяпер мы працуем над стратэгіяй развіцця турыстычнай галіны і законам аб турызме, Сусветная турысцкая арганізацыя будзе аказваць нам неабходную дапамогу ў падрыхтоўцы і карэкціроўцы гэтых дакументаў».

Старшыня праўлення Рэспубліканскага саюза турыстычнай індустрыі Філіп Гулый адзначыў, што тураператары падчас ІІ Еўрапейскіх гульняў зарабілі на 30 % больш у параўнанні з аналагічным перыядам мінулага года.

Дар'я Лабажэвіч

Загаловак у газеце: Пазітыўны матыватар

Выбар рэдакцыі

Грамадства

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску

Конкурс прафесiйнага майстэрства WorldSkills Belarus 2020 прайшоў у Мiнску ў Індустрыяльным парка «Вялiкi камень» з грандыёзным размахам. 

Культура

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

У выдавецтве «Мастацкая лiтаратура» выйшла кнiга Аляксандра Радзькова «Мой фiзмат»

Пра калег — настаўнiкаў, старэйшых таварышаў, паплечнiкаў распавядае доктар педагагiчных навук, прафесар матэматыкi, заслужаны дзеяч навукi Рэспублiкi Беларусь.

Грамадства

Тураўскі крыж упершыню будзе прадстаўлены 26 верасня

Тураўскі крыж упершыню будзе прадстаўлены 26 верасня

На свята Узнясення Крыжа Гасподняга, падчас вячэрняй службы ў Мінскім кафедральным саборы.