Пра што расказвае Плябань

Назва гэтай вёскі Маладзечанскага раёна нагадвае, што некалі прыметай паселішча з'яўлялася плябань — дом святара побач з храмам. У якія часы такая назва замацавалася — размова асобная. Але вядома, што першы драўляны будынак мясцовага касцёла на загад вялікага князя Аляксандра Ягелончыка пачалі тут будаваць прыкладна ў 1500 годзе.

Стагоддзі не пашкадавалі ўзведзенага. Сёння толькі адна пабудова 1880 года маўкліва паглядае з пагорка на маляўнічае наваколле.

Калі ж пажадаеце зрабіць экскурсію ў мінулае — наведайце размешчаны побач цэнтр традыцыйнай культуры і побыту. Вы ўбачыце ўзоры мясцовых вышыванак, глінянага посуду, упрыгожанняў з саломкі, адзенне святароў і тагачасныя гаспадарчыя прылады.

На ўтравелых мурах цішыня,

Але верыць спакою не варта —

Тут наяве, нібыта ў снах,

З-пад камення глядзіць даўніна,

Разам з ёй углядаюся ў заўтра.

Скрозь стагоддзі ўспамінаў прамень

Асвятляе былыя часіны.

Не закрые няпамяцтва цень

Дзень мінулы і заўтрашні дзень,

Змацаваныя лёсам адзіным.

Яўген ПЯСЕЦКІ