Што адбылося за тыдзень у Савеце Рэспублікі

Беларусь гатова дзяліцца з Латвіяй досведам па дасягненні Мэт устойлівага развіцця

Па выніках мінулага года Латвія заняла 14-е месца па тавараабароце і 10-е месца па экспарце сярод краін, з якімі Беларусь ажыццяўляе знешнегандлёвыя аперацыі. У адносінах паміж дзяржавамі вядучую ролю адыгрывае давер, упэўнена намеснік старшыні Савета Рэспублікі Мар'яна ШЧОТКІНА. Дзякуючы наладжанаму міжпарламенцкаму дыялогу Беларусь і Латвія вырашаюць пытанні ў тым ліку на ўзроўні профільных камісій, міністэрстваў, рэгіёнаў, адзначыла віцэ-спікер падчас сустрэчы з дэпутатамі Сейма Латвіі.

У 2017 годзе парламентарыі абмяркоўвалі пытанні супрацоўніцтва падчас сумеснага чэмпіянату свету па хакеі ў 2021 годзе. Узаемадзеянне ў турызме, у тым ліку медыцынскім, лагістыцы, навуцы, адукацыі, харчовай прамысловасці, дрэваапрацоўцы і сельскай гаспадарцы ўвайшло ў план мерапрыемстваў урадаў дзвюх краін на сярэднетэрміновую перспектыву.

Беларусь у асноўным экспартуе суседцы прадукцыю лясной і дрэваапрацоўчай прамысловасці, нафтапрадукты, нафтахімію, металавырабы, угнаенні, будаўнічыя матэрыялы, спіртныя напоі. Летась экспарт дасягнуў 485,6 мільёна долараў ЗША, што склала 138,8 % да ўзроўню 2017 года. У Беларусі працуе 585 прадпрыемстваў з удзелам латвійскага капіталу. Інвестары з Еўрапейскага саюза, зацікаўленыя ў рэалізацыі праектаў у сферы гандлю, паслуг, дрэваапрацоўкі, фармацэўтыкі.

Не менш важнай за эканамічныя і палітычныя адносіны Мар'яна Шчоткіна лічыць экалогію: трансгранічныя водныя рэсурсы і іх захаванне, укараненне зялёнай эканомікі на тэрыторыі Латвіі.

Як адзначыў старшыня камісіі Сейма па доўгатэрміновым развіцці Вячаслаў ДАМБРОЎСКІС, Латвіі ёсць чаму павучыцца ў Беларусі. У прыватнасці, дэпутаты наведалі Парк высокіх тэхналогій і Кітайска-беларускі індустрыяльны парк. Засталіся ўражаныя хуткасцю будаўніцтва, бо некалькі гадоў таму на месцы «Вялікага каменя» былі толькі лугі і лясы.

Вячаслаў Дамброўскіс паведаміў, што Латвія зацікаўлена ў досведзе Беларусі ў развіцці адносін з Кітаем, а таксама галіны інфармацыйных тэхналогій.

«Мы бачым магчымасці для супрацоўніцтва. Улічваючы, што ў Беларусі няма выхаду да мора, можам прапанаваць вельмі выгадныя ўмовы карыстання портамі. Акрамя таго, Латвія можа даць сабраным на яе тэрыторыі таварам статус «Зроблена ў Еўрапейскім саюзе», — падкрэсліў Вячаслаў Дамброўскіс.

Варвара МАРОЗАВА

Транзітны патэнцыял...

...і мадэрнізацыя транспартнай інфраструктуры Саюзнай дзяржавы — стануць адной з тэм VІ Форуму рэгіёнаў Беларусі і Расіі

У Савеце Рэспублікі пад кіраўніцтвам старшыні Пастаяннай камісіі па рэгіянальнай палітыцы і мясцовым самакіраванні Аляксандра Папкова адбылася нарада па падрыхтоўцы пытання «Аб развіцці транзітнага патэнцыялу і мадэрнізацыі транспартнай інфраструктуры Саюзнай дзяржавы» да разгляду на пасяджэнні Міжпарламенцкай камісіі Савета Рэспублікі Нацыянальнага сходу Рэспублікі Беларусь і Савета Федэрацыі Федэральнага Сходу Расійскай Федэрацыі па міжрэгіянальным супрацоўніцтве. Плануецца, што пасяджэнне пройдзе ў ліпені ў Санкт-Пецярбургу ў рамках VІ Форуму рэгіёнаў Беларусі і Расіі.

Падчас нарады абмяркоўваліся перспектыўныя напрамкі супрацоўніцтва Беларусі і Расіі ў рамках Саюзнай дзяржавы, а таксама дасягнута дамоўленасць прапрацаваць магчымасць правядзення ў чэрвені на базе Беларускага дзяржаўнага ўніверсітэта транспарту, што ў Гомелі, беларуска-расійскай навукова-практычнай канферэнцыі па пытаннях развіцця транзітнага патэнцыялу і мадэрнізацыі транспартнай інфраструктуры Саюзнай дзяржавы.