Вы тут

Удзельнікі «Славянскага базару ў Віцебску» наведалі Палац Незалежнасці


Напярэдадні адкрыцця «Славянскага базару ў Віцебску» ўдзельнікаў Міжнароднага конкурсу выканаўцаў эстраднай песні чакаў прыемны сюрпрыз — паездка ў Мінск і экскурсія ў Палац Незалежнасці, дзеючую рабочую рэзідэнцыю Прэзідэнта Рэспублікі Беларусь, якая адчыняецца для наведвальнікаў толькі ў загадзя вызначаны тэрмін і ў адмысловых выпадках. Маладыя артысты з 18 краін свету ў адзін голас зазначалі, што ім вельмі прыемна адчуваць сябе пачэснымі гасцямі.


Юнакі і дзяўчаты з захапленнем слухалі аповед пра гісторыю будаўніцтва і аздаблення Палаца і плошчы Дзяржаўнага Сцяга, прымяраліся да крэслаў, дзе засядалі ўдзельнікі «нармандскай чацвёркі», замілоўваліся прыгажосцю зімовага саду і ўражваліся экспанатамі з музея падарункаў, рабілі мноства сэлфі. А яшчэ спявалі. Руская, казахская, англійская, грузінская, кітайская — песні на гэтых і іншых мовах гучалі ў залах і калідорах Палаца Незалежнасці ўперамежку са словамі захаплення і любові да Беларусі.

Прадстаўнік нашай краіны Ваня Зданюк, які зусім нядаўна, не выпадаючы з працоўнага рытму, адзначыў 20-годдзе, прызнаўся, што таксама трапіў на экскурсію ў Палац упершыню: «Што я адчуваю? Вялікую радасць і гонар, калі ўсе замежныя ўдзельнікі з блізкіх і далёкіх краін гавораць, як у нас прыгожа, захапляюцца майстэрствам беларускіх вытворцаў, якія абсталёўвалі і аздаблялі Палац Незалежнасці. Адчування канкурэнцыі паміж намі зусім няма, усе вясёлыя і лёгкія ў стасунках, у нас шмат агульных тэм для размоў. І хоць, безумоўна, прысутнічае хваляванне перад конкурсам, для мяне самае важнае — не проста выступіць як мага лепш і пайсці, а запомніцца слухачам, знайсці тых людзей, якія будуць ісці побач цягам усяго творчага шляху».

Прадстаўнік са Швейцарыі (гэтая краіна ўпершыню ўдзельнічае ў конкурсе «Славянскага базару»), які выступае пад творчым псеўданімам TH30, расказаў, што раней бачыў толькі адну рэзідэнцыю найвышэйшых дзяржаўных асоб — Букінгемскі палац. «Але я бачыў яго толькі звонку, а тут атрымаў унікальную магчымасць паглядзець знутры на месца, дзе сустракаюцца многія ўплывовыя палітыкі свету. Шмат белага колеру — гэта добра, дае адчуванне чысціні, прасторы і настройвае на пазітыўны лад», — зазначыў артыст.

«Мяне вельмі ўразілі маштаб і неверагодная прыгажосць Палаца. Асаблівую цеплыню выклікалі фотаздымкі з асабістага архіва вашага Прэзідэнта. А калі ўбачыла сярод афіцыйных фатаграфій здымак з Сі Цзіньпінам, адчула сябе як дома», — жартуе прадстаўніца Кітая Сыін Лі. Дарэчы, у роднай краіне яна глыбока вывучае кітайскую народную песню: Сыін Лі, даследчык тэорыі, выкладчык мастацка-выканаўчага факультэта Чунцынскага прафесійнага каледжа культуры і мастацтва, а таму на сцэне Летняга амфітэатра ў Віцебску пастараецца перадаць частку культуры і традыцый гэтай вялікай краіны.

Лаўрэат леташняга конкурсу маладых выканаўцаў «Моладзь — за Саюзную дзяржаву» Іван Дзятлаў з Расіі рассыпаецца ў кампліментах: «Калі я пачуў, як хутка быў узведзены Палац Незалежнасці, адразу не паверыў, настолькі карпатліва і якасна ўсё тут зроблена. Тут усё ўражвае, з аднаго боку, велічнасцю, а з другога, утульнасцю, асаблівай гасціннасцю». На просьбу выканаць урывак з песні, якая атаясамліваецца ў яго з Беларуссю, хлопец не задумваючыся спявае «Белавежскую пушчу».

Некалькі гадоў таму, у 2015-м, прадстаўнік Казахстана Дзімаш Кудайберген феерычна выйграў конкурс «Славянскага базару» і з таго часу заявіў пра сябе ці не на ўвесь свет. А сёлета яго зямляк, спявак Адзільхан Макін, кажа, што не адчувае цяжару адказнасці за пастаўленую творчую планку: «Мы з Дзімашам даўно і добра сябруем. І я, як наогул усе ў Казахстане, шчыра радуюся, калі пра майго сябра, майго брата гавораць у іншых краінах. Што да мяне, то ўсе хваляванні я пакіну на рэпетыцыях і за кулісамі, а на сцэне адчуваю сам і паспрабую перадаць слухачам сапраўдны драйв».

«Мы тут усе не сапернікі, мы сябры, — дадае Георгій Путкарадзэ з Грузіі, — таму ўсё, што я магу пажадаць сабе і іншым, — няхай усё будзе добра!»

Вікторыя ЦЕЛЯШУК

Выбар рэдакцыі

Здароўе

​Як абараніць сябе ад кардыялагічных праблем у халодны перыяд?

​Як абараніць сябе ад кардыялагічных праблем у халодны перыяд?

Менавіта зімой павялічваецца колькасць інфарктаў і павышаецца артэрыяльны ціск.

Культура

Успаміны пра Яўгенію Янішчыц

Успаміны пра Яўгенію Янішчыц

Піша Зіновій Прыгодзіч.

Грамадства

У 2023 годзе з'явяцца квоты на рабочыя месцы для людзей з інваліднасцю

У 2023 годзе з'явяцца квоты на рабочыя месцы для людзей з інваліднасцю

У Беларусі на сённяшні дзень звыш 570 тысяч чалавек маюць інваліднасць.

Грамадства

АЭС у Астраўцы гатова да імітацыі работы ядзернага рэактара

АЭС у Астраўцы гатова да імітацыі работы ядзернага рэактара

Першы энергаблок Беларускай АЭС гатовы на 95 %, другі — на 70 %.