Mark Formelle стварыла калекцыю з рэдкімі жывёламі і раслінамі

Кампанія сумесна з беларускімі мастакамі і з падтрымкай Мінпрыроды выпусціла калекцыю футболак, заплечнікаў, нататнікаў і стыкераў, прысвечаных чырванакніжным раслінам і жывёлам. Частка выручаных ад продажу сродкаў будзе перададзена прыродаахоўным арганізацыям і прытулкам для жывёл.

Яшчэ 38 гадоў таму, калі было складзена першае выданне Чырвонай кнігі Беларусі, жывёл і раслін, якія знаходзяцца на мяжы знікнення, было менш за 200. Цяпер гэта лічба вырасла амаль у тры разы. Сваёй новай калекцыяй Mark Formelle вырашыла нагадаць беларусам, якую прыгажосць мы можам у хуткім часе страціць, калі не будзем берагчы прыроду.

— На планеце амаль не засталося месцаў, куды б не прыйшлі людзі са сваімі інтарэсамі. Аднак чалавек — не цар прыроды, а такая ж яе частка, як жывёлы і расліны. Таму нам трэба вучыцца паважліва ставіцца да сваіх суседзяў, — падкрэсліў начальнік упраўлення біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Мікалай СВІДЗІНСКІ. — Кожны від расліннага і жывёльнага свету — унікальны і цікавы па-свойму, што адкрывае бязмежныя магчымасці для творчасці.

На прынтах новага адзення і сувеніраў — жукі-алені, совы-сіпухі, грабеньчатыя трытоны, рабыя суслікі, сфагнумы мяккія, хвашчы вялікія і іншыя прадстаўнікі Чырвонай кнігі. У кожнай з сямі прац свой аўтар, які самастойна выбіраў пару з жывёлы і расліны на свой густ. Спецыяльна для праекта кампанія запрасіла беларускіх мастакоў і ілюстратараў, сярод якіх Ніка Сандрас, Doctor Oy, Міця Післяк, Ганна Радзько, Аляксандр Сідаровіч, Надзея Макеева і Аляксей Лімонаў.

— Калі я ўбачыў жука-аленя, то вельмі здзівіўся і падумаў: чаму яго яшчэ з мастакоў ніхто не ўзяў. Разам з ім я чамусьці ў галаве адразу ўявіў гігроцыбе барвовую — гэта яркі і, што цікава, ядомы грыб. Працай вельмі задаволены, — падзяліўся ўражаннямі адзін з мастакоў Аляксандр СІДАРОВІЧ.

На ўсіх футболках і заплечніках ёсць ярлыкі з інфармацыяй пра расліну і жывёлу, выявы якіх на іх нанесены. Такія ж звесткі ўказаны і на адваротных старонках сувеніраў. Так, напрыклад, можна даведацца, чаму ў Беларусі засталося так мала рабых суслікаў. Аказваецца, у 1940-х гадах яны лічыліся шкоднікамі, таму мэтанакіравана знішчаліся. Аднак гэта жывёла, як і ўсе астатнія, — вельмі важная для экасістэмы, таму беларускія вучоныя цяпер спрабуюць выправіць памылкі нашых продкаў і аднавіць папуляцыю чырванакніжніка.

Калекцыя лімітаваная, але па прычыне яе ўжо прыкметнай папулярнасці кампанія абяцае давыпускаць адзенне. Магчыма, нават з новымі чырванакніжнымі
героямі.

Кацярына ЦІТОВА

Фота Андрэя САЗОНАВА