Прэзідэнт разгледзеў кадравыя пытанні

Прэзідэнт Беларусі Аляксандр Лукашэнка 11 чэрвеня разгледзеў кадравыя пытанні.

МУС будзе ўзначальваць Юрый Караеў, намеснік міністра ўнутраных спраў — камандуючы ўнутранымі войскамі.

Уладзімір Каранік, галоўны ўрач Мінскага гарадскога клінічнага анкалагічнага дыспансера, зменіць Валерыя Малашку.

Назначэнне на пасаду — намесніка Дзяржаўнага сакратара Савета Бяспекі — ў «кадравы» аўторак атрымаў Аляксандр Рахманаў.

Васіль Герасімаў стане першым намеснікам старшыні Камітэта дзяржаўнага кантролю. Яго былую пасаду (намесніка старшыні КДК) зойме Дзмітрый Баско.

На другі тэрмін паўнамоцтваў назначана член Праўлення Нацыянальнага банка Ілона Лядніцкая.

Таксама сёння Аляксандр Лукашэнка ўзгадніў на пасады старшынь Магілёўскага і Лёзнінскага райвыканкамаў адпаведна Алега Чыкіду і Сяргея Зямчонка, а на месца кіраўніка адміністрацыі Ленінскага раёна горада Магілёва — Аляксея Багайчука.

Памочнік Прэзідэнта - інспектар па Віцебскай вобласці Віталь Воўк вернецца ў сферу прамысловасці: ён узгоднены генеральным дырэктарам ААТ «Мінскі трактарны завод». На вакантную пасаду намесніка старшыні Магілёўскага аблвыканкама ўзгоднены Руслан Страхар, а членам Бресцкага аблвыканкама — Дзмітрый Гарадзецкі.

Прырода і надвор'е 

У першую чаргу Прэзідэнт разгледзеў назначэнне кіруючых кадраў мясцовых органаў улады: старшынь Лёзненскага (Сяргея Зямчонка), Магілёўскага (Алега Чыкіду) райвыканкамаў і кіраўніка адміністрацыі Ленінскага раёна Магілёва (Аляксея Багайчука). Асноўная парада кадрам: быць бліжэй да людзей. 

Новым кіраўнікам прыйдзецца вырашаць шматлікія пытанні сельскай гаспадаркі. «Мяне насцярожвае тая сітуацыя, якая складваецца — але яна неаднародная па краіне — у сувязі з кліматычнымі ўмовамі. Больш за ўсіх церпіць зараз цэнтр Беларусі. На ўсходзе хоць неяк, але праходзілі дажджы. Тэмпература больш-менш, я не скажу нармальная, але неяк можна трываць. Тут сітуацыя вельмі сур’ёзная», — сказаў Прэзідэнт.

Кіраўнік дзяржавы даў рэкамендацыі па аграрных пытаннях, каб не страціць пасеваў. Мінулы год быў неўраджайны, і амаль усе рэзервы зерня-фуража выкарыстаны. «Калі мы тое, што зараз расцім на зерне, прыбяром у сенаж, траншэю, трэба ўспаўняць чымсьці зерневую групу. І тут асаблівая надзея на кукурузу», — паведаміў кіраўнік дзяржавы.

На яго думку, сітуацыя ў Лёзненскім і Магілёўскім раёне з-за структуры глебаў не такая сур’ёзная, як у цэнтральных раёнах. 

Прэзідэнт адзначыў дрэнную працу Гідраметэацэнтра Беларусі, на дадзеныя якога арыентуюцца аграрыі: «З ім трэба нешта рабіць. Ці разганяць, ці прывесці ў пачуцці. У лепшым выпадку ў які-небудзь дзень на 50-70% апраўдвальнасць і дакладнасць прагнозаў». 

Зноў успомніў кіраўнік краіны пра слабыя гаспадаркі. Іх трэба «ўзяць на буксір» прадпрыемствам. «У раёне гэта адзін-два, дзесьці тры гаспадаркі ў адным раёне. Па вобласці набярэцца 20-30 гаспадарак. Іх трэба размеркаваць і падтрымаць. У Магілёўскім раёне яны больш-менш нармальныя і павінны выпаўзаць з гэтага, — канстатаваў беларускі лідар. — Таму для нас вельмі важна зараз падтрымаць сяло. У гэты вельмі складаны перыяд. Нам ні ў якім разе нельга дапусціць спаду ў сельскай гаспадарцы».

