Вы тут

Як дзяржава дапамагае ветэранам


Ветэраны і ўдзельнікі вайны маюць права на розныя льготы ў сферы аховы здароўя, у жыллёвай сферы, на бясплатны праезд на гарадскім транспарце і некаторыя іншыя.


Ветэран Вялікай Айчыннай вайны Валянціна Цімафееўна Дзмітрыева. Фота БЕЛТА

Якія пенсіі атрымліваюць ветэраны?

Ветэраны Вялікай Айчыннай вайны ў нашай краіне маюць асаблівы статус, згодна з якім да іх пенсій выплачваюцца павышэнні ў памеры ад 50 да 500 % мінімальнага памеру пенсіі па ўзросце (памер мінімальнай пенсіі па ўзросце (МПУ) у маі гэтага года склаў 56,01 руб.).

У прыватнасці, Героям Савецкага Саюза даплачваюць 500 % МПУ; інвалідам вайны І і ІІ групы — 400 % МПУ; інвалідам вайны ІІІ групы, удзельнікам вайны — 250 % МПУ; «блакаднікам» Ленінграда — 100 % МПУ; узнагароджаным работнікам тылу — 50 % МПУ; былым вязням фашызму — 100 % МПУ.

Што датычыцца інвалідаў з дзяцінства ў выніку ранення, кантузіі або калецтва, звязаных з баявымі дзеяннямі ў перыяд Вялікай Айчыннай вайны або з іх наступствамі, — то ім даплачваюць 50 % МПУ; удовам загінулых у гады Вялікай Айчыннай вайны ваеннаслужачых, партызанаў і падпольшчыкаў — 180 % МПУ; дзецям-інвалідам з дзяцінства загінулых ваеннаслужачых, партызанаў і падпольшчыкаў — 100 % МПУ.

У цэлым, як заявіў журналістам на прэс-канферэнцыі намеснік міністра працы і сацыяльнай абароны Аляксандр Румак, з улікам устаноўленых павышэнняў і даплат памер пенсіі ветэранаў Вялікай Айчыннай вайны ў маі гэтага года складзе прыкладна ад 530 да 800 рублёў. Пры гэтым сярэдні памер пенсіі па ўзросце ў маі будзе раўняцца, па ацэнцы, 418,4 рубля.

Пра сацыяльнае абслугоўванне

Ветэраны вайны і грамадзяне, якія пацярпелі ад наступстваў вайны, ахоплены рознымі відамі сацыяльнага абслугоўвання. Так, сацыяльнае абслугоўванне дома атрымліваюць больш за 2,6 тысячы чалавек — больш за 1 тысячу ветэранаў вайны і 1,6 тысячы грамадзян, якія пацярпелі ад наступстваў вайны. Паслугі сядзелкі аказваюцца 76 ветэранам вайны і 43 грамадзянам, якія пацярпелі ад наступстваў вайны.

У аддзяленнях кругласутачнага знаходжання атрымліваюць неабходны догляд 23 і 48 чалавек адпаведна, пражываюць у дамах-інтэрнатах — 71 і 145 чалавек, у Рэспубліканскім інтэрнаце ветэранаў вайны — 39 ветэранаў і 7 чалавек, якія пацярпелі ад наступстваў вайны.

У І квартале гэтага года традыцыйна былі абследаваны ўмовы жыцця каля 23 тысяч чалавек. У красавіку праводзілася работа па задавальненні заявак, якія паступілі. Як заявіў Аляксандр Румак, стаіць задача да 9 мая задаволіць усе заяўкі, за выключэннем тых, дзе патрабуецца рамонт вялікага аб'ёму. «Напрыклад, замена даху запатрабуе часу, — удакладніў Аляксандр Румак. — Усе астатнія пытанні будуць вырашаны да 9 мая».

Акрамя таго, па словах намесніка міністра, за кожным ветэранам замацаваны не толькі сацыяльны работнік, але і прадпрыемства або навучальная ўстанова — для аказання шэфскай дапамогі.

Дзяржаўныя сацыяльныя льготы ветэранам

Міністэрства працы і сацыяльнай абароны нагадвае, што ветэранам Вялікай Айчыннай вайны даюцца розныя сацыяльныя льготы.

