Беларусь будзе настойваць на кампенсацыі з-за няякаснай нафты з РФ

Лукашэнка паведаміў журналістам, што Беларусь назаве суму шкоды ад паступлення забруджанай нафты ў нафтаправод «Дружба» пасля рэвізіі нафтаперапрацоўчых заводаў — мы пра гэта пісалі яшчэ 11 мая. Што ж адбылося ў апошні час па гэтай тэме?

14 мая ААТ «Нафтан» пачало прэтэнзійную працу ў дачыненні да расійскіх пастаўшчыкоў нафты, якія не выканалі сваіх абавязацельстваў за красавік. Намеснік генеральнага дырэктара па вытворчасці прадпрыемства Сяргей Алтухоў расказаў, што юрыдычная служба прадпрыемства арганізавала працу па выстаўленні штрафных санкцый у дачыненні да расійскіх пастаўшчыкоў за недапастаўкі якаснай нафты ў той месяц.

Пазней стала вядома інфармацыя са справаздачы за май Міжнароднага энергетычнага агенцтва: там сказана, што адным з наступстваў забруджвання трубаправода «Дружба» хлорарганікай можа стаць страта даверу пакупнікоў і пошук з іх боку новых пастаўшчыкоў.

16 мая Беларусь і Расія стварылі працоўную групу па ацэнцы страт ад забруджанай нафты. Віцэ-прэм'ер РФ Дзмітрый Козак па выніках сустрэчы з беларускім калегам Ігарам Ляшэнкам расказаў, што туды ўвойдуць прадстаўнікі «Белнафтахіма» і Мінэнерга Расіі.

Ён удакладніў, што ацэнкі памеру шкоды ад забруджвання нафты ў экспартным трубаправодзе «Дружба» могуць з'явіцца праз тры-чатыры тыдні.

Намеснік прэм'ер-міністра Беларусі Ігар Ляшэнка ўчора зноў паўтарыў, што Беларусь будзе настойваць на кампенсацыі з-за няякаснай нафты з РФ — аднак не толькі прамых, але і ўскосных страт.

Таксама віцэ-прэм'ер расказаў, што беларускі бок праінфармавалі пра магчымасць аднаўлення паставак нафты па трубаправодзе «Дружба» ў напрамку Польшчы на наступным тыдні. Было сказана, што аб'ём тэхнічных і дамоўных мерапрыемстваў, які рэалізуецца са спажыўцамі краін Заходняй Еўропы, як запэўніў расійскі бок, дазволіць у сямідзённы тэрмін запусціць адну нітку нафтаправода на Адамава. Што датычыцца аднаўлення працоўнага стану трубаправода «Дружба», канкрэтны тэрмін не быў названы.

Дарэчы, на наступным тыдні ўжо прэм'ер-міністры Расіі і Беларусі сустрэнуцца для абмеркавання сітуацыі.

Учора журналістам паведамілі, што «Белнафтахім» працягвае абмеркаванне ў Маскве сітуацыі з пастаўкамі расійскай нафты. Выпрацоўваецца новы вытворчы графік замены рэсурсамі «Транснафты» наяўнай у трубаправодзе нафты з павышанай хлорарганікай на чыстую для далейшага транзіту па ўсіх еўрапейскіх напрамках «Дружбы», а таксама ў напрамку ААТ «Нафтан».

Таксама ў канцэрне адзначылі, што нафты, якая пастаўляецца па ветцы Сургут — Полацк, недастаткова для поўнай загрузкі «Нафтана».

Паводле БелТА