Арыентавацца ў гэтай сферы эканомікі трэба на новыя кірункі, напрыклад, авечкагадоўлю. У краіне ёсць пустуючыя тэрыторыі, на якіх можна трымаць гэтых непераборлівых жывёл. Раней ў рэспубліцы трымалі сотні тысяч авец. «Мне ўрад піша, проста агідна чытаць. Ладна, я б не разумеў у гэтым нічога. Можна было б адпіску гэту трываць. Да 2025 года яны дададуць 133% авец. То бок авечкагадоўля будзе ў нас. Мы будзем авец разводзіць — гэта шэрсць, аўчына, бараніна. Быццам на рынке запатрабавана. Карацей, будзем разводзіць гэтых авец. Дык што такое 133% да 2025 года? Гэта сёння адна авечка, заўтра будзе адна і тры дзясятыя авечкі. Ну што гэта за тэмпы?» — абурыўся Аляксандр Лукашэнка.

Прадукты авечкагадоўлі можна лёгка ўнядрыць у прамысловасць. З шэрсцю можа працаваць Камвольны камбінат, шматлікія прадпрыемствы лёгкай прамысловасці могуць пераапрацоўваць скуру. 

Недапушчальна, па меркаванні лідара краіны, перакідваць кармы з адной гаспадаркі ў другую па вясне: «Гэта ж падаражанне кармоў у два-тры разы. Каму гэта трэба. Таму трэба нарыхтаваць кармы для таго пагалоўя, дзе вы думаеце іх утрымліваць».

Аляксандр Лукашэнка яшчэ раз нагадаў новым кіраўнікам пра будучую выбарчую кампанію. «Калі ласка, забяспечце дастойнае правядзенне гэтых кампаній, каб камар носа не падтачыў. У нас для гэтага ёсць ўсё. Мы не ахці якія вялікія. І я разумею і вы разумееце, што народ ужо не памірае ад любові да нас. Але народ выдатна разумее, што дзеючая сёння ў Беларусі ўлада — гэта адзіная, унікальная з’ява не толькі на постсавецкай прасторы», — падкрэсліў Прэзідэнт.

Асабліва папярэдзіў ён новых назначэнцаў пазбягаць хамства ў адносінах да людзей. У прыклад лідар дзяржавы прывёў кіраўніка сваёй адміністрацыі Наталлю Качанаву, якая часта ездзіць вырашаць праблемы на месцы.

Прызначаючы на пасаду дырэктара МТЗ Віталя Воўка, кіраўнік краіны падкрэсліў, што завод — дзецішча Воўка яшчэ з часоў кіраўніцтва міністэрствам. «Дырэктар — гэта чалавек жорсткі. Ім павінны тэхналогіі кіраваць, — звярнуў увагу Аляксандр Лукашэнка. — МТЗ, Маз, БелАз загубіць не можам. Гэта стратэгічныя нашы прадпрыемтсвы. Там дзясяткі тысяч людзей працуюць. І потым, гэта наш гонар: як без машынабудавання? Не можа эканоміка развівацца без трактара і аўтамабіля».

На варце здароўя...

Прэзідэнт патлумачыў, чаму на пасаду міністра аховы здароўя быў назначаны кіраўнік бальніцы Уладзімір Каранік. «Вы павінны ўсе праблемы, якія вы ведаеце, а вы іх добра ведаеце, вынесці на верх і іх вырашаць. Другое, вы ведаеце, што адбылося ў Мінздраве за апошнія два гады. У мяне складваецца ўражанне, што гэта міністэрства не зусім эфектыўна кіруецца самім міністрам. Чалавек ён добры, талковы, вельмі выдатны спецыяліст, вопытны, — сказаў Аляксандр Лукашэнка. — Але не яго гэта праца, добры ўрач. Быццам бы на другіх ролях добра сябе зарэкамендаваў, а тут неяк не сарыентаваўся».

Прэзідэнт адзначыў, што новы міністр валявы, рашучы чалавек. Менавіта жорсткасць і парадак сёння неабходны медыцынскай сферы.

«Гэта ж ганьба, калі знізу да верху павязаны гэтым хабарам кіраўнікі ўстаноў і арганізацый, прытым добрыя кіраўнікі, якія зарэкамендавалі сябе як добрыя спецыялісты. Не будзем называць прозвішчы. Да сёння да мяне ходзяць, просяць: «Унікальны чалавек, адпусціце, ён будзе дняваць і начаваць ва ўстанове ахове здароўя. Даруйце, хабар, які браў, вярнуў у двайным памеры, трэба дараваць. А я сяджу і думаю, як дараваць? Бо папярэджваў усіх — карупцыя гэта не для Беларусі. Даравання не будзе нікому», — канстатаваў беларускі лідар.

