Вы тут

Штотыднёвы спартыўны агляд «Звязды»


У традыцыйным штотыднёвым аглядзе «Звязды» расказваем пра найбольш цікавыя спартыўныя падзеі выхадных.


1. Яўген Каралёк стаў пераможцам Кубка Мінска па веласпорце. Адзначым, што ў 2017 годзе ён таксама перамагаў у сталіцы, але ў гонцы «Гран-пры Мінска». Другое месца ў Кубку Мінска заняў Анур Балкан (Турцыя), бронзавым прызёрам стаў Максім Піскуноў з расійскай каманды «Марафон-Тула». Прыз самага актыўнага гоншчыка атрымаў Сяргей Папок з велагрупы «Мінск», а ў камандным заліку перамагла нацыянальная зборная Беларусі. Усяго ў гонцы прынялі ўдзел 148 атлетаў з 27 камандаў.

Веласіпедны тыдзень у Мінску працягнуўся ў нядзелю турнірам «Гран-пры Мінска», гонка прайшла па такім жа маршруце, як пройдзе заезд шашэйнікаў падчас ІІ Еўрапейскіх гульняў. Пераможцам стаў прадстаўнік зборнай Эстоніі Норман Вахтра, ён упэўнена правёў другую частку заезду і фінішаваў у адзіноце. Сярэбраным прызёрам стаў яго суайчыннік Марцін Лаас. Трэцяе месца ў Георгіаса Бугласа з кітайскай NСL. Найлепшым з беларусаў стаў Мікалай Шумаў з велагрупы «Мінск».

2. Беларускія атлеты заваявалі чатыры ўзнагароды на першым этапе Кубка свету па акадэмічным веславанні ў балгарскім Плоўдзіве. Залаты медаль у класе легкавесных лодак (неалімпійскі клас) заваявала Алена Фурман. Таццяна Клімовіч і Крысціна Стараселец выйгралі «серабро» ў класе лодак двойка парная. У фінале беларускі дуэт саступіў кітаянкам Лю Шы Ю і Вань Ю Вэй тры з паловай секунды. У класе лодак-адзіночак сярод мужчын другое месца заняў беларус Піліп Павукоў. У фінале ў жанчын шосты вынік у гэтай дысцыпліне паказала вядомая беларуская вяслярка Кацярына Карстэн, якая адстала ад пераможцы Лізы Шэеноард з Нідэрландаў больш чым на 32 секунды. Бронзавы медаль у двойцы парнай заваявалі беларусы Станіслаў Шчарбачэня і Дзяніс Мігаль.

3. Баксёр Дзмітрый Асанаў (вагавая катэгорыя 60 кг) заваяваў залатую ўзнагароду прэстыжнага турніру — Кубак губернатара Санкт-Пецярбурга. Беларус у фінальным паядынку баксіраваў супраць кубінскага спартсмена трохразовага чэмпіёна свету Лазара Альварэса Эстрады.

Кубак губернатара Санкт-Пецярбурга па боксе праводзіцца з 2009 года і сабраў сёлета прадстаўнікоў 15 краін.

4. Лёгкаатлеты Марына Арзамасава і Аляксандр Васілеўскі занялі пятае месца ў забегу 2х2х400 м на чэмпіянаце свету ў эстафетах, які праходзіць у Іакагаме (Японія). Дуэт паказаў вынік 3 хв. 51,64 сек. Адзначым, што для Марыны Арзамасавай гэты старт быў неабходны як этап падрыхтоўкі да буйных міжнародных турніраў у летнім сезоне. Першае месца занялі спрынтары з ЗША — 3 хв. 36,92 сек. Другое месца занялі атлеты з Аўстраліі, а замкнулі тройку прызёраў японцы.

Чэмпіянат свету па бегавых эстафетах праводзіцца чацвёрты раз. Найбольш удала беларусы выступілі там у 2017 годзе ў эстафеце 4х800 м, заняўшы другое месца.

5. Беларускія дзюдаісты Аляксандр Вахавяк (вагавая катэгорыя — звыш 100 кг) і Марына Слуцкая (звыш 78 кг) занялі пятыя месцы на прэстыжным турніры серыі «Вялікага шлема» ў Баку (Азербайджан). Удзел у спаборніцтвах прыняло больш за 430 спартсменаў з 57 краін.

Дар'я Лабажэвіч

Загаловак у газеце: Па дарогах вялікіх Гульняў

Выбар рэдакцыі

Грамадства

Запусцілі найноўшы спецыялiзаваны комплекс для падрыхтоўкi судовых экспертаў

Запусцілі найноўшы спецыялiзаваны комплекс для падрыхтоўкi судовых экспертаў

Дзяржаўнаму камiтэту судовых экспертыз споўнiлася сем гадоў.

Грамадства

Як захаваць сэрца i сасуды здаровымi

Як захаваць сэрца i сасуды здаровымi

Адным з самых распаўсюджаных захворванняў у свеце з'яўляецца артэрыяльная гiпертэнзiя.

Грамадства

Валанцёр праекта «Дапамога бяздомным»: Цяпло i падтрымка нават праз ежу перадаюцца

Валанцёр праекта «Дапамога бяздомным»: Цяпло i падтрымка нават праз ежу перадаюцца

Яны кормяць гарачымi абедамi больш за сто чалавек, якiя апынулiся на абочыне жыцця.

Грамадства

Чаму трэба праводзiць цеплавую мадэрнiзацыю?

Чаму трэба праводзiць цеплавую мадэрнiзацыю?

У распараджэннi, падпiсаным на мiнулым тыднi кiраўнiком дзяржавы, ёсць пункт, якi датычыцца капрамонту жыллёвага фонду.