Вы тут

У выдавецтве «Беларусь» выйшаў альбом «Кастусь Качан. Жывапіс»


Кастуся Качана добра ведаюць аматары жывапісу, наведвальнікі мастацкіх выставак, розных вернісажаў. Пра мастака досыць часта пішуць. Хоць — і гэта відавочна — творца не дужа прыкладае да гэтай актыўнасці руку. Работы Кастуся Качана запамінальныя, досыць прыцягальныя, насычаныя моцнай энергетыкай, якую іначай як «гэта і ёсць Беларусь» і не назавеш. Пераконвае, што так яно на самай справе, і альбом «Кастусь Качан. Жывапіс». З уступным артыкулам да выдання выступае доктар мастацтвазнаўства, лаўрэат Дзяржаўнай прэміі Рэспублікі Беларусь Віктар Жук.


Пейзажныя памкненні мастака адлюстраваны настолькі выразна, рэльефна, настолькі пераканаўча, што адчуваеш уласную прысутнасць у абраных ім мясцінах. «Наваградак», «Мястэчка Мір», «Вясна ў Міры», «Вечар у Гальшанах», «Зімовы дзень у Шчорсах», «Вясна ў Пінску», «Вечар у Нясвіжы», «Вясна ў Івянцы», «Зіма ў Ракаве», «Мястэчка Ракаў», «Зіма ў Крэве», «Вечарам на Нёмане», «Вясна ў Солах», «Зіма ў Дзятлаве», «Зіма ў Іўі»... Мастацкая геаграфія Айчыны, адрасы мястэчак, вёсак, якія складалі і працягвалі складаць агульны ландшафт заходнебеларускіх зямель. Узіраючыся ў выявы, рэпрадукцыі багатых на колеры карцін, можна прыгадаць прозу Янкі Брыля, Вячаслава Адамчыка, Генрыха Далідовіча, дзе праз слова напоўніцу адлюстраваны каларыт шматвекавой гісторыі, сучаснасць жыцця людзей і паселішчаў. Але і без звароту да тэкстаў раманаў, апавяданняў, аповесцяў згаданых і іншых аўтараў, можна смела настройвацца на дыялог з мастацкім светам Кастуся Качана. Жывапісец любоўна аглядае знаёмую яму частку нашай бязмежнай па прыгажосці краіны.

«Вясна ў Івянцы» (час напісання карціны — 2006 год), напрыклад, спалучае прыродны краявід з архітэктурным ландшафтам. Многія работы беларускіх мастакоў, якія прысвечаны тым ці іншым знакавым аб'ектам даўніны, сакцэнтаваны на саміх помніках мінуўшчыны. У такіх карцінах «губляюцца» рачулкі і алеі, пазбаўлены прыцягальнасці азёры і лугавіны. Кастусь Качан імкнецца разгледзець увесь свет. Ён смела пашырае далягляды, выбудоўвае кампазіцыю так, каб і нам было дадзена пайсці следам за мастаком. «Уначы выпаў снег», «Талая вада», «Вечар» — гэта і настрой дня, і настрой жыцця ўвогуле. Мастак нагадвае пра сапраўдныя вартасці, пра тое, што вось ён — увесь свет! І малы, і вялікі Свет — гэта сама Беларусь, адрасы, што побач, зусім блізка. Варта толькі выправіцца ў кароткую дарогу — і ў цябе ёсць шанец духоўна ўзбагаціцца, стаць вышэй за будзёнасць.

Некаторыя старонкі альбома Кастуся Качана — рэпрадукцыі нацюрмортаў: «Антонаўкі», «Бэз», «Дзьмухаўцы», «Папяроўкі», «Саламяны капялюш»... І як адкрыццё, як чаканае свята — «Велікодны нацюрморт». Так і ўвесь альбом «Кастусь Качан. Жывапіс», падараваны гледачам і чытачам, — яшчэ адно святочнае ўражанне ў пярэдадзень Вялікадня.

Кастусь Ладуцька

Загаловак у газеце: Сапраўднасць роднага і блізкага

Выбар рэдакцыі

Грамадства

Як у вясковай школе з'явіўся SТEM-цэнтр

Як у вясковай школе з'явіўся SТEM-цэнтр

З'явіўся ён дзякуючы спонсарскай падтрымцы кампаніі Vіzor Games. 

Грамадства

Як адбываюць пакаранне асуджаныя да абмежавання волі «ў хатніх умовах»

Як адбываюць пакаранне асуджаныя да абмежавання волі «ў хатніх умовах»

«Хатняя хімія» — гэта турма, толькі на свабодзе», — з сарказмам кажуць самі асуджаныя пра абмежаванне волі без накіравання ў папраўчую ўстанову.

Здароўе

​Як абараніць сябе ад кардыялагічных праблем у халодны перыяд?

​Як абараніць сябе ад кардыялагічных праблем у халодны перыяд?

Менавіта зімой павялічваецца колькасць інфарктаў і павышаецца артэрыяльны ціск.

Культура

Успаміны пра Яўгенію Янішчыц

Успаміны пра Яўгенію Янішчыц

Піша Зіновій Прыгодзіч.