Вы тут

Перамога жыцця і святла


Велікоднае пасланне

Мітрапаліта Мінскага і Заслаўскага ПАЎЛА,

Патрыяршага Экзарха ўсяе Беларусі,

архіпастырам, пастырам, манахам

і ўсім верным дзецям Беларускай праваслаўнай царквы


Фота Анатоля КЛЕШЧУКА.

Уваскрасення дзень,

і прасвятлімся радасцю,

і адзін аднаго абдымем;

скажам: браты! нават тым,

хто ненавідзіць нас,

даруем усім праз уваскрасенне,

і так усклікнем:

Хрыстос уваскрэс з мёртвых,

смерцю смерць растаптаў

і тым, што ў магілах, жыццё дараваў.

                            Сціхіра Святой Пасхі

Узлюбленыя ў Госпадзе Праасвяшчэнныя архіпастыры, пачэснае прасвітарства, у Хрысце дыяканства, богалюбівыя інакі і інакіні, дарагія браты і сёстры!

Гасподзь даў нам зноў сустрэць святочную найвялікшую падзею сусветнай гісторыі — Уваскрасенне Госпада і Спаса нашага Іісуса Хрыста. Сёння святкуе Царква Праваслаўная, весяліцца свет бачны і нябачны, мільёны хрысціянскіх сэрцаў напаўняюцца невымоўнай радасцю, бо

ХРЫСТОС УВАСКРЭС!

САПРАЎДЫ ЎВАСКРЭС!

«Смерць! дзе тваё джала? пекла! дзе твая перамога?» (Ас. 13:14) — усклікае сёння ўся паўната Святой Царквы Хрыстовай. Сваёй Крыжовай смерцю Гасподзь наш Іісус Хрыстос скасаваў смерць, Сваім Уваскрасеннем адкрыў перад намі магчымасць уваходжання ў радасць вечнага быцця, дараваў кожнаму з нас жыватворныя сілы разарваць путы граху і здабыць сапраўднае жыццё — жыццё ў яднанні з Богам.

Уваскрасенне Хрыстова — краевугольны камень нашай веры, яе неад'емная і непахісная аснова. «Калі Хрыстос не ўваскрэс, то марная і пропаведзь наша, марная і вера ваша» (1 Кар. 15:14), — усклікае святы апостал Павел. Але Хрыстос Спасіцель паўстаў з мёртвых і адкрыў усяму чалавецтву шлях да ўваскрасення, да вечнага і блажэннага жыцця ў абіцелях Царства Нябеснага. Амаль дзве тысячы гадоў над зямлёй гучыць не змаўкаючы пераможная радасная вестка аб Уваскрасенні Хрыстовым — залогу бессмяротнасці кожнага чалавека, які веруе ў Хрыста Спасіцеля і выконвае Божыя запаведзі.

«Калі Хрыстос уваскрэс, то і мы ўваскрэснем у целах нашых», — прапаведуе наш сучаснік і падзвіжнік XX стагоддзя, свяціцель Лука (Война-Ясянецкі). Свяціцель прапаведаваў гэта, пераказваючы словы апостала Паўла, звернутыя да карынфскіх хрысціян: «Бо паколькі праз чалавека смерць, то праз чалавека і ўваскрасенне мёртвых. Як у Адаме ўсе паміраюць, так у Хрысце ўсе ажывуць» (1 Кар. 15:21-22). Святыя падзвіжнікі пераканана прапаведавалі, што не толькі духоўную, але і цялесную смерць скасаваў Хрыстос Сваім Крыжам, смерцю і Уваскрасеннем.

Пасля Уваскрасення Хрыстовага нашы жыццё і смерць цалкам знаходзяцца ў руках усёмагутнага Бога, і ў нас няма патрэбы разважаць пра гэта, грунтуючыся на законах прыроды, бо і яны створаны Тварцом усяго, і Ён вольны дзейнічаць не па нашым розуме, а па невядомых нам законах Божых.

Паводле непарушнага абяцання Божага, усё чалавецтва ўваскрэсне ў канцы часу, і «выйдуць тыя, што рабілі дабро, ва ўваскрасенне жыцця» (Ін. 5:29). Нам жа, дзецям Царквы Хрыстовай, належыць не толькі знаходзіцца ў чаканні «новага неба і новае зямлі, на якіх праведнасць жыве» (2 Пят. 3:13), але і сведчыць пра Уваскрасенне Спасіцеля праз справы дабра, любові і міласэрнасці. «Па тым пазнаюць усе, што вы Мае вучні, калі любоў будзеце мець паміж сабою» (Ін. 13:35), — кажа Гасподзь. Добрыя справы дзеля славы Божай — вось самае лепшае, самае яркае пацвярджэнне таму, што Уваскрасенне Хрыстова і дагэтуль абнаўляе і асвячае свет, перамяняючы сэрцы людзей.

У Хрысце Уваскрэслым мы ўжо не чужыя, але — адна вялікая сям'я, якая называецца Царквой. Кожны, хто прылічае сябе да Святой Царквы Хрыстовай, закліканы паказаць свету сапраўдную любоў і маральную вышыню, пра якую сказана ў Пасланні апостала Паўла да Карынфян: «Любоў доўгацярплівая, міласэрная, любоў не зайздросціць, любоў не ўзвышае сябе, не ганарыцца, не бясчынствуе, не шукае свайго, не раздражняецца, не памятае зла, не радуецца няпраўдзе, а радуецца ісціне; усё пакрывае, усяму верыць, на ўсё спадзяецца, усё пераносіць (1 Кар. 13:4-7). У гэтых словах апостальскіх адлюстраваны ідэал, які, на першы погляд, здаецца недасягальным. Але, як сказаў Спасіцель свету, «...усё магчыма для таго, хто веруе» (Мк. 9:23). А таму, з верай ва Уваскрасенне Хрыстова і надзеяй на ўсёмагутную дапамогу Божую, будзем імкнуцца да таго, каб усё наша жыццё было напоўнена дзейнай любоўю да Бога і бліжніх.

Пачнем славіць Хрыста Уваскрэслага з даравання нашым крыўднікам і нядобразычліўцам, а затым уславім Спасіцеля свету бескарыслівай дапамогай людзям у нястачы, падтрымкай гаротных і нядужых, чысцінёй і высакародствам учынкаў. Падзелімся Пасхальнай радасцю з бліжнімі і дальнімі — і гэтая светлая радасць, шматразова ўзмоцненая, вернецца да нас і застанецца ў нашых сэрцах.

У гэтае светлазарнае свята Светлага Хрыстовага Уваскрасення зноў і зноў звяртаюся да вас — Праасвяшчэнныя архіпастыры і пастыры, інакі і інакіні, дарагія браты і сёстры, — і шчыра жадаю ўсім вам добрага здароўя, душэўнага міру, моцы духу і невычэрпнай, невымоўнай Пасхальнай радасці!

ХРЫСТОС УВАСКРЭС!

САПРАЎДЫ ЎВАСКРЭС!

Павел, Мітрапаліт Мінскі і Заслаўскі,

Патрыяршы Экзарх усяе Беларусі

Пасха Хрыстова 2019 года, горад Мінск.

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.