Вы тут

Школьная бізнес-кампанія ў Клецкім раёне паспяхова працуе ў сферы канцтавараў


Апошнім часам сярэднія навучальныя ўстановы імкнуцца пашыраць веды вучняў не толькі ў рамках абавязковай школьнай праграмы, але і ў сферы прадпрымальніцтва. Са з'яўленнем тры гады таму ў Даматканавіцкай сярэдняй школе Клецкага раёна бізнес-кампаніі «Фармат» тут зніклі праблемы з тым, дзе раздрукаваць рэферат, зрабіць фота на дакументы ці набыць незвычайны падарунак сябру. А самі школьнікі задаволеныя магчымасцю паспрабаваць сябе ў ролі сапраўдных бізнесменаў!


Ілья Сі­да­ро­віч (зле­ва) і Яў­ген Фа­ле­тар.

У «Фармаце» можна набыць вокладкі, нататнікі, ручкі, календары... Пры жаданні кліенты могуць заказаць канцылярскія тавары з выявай роднага горада, каханай дзяўчыны ці формул па фізіцы. Пры ўдзеле ў розных конкурсах ці навуковых канферэнцыях можа аказацца зручнай паслуга брашуроўкі лістоў — атрымліваецца папка, у якой усё сістэматызавана.

На пазабюджэтныя школьныя сродкі для бізнес-кампаніі быў набыты прынтар для сублімацыйнага друку. Спектр паслуг павялічыўся: з'явілася магчымасць наносіць выявы на кубкі, талеркі, магніты і іншыя загатоўкі. Такія вырабы часцей за ўсё набываюць у якасці падарунка.

У аказанні друкарскіх паслуг у «Фармату» амаль няма канкурэнтаў, што вельмі пазітыўна ўплывае на колькасць кліентаў. Таксама да бізнесменаў-пачаткоўцаў часам звяртаюцца з просьбай пераўстаноўкі Wіndows.

— Мы нядрэнна разбіраемся ў камп'ютарах, таму можам дапамагчы мясцовым жыхарам, — кажа Ілья Сідаровіч, выпускнік школы гэтага года, дырэктар школьнай бізнес-кампаніі.

На пытанне, ці прыносіць бізнес прыбытак, Яўген Фалетар, выпускнік 10 класа і фінансавы дырэктар «Фармату», адказаў:

— Зараз наша мэта не ў тым, каб зарабіць шмат грошай, а ў тым, каб паспрабаваць сябе ў якасці прадпрымальнікаў. У будучыні мы ўсе марым імі стаць, бо бізнесмены дзякуючы сваёй працы — паспяховыя людзі.

У найбліжэйшай будучыні «Фармат» плануе развівацца і пашыраць спектр паслуг. У хуткім часе тут можна будзе заказаць нанясенне выявы на майку, бірульку ці фотаальбом. Таксама плануецца стварыць Іnstagram-акаўнт, дзе будуць выстаўлены ўзоры вырабаў і навінкі. На думку юных прадпрымальнікаў, гэта дапаможа пашырыць кліенцкую базу і спрасціць азнаямленне з прадукцыяй. А цяпер інфармацыю пра бізнес-кампанію можна знайсці на сайце школы.

Пасля гутаркі з прадстаўнікамі «Фармату» на фестывалі «Школа прадпрымальніцтва», які праходзіў у Мінскім абласным інстытуце развіцця адукацыі, у мяне не засталося ні кроплі сумнення ў тым, што такія мэтанакіраваныя школьнікі абавязкова прыйдуць да сваёй мары: стануць паспяховымі прадпрымальнікамі
і шмат чаго дасягнуць у жыцці!

Паліна ПРАКАПЕНЯ, студэнтка І курса факультэта журналістыкі БДУ

Загаловак у газеце: Вучнёўскі «Фармат» прадпрымальніцтва

Выбар рэдакцыі

Культура

Мікалай Пінігін: Каб ведаў як, сам напісаў бы класную сучасную п'есу

Мікалай Пінігін: Каб ведаў як, сам напісаў бы класную сучасную п'есу

На рахунку рэжысёра і мастацкага кіраўніка Купалаўскага тэатра Мікалая Пінігіна больш за семдзесят спектакляў, і па некаторыя з іх хоць зараз ідзі на вуліцу Энгельса. 

Грамадства

Расказваем пра тое, як на Брэстчыне раней гатавалі варэнне і як гэта робяць цяпер

Расказваем пра тое, як на Брэстчыне раней гатавалі варэнне і як гэта робяць цяпер

Аказваецца, у нашых вёсках амаль да другой паловы ХХ стагоддзя не мелі звычкі нарыхтоўваць яго, не ведалі, як варыцца.

Спорт

Як у Бабруйску рыхтуюць будучых чэмпіёнаў

Як у Бабруйску рыхтуюць будучых чэмпіёнаў

Менавіта з Бабруйска выйшлі прызёры самых прэстыжных сусветных турніраў па веславанні, барацьбе, боксе, шахматах, лёгкай і цяжкай атлетыцы.

Грамадства

Прадпрыемствы ЖКГ займаюцца адловам беспрытульных жывёл. Але ці павінны яны гэта рабіць?

Прадпрыемствы ЖКГ займаюцца адловам беспрытульных жывёл. Але ці павінны яны гэта рабіць?

Летась у Мінскай вобласці адлавілі больш за пяць тысяч бадзяжных жывёл, толькі 203 з іх знайшлі свой дом. Толькі ўявіце сабе, як лічбы адлову павялічваюцца ў маштабах усёй краіны!