У сферы аховы здароўя:

— бясплатнае забеспячэнне лекамі, якія выдаюцца па рэцэптах урачоў у межах пераліку асноўных лекавых сродкаў;

— бясплатны выраб і рамонт зубных пратэзаў у дзяржаўных арганізацыях аховы здароўя па месцы жыхарства;

— бясплатнае забеспячэнне тэхнічнымі сродкамі сацыяльнай рэабілітацыі;

— першачарговае бясплатнае санаторна-курортнае лячэнне (пры наяўнасці медыцынскіх паказанняў і адсутнасці медыцынскіх супрацьпаказанняў), або аздараўленне (пры адсутнасці медыцынскіх супрацьпаказанняў), або атрыманне грашовай дапамогі на аздараўленне ў памеры 10 базавых велічынь — у выпадку, калі правам на бясплатную санаторна-курортную пуцёўку не скарысталіся Героі Савецкага Саюза, інваліды і ўдзельнікі Вялікай Айчыннай вайны.

Па праездзе на транспарце:

— бясплатны праезд на ўсіх відах гарадскога пасажырскага транспарту;

— бясплатны праезд у прыгарадным чыгуначным, водным і аўтамабільным пасажырскім транспарце;

— бясплатны праезд (па талонах, што выдаюцца адпаведнымі органамі) адзін раз на год у пасажырскіх цягніках ці вагонах фарміравання Беларускай чыгункі ва ўнутрырэспубліканскіх зносінах або з 50-працэнтнай зніжкай ад кошту праезду адзін раз на год на ўнутраных лініях воднага, паветранага або аўтамабільнага пасажырскага транспарту агульнага карыстання рэгулярных міжгародніх зносін — удзельнікам і інвалідам Вялікай Айчыннай вайны.

У адпаведнасці з пагадненнем кіраўнікоў урадаў дзяржаў — удзельніц СНД аб узаемным прызнанні правоў на льготны праезд для інвалідаў і ўдзельнікаў Вялікай Айчыннай вайны, а таксама асоб, прыроўненых да іх, нададзена права:

— на бясплатны праезд па тэрыторыі СНД адзін раз на год на чыгуначным, рачным транспарце і 50-працэнтную зніжку на праезд паветраным і міжгароднім аўтамабільным транспартам — інвалідам Вялікай Айчыннай вайны І і ІІ груп;

— на 50-працэнтную зніжку адзін раз на год на праезд па тэрыторыі СНД чыгуначным, рачным, міжгароднім аўтамабільным транспартам або адзін раз на два гады бясплатна — інвалідам Вялікай Айчыннай вайны ІІІ групы, удзельнікам Вялікай Айчыннай вайны.

У жыллёвай сферы:

— ветэранам нададзена права на 50-працэнтную зніжку па плаце за тэхнічнае абслугоўванне, карыстанне жылымі памяшканнямі, тэхнічнае абслугоўванне ліфта і камунальныя паслугі; за карыстанне кватэрным тэлефонам;

— на атрыманне жылых памяшканняў сацыяльнага карыстання дзяржаўнага жыллёвага фонду — ветэранам Вялікай Айчыннай вайны, якія стаяць на ўліку для паляпшэння жыллёвых умоў.

Святлана Бусько

Загаловак у газеце: З клопатам і павагай

Выбар рэдакцыі

Эканоміка

Як абараняцца ад рыэлтараў, якія не хочуць працаваць па законе

Як абараняцца ад рыэлтараў, якія не хочуць працаваць па законе

Лiцэнзiя агенцтва «Гатовыя рашэннi» скасавана, «Iмперыi нерухомасцi» — прыпынена, а «Тваёй сталiцы» выпiсана прадпiсанне.

Палітыка

Аляксандр Лукашэнка: Гэта адна з самых складаных выбарчых кампаній

Аляксандр Лукашэнка: Гэта адна з самых складаных выбарчых кампаній

Кіраўнік дзяржавы прагаласаваў на выбарах Прэзідэнта.

Грамадства

Медыцынскі агляд у віцебскіх газавікоў ажыццяўляе... робат

Медыцынскі агляд у віцебскіх газавікоў ажыццяўляе... робат

А наведвальнiкаў крамы кансультуе выява спецыялiста.