Задачы для медыкаў-адміністратараў — вырашаць праблемы з абсталяваннем і не забываць пра імпартазамяшчэнне. Тое, што не зможам стварыць самі, дапушчальна і закупіць. 

...і закону

Рапарт аб адстаўцы Ігара Шуневіча быў нечаканым для многіх, але не для Прэзідэнта. «Знянацку, або проста нечакана не бывае, што міністр унутраных спраў нечакана прыйшоў, зышоў, нечакана Караева запрасілі, назначыў. Зразумела, што я як Прэзідэнт бачыў пэўныя тэндэнцыі ў кадравых змяненняў у сілавых структурах», — паведаміў кіраўнік дзяржавы. 

Прэзідэнт расказаў, што яшчэ наведваючы падраздзяленне пад камандаваннем Юрыя Караева, ён зразумеў, што гэты чалавек можа займаць больш высокую пасаду.

Як сказаў Прэзідэнт, Караева многія рэкамендавалі як больш ваеннага чалавека. «А вось у міліцыі гэта якраз зараз і трэба», — адзначыў Аляксандр Лукашэнка. 

Следчую працу вывелі ў асобнае ведамства, таму функцыі міліцыі крыху змяніліся. «Што ў міліцыі засталася? Фактычна кожны дзень баявая праца, што грамадскі парадак, што барацьба з бандзюганамі, крыміналістычны кірунак — крымінальная міліцыя, а што АМАП і ваенны складнік. Але скажам шчыра, міліцыю трэба крыху ўзварушыць у плане дысцыпліны. А для гэтага які трэба чалавек? Ваенны», — пазначыў беларускі лідар. 

Прэзідэнт паставіў задачу міністру не засіжвацца ў сталіцы, а наведваць раённыя, абласныя падраздзяленні, быць жорсткім, але вельмі паважаць людзей.

«Не трэба, як адбылося. Наталля Іванаўна (Качанава — Зв.) ездзіла разбіралася па маім даручэнні з цыганамі. Ну, пакрыўдзілі людзей не за што, дык трэба папрасіць прабачэння», — растлумачыў Аляксандр Лукашэнка.

Юрый Караеў рэкамендаваўся яшчэ на адну пасаду — Дзяржаўнага сакратара Савета Бяспекі, але выбіраючы, Прэзідэнт спыніўся на кадыдатуры Аляксандра Рахманава.

«Калі мне даклалі, што вы маглі бы працаваць на гэтай пасадзе, я, канечне, ніколькі не сумняваўся, зыходзячы з вашага вопыту. Тое, што вы ўжо прайшлі, дарослы чалавек, многае ўбачылі, пазналі, — акцэнтаваў увагу лідар дзяржавы. — Вы гэтую сістэму добра ведаеце, нават шырэй». 

У тэму

Пасля размовы з Прэзідэнтам новыя міністры акрэслілі будучыя прынцыпы свёй працы на пасадах.

Міністр аховы здароўя Уладзімір Каранік: «Галоўная задача сёння стаіць — забяспечыць якасную і даступную медыцынскую дапамогу. Гэта датычыцца як першаснага звяна, так і высокатэхналагічнай медыцынскай дапамогі. А для вырашэння гэтай задачы, тое што не раз акцэнтавался, наша задача — забяспечыць максімальна эфектыўнае выкарыстанне абсталявання, якое маем, і падтрыманне яго ў працаздольным стане, стварэнне максімальна адкрытай сістэмы дзяржаўных закупак, якая не дае ніякіх аснаванняў, магчымасцяў, каб цана выбірался не на прынцыпах канкурэнтнасці і мінімальнай цаны пры прымальнай якасці». 

«Задача пастаўлена — узмацненне дысцыпліны і справядлівыя адносіны да ўсіх груп людзей. Усе нашы людзі пад аховай закона, — сказаў міністр унутраных спраў Юрый Караеў. — Канечне, ва ўсіх краінах свету, ва ўсе часы ў праваахоўныя органы звяртаюцца па абарону і спадзяюцца яе атрымаць, для таго і патрэбны яны, каб дапамагаць людзям. Мы служым для людзей».

Марыя Дадалка

Фота БЕЛТА