Вы тут

Як у ААТ «Белавежскі» настрой механізатарам узнімаюць


Земляробы «Белавежскага» з Камянецкага раёна заўсёды ставяць рэкорды. Вось і на сёлетнім жніве шафёр ААТ Міхаіл Кучко перавёз з палёў дзве тысячы тон збожжа. Першым у раёне, вобласці і краіне! З гэтай нагоды яго павіншавалі старшыня райвыканкама Валянцін Зайчук, намеснік старшыні аблсельгасхарчу Віктар Бяссілка, дырэктар гаспадаркі Аляксандр Дуньковіч, прадстаўнікі прафсаюза, таварышы па працы. Вядома, былі прэміі, падарункі і песні самадзейных артыстаў.


Але песнямі, танцамі, добрым словам падчас абедзеннага перапынку тут прывячаюць не толькі перадавікоў, але і ўсіх працаўнікоў жніва. Даўняя традыцыя, усталяваная былым кіраўніком Юрыем Марозам, падтрымліваецца і зараз. «Чалавек працуе ў гэты час ад цямна да цямна. Выходзіць з хаты рана і прыходзіць позна ўвечары, калі дзеці ўжо спяць. Яму ж няма часу гартаць стужку навін у інтэрнэце, нават пацікавіцца справамі свайго пасёлка. Ён бачыць перад сабой гадзін дванаццаць адны толькі каласы, — кажа старшыня прафкама гаспадаркі Валянцін СУПРУНОВІЧ. — Гэту манатоннасць не вельмі лёгка трываць. Таму, вядома, кожнаму прыемна, калі падчас абеду з ім пагавораць, пацікавяцца справамі, настроем, артысты заспяваюць добрую песню. У нас так заведзена, што чалавек працы карыстаецца павагай. Маленькі канцэрт і ёсць адно з праяўленняў павагі».

Звычайна музычны дэсант на поле арганізуе дырэктар Дома культуры Ірына Герасімук. Работнікі ўстановы культуры з задавальненнем едуць на ўборку, радуюць сваім мастацтвам працаўнікоў. І не толькі штатныя работнікі, такія як Юлія Логвін. Удзельнікі самадзейнасці падтрымалі добрае пачынанне. Скажам, Васіль Палока працуе трактарыстам на мясакамбінаце, а ў свой выхадны альбо пасля змены з задавальненнем выязджае на поле, каб заспяваць. Андрэй Яговіч, інжынер-механік аддзялення «Каралін», пры любой магчымасці падключаецца да мабільнай агітбрыгады.

Дырэктар ДК Ірына Герасімук сказала, што была вельмі рада ў мінулую суботу, калі віншавалі перадавіка Міхаіла Кучко. Асабліва было прыемна, калі пасля атрымання падарункаў ён асобна падзякаваў за песні. «Лічым, што робім свой унёсак у агульную справу ўраджаю. Мы ж разумеем: будуць ісці паспяхова справы ў гаспадарцы — будзе падтрымка аб'ектаў культуры, адукацыі, сацыялкі».

А ўборка ў ААТ «Белавежскі» падыходзіць да фінішнай прамой. На пачатак тыдня было скошана 87 працэнтаў збожжавых, на канец тыдня артысты плануюць заспяваць дажыначныя песні. Хлебаробы атрымалі каля 43 цэнтнераў збажыны з гектара — для сёлетняга складанага лета нядрэнны вынік.

Святлана ЯСКЕВІЧ

Камянецкі раён

Загаловак у газеце: Музычная паўза на жніве

Выбар рэдакцыі

Спорт

«Людзі думаюць, што ўсёмагутныя і — разбіваюцца»

«Людзі думаюць, што ўсёмагутныя і — разбіваюцца»

Ці так небяспечны парашутны спорт, як здаецца на першы погляд?

Грамадства

Дзе знаходзяць падтрымку бацькі асаблівых малых?

Дзе знаходзяць падтрымку бацькі асаблівых малых?

Стаялі ў калідоры і ўспаміналі першыя крокі ў выхаванні сваіх асаблівых дзетак.

Культура

«Калі чалавецтва зноў паставіць перад сабой высокія пытанні, яно мяне ўспомніць»

«Калі чалавецтва зноў паставіць перад сабой высокія пытанні, яно мяне ўспомніць»

Пагутарылі з дачкой вядомага ўраджэнца Віцебска Лазара Хідэкеля.