Нагадаем, што ўрачыстае праходжанне войскаў Мінскага гарнізона каля стэлы «Мінск — горад-герой» пачнецца а 21-й гадзіне вечара 3 ліпеня. Завесу таямніцы над тым, што ж убачаць гледачы, прыадкрыў начальнік упраўлення інфармацыі — прэс-сакратар галоўнага ўпраўлення ідэалагічнай работы Міністэрства абароны Уладзімір Макараў:
— Сёлета парад пачнецца з пралёту авіяцыі ў небе над сталіцай. Людзі ўбачаць сучасныя баявыя самалёты і верталёты ваенна-паветраных сіл Беларусі і ваенна-касмічных войскаў Расіі. У парадным страі перад гледачамі пройдуць 25 пешых парадных разлікаў і 26 разлікаў тэхнікі. Скончыцца святочнае шэсце плац-парадам зводнай роты ганаровай варты Мінскай ваеннай камендатуры.
Усяго ў ваенным парадзе прыме ўдзел больш за 5 тысяч вайскоўцаў, а механізаваную калону складуць больш за 280 адзінак колавай і гусенічнай тэхнікі. Што да паветранага эшалона, то ў ім будзе задзейнічана каля 50 самалётаў і верталётаў. Тры сцягі — беларускі дзяржаўны, Узброеных Сіл і войскаў ВПС і ППА — панясуць верталёты Мі-8МТВ5. Праляціць звяно баявых верталётаў Мі-24, ад Расіі возьмуць удзел легендарныя Ка-52. У неба ўздымецца самалёт АН-26 у суправаджэнні двух знішчальнікаў МіГ-29. Будуць і бамбардзіроўшчыкі. Скончыцца ж паветраны парад пралётам самалёта Іл-76 у суправаджэнні пяці вучэбных самалётаў.
Мяркуецца, што ўдзел у парадзе возьмуць вайскоўцы з васьмі замежных дзяржаў. Ужо па традыцыі перад трыбунамі пройдуць ваеннаслужачыя Узброеных Сіл Расіі і Народна-вызваленчай арміі Кітая. Упершыню плануецца ўдзел сцягавых груп ад Узброеных Сіл Азербайджана, Арменіі, Казахстана, Кыргызстана, Таджыкістана, Узбекістана.
Шэсце ж пешай калоны ўжо па традыцыі адкрыюць сувораўцы. У парадным страі ўпершыню з'явяцца баявыя сцягі партызанскіх фарміраванняў часоў Вялікай Айчыннай вайны. Варта звярнуць увагу, што перад стартам аперацыі «Баграціён» на Беларусі дзейнічалі 148 брыгад і 53 асобныя атрады народных мсціўцаў.
Таксама перад трыбунамі пройдуць тры разлікі ваеннаслужачых-жанчын. Два з іх будуць ад Узброеных Сіл і адзін — ад МУС. Прычым летась на парадзе быў усяго адзін жаночы разлік.
Яшчэ адна асаблівасць парада — вялікая колькасць новай або глыбока мадэрнізаванай тэхнікі ў складзе механізаванай калоны. Яна складае прыкладна 70 працэнтаў. І ўжо па традыцыі на чале механізаванай калоны паедзе легендарны савецкі танк Т-34, які стаў сімвалам Вялікай Айчыннай вайны.
Валяр'ян ШКЛЕННІК
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
