Вы тут

Кожны кулік Тураўскі фестываль хваліць


Старажытны беларускі горад прымаў птушынае свята ў восьмы раз.

У Тураве прайшоў фестываль кулікоў. Мерапрыемства было зладжана грамадскай арганізацыяй «Ахова птушак Бацькаўшчыны» пры падтрымцы Тураўскага гарадскога выканаўчага камітэту. Як і заўсёды, местачкоўцаў і гасцей чакала насычаная праграма.


Раніцай у суботу ўсе ахвотныя ўзброіліся фотаапаратамі і адправіліся здымаць птушак на Тураўскае балонне. Самых уважлівых і ўдачлівых чакала званне пераможцы чэмпіянату па фотабёрдынгу «Фокус на кулікоў», які прайшоў у рамках фестывалю ўпершыню. Задача фодабёрдара — сфатаграфаваць і вызначыць як мага больш відаў птушак за абмежаваны час. А паздымаць сапраўды было каго: Тураўскае балонне — адно з самых важных у Беларусі месцаў гнездавання і міграцыйных прыпынкаў многіх прадстаўнікоў птушынага свету. Тут водзіцца больш за 50 відаў кулікоў, чаек ды іншых крылатых.

Тыя ж, у каго не атрымалася абудзіць свой спаборніцкі дух, маглі проста паўдзельнічаць у экскурсіях па горадзе, наведаць станцыю кальцавання ці паназіраць за птушкамі балоння разам з арнітолагамі. Гэтым разам з усіх відаў «галоўных герояў» фестывалю часцей за іншых у падзорную трубу трапляліся вялікія грыцукі, кулікі-случкі і кнігаўкі. Апошнія нават вадзілі за сабой дзетак, чым выклікалі ўсплёск замілавання ў назіральнікаў. Засяроджана лавілі рыбу шэрая і вялікая белая чаплі, павольна кружылі над лугам у пошуках здабычы арланы-белахвосты, нават птушка 2019-га года — вялікі арлец — адзін раз паказалася аматарам прыроды.

Дзеці маглі паўдзельнічаць у вясёлых спаборніцтвах і пазапускаць паветраных змеяў, кожны ахвочы мог змайстраваць кулічкоў на майстар-класах, што ладзiлicя сумесна з праектам ПРААН-ГЭФ «Ветландс» жанчынамi, якiя натхняюцца аховай прыроды.

Пры падтрымцы Цэнтра экалагічных рашэнняў і праекта ПРААН-ГЭФ «Ветландс» таксама праходзіла фотавыстава «Прырода беларускі» («She is nature»), якая была прысвечана жанчынам, што зрабілі значны ўнёсак у ахову навакольнага асяроддзя і дасюль займаюцца прыродаахоўчай дзейнасцю ў розных сферах.

Упершыню падчас фестывалю на Тураўскім лузе быў адкрыты кемпінг. Толькі ўявіце сабе: ружовы захад сонца, бераг Прыпяці, птушынае шматгалоссе, пасядзелкі ля вогнішча пад шчырыя вершы паэткі Насты Кудасавай і беларускія песні ў выкананні кіраўніка праекту «Спеўны сход» Сяржука Доўгушава... Дзеля справядлівасці заўважым, што праз пэўны час спявалі і вадзілі карагоды ўсе прысутныя: узнёслая атмасфера вечара на ўлонні прыроды захапіла кожнага.

А яшчэ ў дні фестывалю можна было запусціць паветранага змея на Замкавай гары, змайстраваць уласнага кулічка з гліны ці воўны падчас майстар-класаў, адправіць паштоўку «птушынай поштай» з прывітаннем ад «жыхароў» Тураўскага лугу, сфатаграфавацца ў «шпакоўні» ці ва ўтульным «гняздзечку» ў адмысловай фотазоне. Цэнтр экалагічных рашэнняў прывёз у Тураў не толькі практычную лекцыю пра паасобны збор смецця, але і фотавыставу «Прырода беларускі («She is nature») — праект, прысвечаны жанчынам, якія зрабілі значны ўнёсак у ахову навакольнага асяроддзя.

  • Завяршыўся фестываль канцэртам беларускіх гуртоў «РЭХА» і «АKUTE».

Як трапна адзначыў дырэктар арганізацыі «Ахова птушак Бацькаўшчыны» Аляксандр Вінчэўскі, Тураў — месца, дзе мусіць пабываць кожны беларус. Больш чым тысячагадовая гістарычная спадчына, унікальныя прыродныя тэрыторыі — гораду сапраўды ёсць чым ганарыцца. Таму — да сустрэчы на наступным фестывалі!

Алена КАРПЕНКА

Фота Юрыя СТРУКАВА

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.