Вы тут

40 гадоў таму выйшла стужка «Трое у лодцы»


Трое халасцякоў, якія стаміліся ад бяздзейнасці і знайшлі кожны ў сябе «страшныя» хваробы, вырашылі паправіць здароўе — у падарожжы па Тэмзе ў кампаніі адных мужчын, уключна з фокстэр'ерам Манмарэнсі. Відаць, Бог моцна смяяўся з гэтых планаў, бо падкінуў сябрам сустрэчу з трыма чароўнымі лэдзі, якія гэтаксама планавалі самастойны сплаў, а ніяк не рамантычныя стасункі з незнаёмцамі...


40 гадоў таму на экраны выйшла дзвюхсерыйная музычная камедыя рэжысёра Навума Бірмана пра траіх у лодцы і сабаку. І, нягледзячы на тое, што ў 1979-м савецкая кінавытворчасць выпусціла амаль 200 фільмаў, гэты не згубіўся ў вялікім шэрагу і ўвайшоў у залаты фонд савецкай камедыі.

Згадаць пра «Траіх у лодцы» (і паглядзець фільм 20 ліпеня на АНТ) менавіта цяпер ёсць і яшчэ адна нагода — блізкі 85-гадовы юбілей акцёра Аляксандра Шырвінта. Ягоная роля сэра Самуэля Харыса, каларытнага філосафа з трубкай, заўзятага рыбака і непераўзыдзенага выканаўцы камічных куплетаў, стала адной з самых любімых у гледачоў. Хоць, безумоўна, поспех забяспечыла ўсё трыа галоўных герояў: і Міхаіл Дзяржавін — Джордж, і Андрэй Міронаў, які сыграў у камедыі ажно шэсць роляў — ад аўтара, Джэрома Клапкі Джэрома, да карчмара і наведвальніка карчмы адначасова!

Дарэчы, праз шчыльны графік Андрэя Міронава, распісаны практычна на год наперад, усе натурныя здымкі ўдарнымі тэмпамі прайшлі за месяц. Узбярэжжа Тэмзы знялі ў Калінінградскай вобласці, а для масоўкі запрашалі не толькі ўсіх ахвотных месцічаў, але і саму здымачную групу — асістэнтаў, тэхнікаў, гукарэжысёраў, нават жонку і сына рэжысёра, якія прыехалі ў госці.

Калі істотна пахаладала, і сядзець на лодцы ў лёгкіх купальных касцюмах было ўжо, мякка кажучы, нясоладка, акцёры знайшлі выйсце: у некаторыя грэлкі, якія незаўважна падкладвалі пад пледы дзяжурныя вадалазы, налівалі зусім не кіпень, а каньяк ці літоўскую гарэлку. Але ніводнага разу ніхто не напіўся і здымак не сарваў.

Буйныя планы ў эпізодзе з сомам рабілі з бутафорскім паралонавым макетам, а калі ад многіх дубляў той патрапаўся, то карысталіся кавалкам звычайнага бервяна.

А вось вядомая сцэна жывой піраміды ў шлюзе — не шматлікія паўторы з дублёрамі, а экспромт акцёраў: Міронаў незаўважна паказытаў Дзяржавіна, той таргануўся, і ў выніку ўсе трое пападалі ў ваду...

Што да здымак павільённых, то пільныя гледачы ўжо ведаюць, што камін і паласатыя крэслы «Траіх у лодцы» тыя ж самыя, што ў «Шэрлаку Холмсе» — і не дзіва, бо абодва фільмы здымала студыя «Ленфільм», прычым у адзін год.

Ёсць у фільме і беларускі след — «ролю Тэмзы выканаў бацька-Нёман. Мілая Патрысія — актрыса Ірына Мазуркевіч — наша зямлячка, ураджэнка Мазыра. Дарэчы, у адрозненне ад масквічак Аліны Пакроўскай і Ларысы Галубкінай, яна адна насамрэч умела веславаць, а таму ў фільме толькі яе мы і бачым за гэтай справай.

...Пасля выхаду карціны крытыкі разрадзіліся хто халоднымі, а хто і гнеўнымі рэцэнзіямі: маўляў, ад арыгінальнай аповесці ў фільме не засталося нічога, нейкія пошлыя песенькі, капуснік і пародыя на англійскі гумар. Аднак публіка вырашыла інакш — тэлебачанне завалілі пісьмамі з просьбай паўтарыць фільм, і ў першы ж год яго паказалі некалькі разоў.

Сказана!

  • Мяркуючы па вашых крыважэрных позірках, сябры мае, вы яшчэ недастаткова растварыліся ў прыродзе...
  • Лабірынт не месца для спатканняў, гэта месца для вострых адчування
  •  — Вось патэльня. Чаму яна са струнамі? — Гэта вельмі модна.
  • Сэр, перастаньце мяне грызці!
  • Галодны, але цяжкі.
  • У сад, усе ў сад!
  • Ну, ты, чучала, не кранай чучала!
  • Гэта і ёсць камічныя куплеты...

Загаловак у газеце: «На Тэмзе туман!»

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.