У сталіцы будзе паказана шэсць фільмаў японскага класіка

Шчымлівы Ясудзіра Одзу — 2 красавіка ў мінскім «Піянеры» распачнецца ўжо восьмая рэтраспектыва японскага кіно, якая штогадова арганізуецца «АРТ Карпарэйшн» з удзелам пасольства Японіі і кампаніі JTІ. У мінулыя гады беларускія гледачы глядзелі японскага Шарло — Тора-сана, падборку карцін у традыцыйным жанры «Кайдан» альбо «новую класіку японскага кіно» — вядучых сучасных аўтараў Японіі, імёны якіх з'яўляюцца ў праграмах найважнейшых сусветных кінафестываляў. Рэтраспектыва гэтага года — беспрэцэдэнтная: на вялікім экране будзе паказана шэсць адрэстаўраваных фільмаў «самага японскага» і аднаго з найкласічных сусветных рэжысёраў.

Ясудзіра Одзу — гэта непапраўныя адбіткі ў гісторыі кіно і амаль непазбежная прыхільнасць кінааматараў, хоць тут і маралізм, і скупасць на мастацкія сродкі, і традыцыйнасць каштоўнасцяў. Убачыць, напрыклад, павольныя рухі бацькоў, на якіх у дзяцей няма часу, і ўвесь спектр магчымых пачуццяў, якія дакранаюцца да кожнага з нас, дарагога варта.

З «Такійскай аповесці», дарэчы, рэтраспектыва распачнецца. І працягнецца наступнымі разважаннямі аб сямейных праблемах і інстытуце сям'і ў цэлым, бо на працягу ўсёй сваёй творчасці рэжысёр расказваў толькі пра сям'ю і толькі ў адным стане — у стане распаду.

З вельмі абмежаваным інструментарыем (напрыклад, Одзу амаль заўсёды выкарыстоўваў адзін тып плана — з пазіцыі чалавека, што сядзіць на татамі), але з унікальным спосабам у тым ліку мантажу рэжысёр кожны раз мог заўважыць і выявіць нават больш, чым аўтарская нястрымнасць. Гуманізм, блізкасць да традыцыйнага японскага малюнка і надзвычайная рэалістычнасць герояў — Ясудзіра Одзу са сваім «сапраўдным японскім духам» становіцца абавязковым да прагляду і лепш, калі атрымаецца ўбачыць яго на вялікім экране.

Праграма гэтага года ўключае ў сябе шэсць карцін (у цэлым Одзу стварыў пяцьдзясят тры): чатыры каляровыя і дзве чорна-белыя, атрымаць якія для рэтраспектывы, канешне, падаецца вялікай удачай. «Кветкі свята Хіган», «Добрай раніцы», «Позняя восень», «Смак сайры» і «Смак рысу з зялёнай гарбатай» разгрупуюцца ў кінатэатры «Піянер» з 2 да 7 красавіка.

Фільмы рэтраспектывы будуць прадстаўляць японскі кіназнаўца і кінакрытык Хіраноры Іта, што спецыялізуецца ў прыватнасці на спадчыне Ясудзіра Одзу, і праграмны дырэктар кінафестывалю «Лістапад» Ігар Сукманаў.

Апроч іншага, «Такійская аповесць» будзе паказана асобна і бясплатна для мінчан, што з'яўляюцца наведвальнікамі Мінскага ўніверсітэта трэцяга ўзросту, а вольны ўваход на любы з паказаў атрымаюць сябры Рэспубліканскай асацыяцыі інвалідаў-калясачнікаў.

Паўсядзённае існаванне, увасобленае ў карцінах Ясудзіра Одзу, як бы гэта ні гучала, можа стаць не зусім звычайным ці нават надзвычайным часам для сённяшняга гледача.

Ірэна КАЦЯЛОВІЧ