Вы тут

У Гомелі распачата будаўніцтва новага праваслаўнага храма


У Гомелі распачата будаўніцтва храма ў гонар свяціцеля Іаана Шанхайскага і Сан-Францыскага, і свяшчэннапакутніка Іаана, епіскапа Рыльскага. Камень і памятную капсулу ў яго падмурак заклаў Мітрапаліт Мінскі і Заслаўскі Павел, Патрыяршы Экзарх усяе Беларусі. Дарэчы, дзеянне носіць глыбокі сакральны сэнс: у праваслаўнай традыцыі закладны камень сімвалізуе самога Ісуса Хрыста.


Гэта першы храм у Беларусі, прысвечаны святым, якія жылі ў няпростым для праваслаўнай царквы ХХ стагоддзі. Будучы храм з'явіцца на вуліцы Якубава. Цяпер там, у прыстасаваным памяшканні былога дзіцячага садка, размяшчаецца царква ў гонар іконы Божай Маці «Усіх тужлівых Радасць». На працягу васямнаццаці гадоў тут дзейнічае духоўна-асветніцкі цэнтр, у якім не толькі праходзяць праваслаўныя набажэнствы, але і дзейнічаюць біблейска-багаслоўскія курсы, праходзяць заняткі нядзельнай школы і фотаклуба, выдаецца тэматычны часопіс.

Будаўніцтва новага храма ініцыяваў архіепіскап Гомельскі і Жлобінскі Сцяфан. Цяпер ужо пабудавана цокальная частка храма. Па словах настаяцеля храма, протаіерэя Вадзіма Качана, зрабіць свой унёсак у будаўніцтва можа любы ахвотны:

— Імя ахвярадаўцы наносіцца на цэглу, якая потым будзе закладзена ў сцены храма. Між тым частка мошчаў свяціцеля Іаана Шанхайскага і Сан-Францыскага з'явілася на прыходзе яшчэ за некалькі год да таго, як было распачата будаўніцтва. Прыхаджане царквы ў гонар іконы Божай Маці «Усіх тужлівых Радасць» пераехалі жыць у Амерыку. Яны паспрыялі таму, што ў 2010 годзе ў Гомель перадалі частку мошчаў свяціцеля.

Дарэчы, мітрапаліт Мінскі і Заслаўскі Павел восем гадоў нёс царкоўны послух у Амерыцы. Ён узгадаў, як складана ў 1992 годзе было трапіць да мошчаў свяціцеля Іаана:

— У першы год, калі я прыехаў у Сан-Францыска, свяціцель Іаан Шанхайскі толькі нядаўна быў услаўлены і знойдзены яго мошчы. Яны знаходзіліся ў кафедральным саборы. Але ў той час у нас былі вельмі складаныя ўзаемаадносіны з замежнай праваслаўнай Царквой, — мы не мелі афіцыйных стасункаў, і нас нікуды не пускалі. Я вельмі хацеў падысці да мошчаў свяціцеля Іаана, але мяне папярэдзілі, што гэта будзе вельмі складана. Мы прыехалі, і нечакана для нас былі адкрытыя вароты ў храм. Мы падышлі і прыклаліся да мошчаў. У маёй памяці дагэтуль захоўваецца тая сустрэча са свяціцелем Іаанам. З часам Бог так уладкаваў, што цярпеннем, пакорай нашага народа, шчырай верай людзей мы прымірыліся з той часткай, якая доўгі час была адрынута ад нашай Царквы. Сёння мы разам, і радасць вялікая, таму што пераадолены такі вялікі падзел. Свяціцель Іаан Сан-Францыскі шчыра ўсіх заклікаў мець стасункі, шчыра маліўся пра аб'яднанне Царквы. Таму і мы павінны набірацца цярпення, шчырай веры ў сэрцы, пераадольваць варожасць і нянавісць, мець сапраўдную хрысціянскую любоў. Тады і Хрыстос будзе з намі. Калі будзе аднадумства, згода, малітва ды любоў хрысціянская — і храм гэты пабудуем, і ў сэрца кожнага чалавека Бог дапаможа пакласці падмурак царства Божага ўнутры нас.

Ірына АСТАШКЕВІЧ, фота аўтара

Выбар рэдакцыі

Грамадства

Як пенсіянерка з Гомеля купіла набор каструль па цане патрыманай іншамаркі

Як пенсіянерка з Гомеля купіла набор каструль па цане патрыманай іншамаркі

Усё, як у казцы: прыгожая зала, музыка, пачастункі. Абаяльныя людзі распавядаюць аб правільным харчаванні і рэкламуюць свой тавар...

Грамадства

714 тысяч тон адходаў для перапрацоўкі сабралі летась беларусы

714 тысяч тон адходаў для перапрацоўкі сабралі летась беларусы

Гэта адходы шкла, паперы, пластыку, шын, батарэек, машыннага масла...

Грамадства

​Дзе прызначалі спатканні ў даваенным Мінску?

​Дзе прызначалі спатканні ў даваенным Мінску?

Атрымаць падказкі вам дапаможа экскурсія «Рамантыка мінскіх дворыкаў».