ССНУ пачалі прыём дакументаў ад абітурыентаў

Установы адукацыi, якiя ажыццяўляюць падрыхтоўку на ўзроўні сярэдняй спецыяльнай адукацыі, пачалі сёння прыём дакументаў ад абітурыентаў, паведаміў БЕЛТА начальнік галоўнага ўпраўлення прафесійнай адукацыі Міністэрства адукацыі Сяргей Каспяровіч.

"Абітурыенты, якія скончылі 9 класаў, а таксама выпускнікі школ, якія не падавалі дакументы ў ВНУ, або тыя, хто не пройдуць па конкурсе на выбраныя спецыяльнасці, павінны ведаць, што сёння пачынаецца прыём дакументаў у ССНУ", - распавёў Сяргей Каспяровіч.

На базе 9 класаў прыём дакументаў ажыццяўляецца па сярэднім бале пасведчання аб атрыманні агульнай базавай адукацыі (па ўсіх спецыяльнасцях, акрамя творчых і спецыяльнасцяў фізічнай культуры і спорту, дзе яшчэ неабходна прайсці спецыяльныя ўступныя выпрабаванні).

На базе 11 класаў схема крыху больш складаная. "Калі конкурс у папярэднi год па спецыяльнасці быў вышэй 1,5 чалавека на месца, то абітурыенты здаюць два ЦТ - мова і профільны прадмет. Парогу па ЦТ няма. Калі конкурс у папярэднi год па спецыяльнасці быў 1,5 і ніжэй, то абітурыенты паступаюць па сярэднім бале атэстата аб атрыманні агульнай сярэдняй адукацыі. Пры паступленні па атэстаце на творчыя і спартыўныя спецыяльнасці абітурыенты таксама здаюць спецыяльныя ўступныя выпрабаванні", - адзначыў начальнік галоўнага ўпраўлення.

На ўзровень прафесійна-тэхнічнай адукацыі прыём дакументаў пасля 9 і 11 класаў ажыццяўляецца на базе дакумента аб адукацыі, акрамя творчых спецыяльнасцяў.

Пасля 9 класаў прыём дакументаў у ССНУ на бюджэт завершыцца 3 жніўня, на платнае - 14 жніўня. Пасля 11 класаў на бюджэт - 9 жніўня, на платнае - 16 жніўня. Прыём дакументаў на ўзровень прафесійна-тэхнічнай адукацыі пачаўся 15 чэрвеня і завершыцца 25 жніўня.

"Варта адзначыць, што пасля завяршэння навучання выпускнікі, якія атрымалі сярэднюю спецыяльную адукацыю, маюць магчымасць паступаць у ВНУ на профільныя спецыяльнасці па асаблівай траекторыі - на скарочаны тэрмін навучання і без здачы ЦТ, толькі па ўнутраных выпрабаваннях. У такім выпадку здаюцца іспыты па дысцыплінах, вывучаных у каледжы", - падкрэсліў Сяргей Каспяровіч.

У 2019 годзе прыём дакументаў ад абітурыентаў на ўзровень сярэдняй спецыяльнай адукацыі ажыццяўляюць 110 каледжаў і 83 установы адукацыі, якія рэалізуюць адпаведныя праграмы на 156 спецыяльнасцях.