Тры вуліцы, на якіх менш за сотню дамоў. Гэта Лагвошчы — вёсачка, якая знаходзіцца на поўдні Беларусі, у Жыткавіцкім раёне. Сёння насельніцтва тут — сотня чалавек з нечым. Вялікая частка — пенсіянеры. Кацярына Трафімовіч, стараста населенага пункта, ведае кожнага жыхара і, напэўна, кожную жывёлу. Былую паштальёнку на агульным сходзе некалі, пры аб'яднанні сельсаветаў, людзі абралі лідарам. Вось яна і выконвае свой грамадскі абавязак — са шчырасцю і любоўю. Менавіта гэта, а яшчэ досвед працы прызналі найлепшым на Гомельшчыне па леташніх выніках.
Да грамадскіх спраў, дарэчы, прыцягнута ўся сям'я. Нават конь Орлік, калі трэба, працуе не толькі на сваіх гаспадароў, але і на ўсю вёску. Муж Кацярыны Антонаўны Мікалай Фёдаравіч запрагае коніка, калі трэба каму з жыхароў падвезці дровы ці што зрабіць па гаспадарцы. Сорак тры гады сумеснага жыцця, а значыць, паразуменне з першага позірку і вырашэнне ўсіх праблем, у тым ліку грамадскіх, разам.
Сын цяпер у Мінску, дачка ў суседняй вёсцы, радуюць пяцёра ўнукаў і нават маленькая праўнучка. Але ж побач — тыя, у каго няма нікога, каму патрэбна дапамога ці проста добрае слова. Кацярына Антонаўна кажа, што такія цёплыя стасункі склаліся ў яе з людзьмі даўно. Яшчэ ў той час, калі працавала паштальёнкай:
— Я прарабіла на пошце 31 год. За гэты час, зразумела ж, з усімі добра перазнаёмілася. Мне кожны расказваў пра сваё гора, радасць і крыўду. І трэба было кожнага выслухаць, недзе суцешыць, недзе прамаўчаць.
Псіхолаг-аматар працавала ў якасці дэпутата сельсавета ў адным са скліканняў. І сёння паспявае спраўляцца і з асабістай гаспадаркай, і з клопатамі аднавяскоўцаў. Кажа, часта тэлефануюць самотныя людзі, каб выклікаць хуткую дапамогу, паправіць плот, просяць нешта растлумачыць, даць слушную параду. Усіх пытанняў, з якімі сутыкаецца стараста, не пералічыць. Бываюць і такія, якія наскокам не вырашыць:
— Летась на мясцовых могілках шматгадовыя хвоі атакаваў караед. Людзі пачалі мне тэлефанаваць. На першым агульным сходзе не ўсе былі гатовыя плаціць грошы, каб выклікаць прафесійных альпіністаў, якія выдалілі б хворыя дрэвы. Але ж, калі дрэвы пачалі падаць, зноў сабралі сход. Тады і пераканалі ўсіх у неабходнасці экстранных мер. Мы нават выступалі праз мясцовую прэсу. Урэшце атрымалася сабраць больш за 2,1 тысячы рублёў. Выразалі той страшны лес і навялі парадак. Людзі — усе, хто можа, — выходзілі на суботнікі. Павыграбалі смецце і галлё — цяпер чысціня і парадак.
Такім чынам выдалілі 60 пашкоджаных, самых небяспечных дрэў. Але ж, дадае Кацярына Антонаўна, засталося яшчэ што рабіць. Таму плануе восенню завершыць добраўпарадкаванне на могілках.
Захоўваюць у Лагвошчах памяць пра падзеі Вялікай Айчыннай вайны. Вёска цудам не паўтарыла лёс Хатыні. Мясцовых жыхароў карнікі ўжо загналі ў адрыну, аднак школьная настаўніца, якая ведала нямецкую мову, прадухіліла трагедыю. Цяпер імёны тых, хто загінулі ў баях за свабоду роднага краю, хто сталі ахвярамі фашызму, ушанавалі на гранітным помніку. Падтрыманне парадку вакол памятнага месца — клопат жыхароў. Згодна з мясцовай традыцыяй, тэрыторыю выкладаюць зялёнымі хваёвымі шышкамі.
— Нашы Лагвошчы ўздоўж рэчкі Случ, — знаёміць з населеным пунктам Кацярына Трафімовіч. — І возера Белае тут побач. Вельмі прыгожыя ў нас мясціны. Між тым і аўтадарога, і чыгунка блізка. Таму да нас шмат народу прыязджае адпачываць. Ягады, рыба — усё ў нас ёсць. Некалькі дамоў выкарыстоўваюцца толькі ў летні сезон. Дачнікі ў нас сумленныя: і смецце прыбіраюць, і тэрыторыю каля сядзібы абкошваюць, і кветкі высаджваюць.І мы ім дапамагаем пры неабходнасці. Нядаўна адна жанчына папрасіла павесіць ліхтар каля яе дома. Мы арганізавалі ёй асвятленне. Калі ў мяне ўзнікаюць нейкія праблемы, я заўсёды вырашаю іх разам з памочніцамі: Нінай Волчак, Валянцінай Цыганковай і Галінай Таболіч. Адказныя людзі. Увогуле ў нас у сельсавеце ўсе дружныя. Таму часта са складанымі пытаннямі звяртаюся да старшыні сельвыканкама Алены Шпакевіч. Алена Іванаўна ў нас — залаты чалавек. Відаць, таму ўсё разам і атрымліваецца добра.
Ірына АСТАШКЕВІЧ
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
