Вы тут

Старты не за гарамі


Арганізатары Еўрапейскіх гульняў раяць не адкладваць набыццё квіткоў на апошні момант, а заняцца гэтым ужо сёння


Падрыхтоўка да ІІ Еўрапейскіх гульняў-2019 ідзе поўным ходам. Ужо 3 мая ў цэнтры Рыма стартуе эстафета “Полымя міру”, і 11 мая больш за 400 факеланосцаў перасякуць мяжу Беларусі. Гэта будзе галоўная мультыспартыўная падзея для ўсёй Еўропы. Па колькасці ўдзельнікаў і відах спорту яна пераўзыходзіць зімовую Алімпіяду: калі ў апошняй паўдзельнічала 2,5 тысячы спартсменаў у 17 дысцыплінах, то ў Еўрапейскіх гульнях у Мінску паспаборнічаюць 4 000 спартсменаў у 23 дысцыплінах. У праграму гульняў увайшлі 15 відаў спорту: бадмінтон, баскетбол 3Х3, бокс, барацьба (грэка-рымская, вольная, жаночая), веласіпедны спорт (трэк і шаша), гімнастыка (спартыўная, мастацкая, акрабатыка, аэробіка і скачкі на батуце), грэбля на байдарках і каноэ, дзюдо, каратэ, лёгкая атлетыка, самба, стральба з лука, стральба (кулявая і стэндавая), настольны тэніс і пляжны футбол. Пад іх у Мінску падрыхтавана 12 спартпляцовак. У 8 відах спорту, з 15 прадстаўленых у праграме Еўрапейскіх гульняў-2019, будзе праведзена афіцыйная кваліфікацыя на летнія Алімпійскія гульні Токіа-2020, а па такіх відах спорту, як бадмінтон, бокс і дзюдо, у рамках гульняў у Мінску адбудуцца чэмпіянаты Еўропы.

Зразумела: мерапрыемства такога маштабу выклікае непадробную цікавасць па ўсім свеце. І ўжо многія набылі квіткі. Сярод краін, жыхары якіх найбольш актыўныя ў гэтым, лідзіруе Беларусь, як гаспадыня гульняў, на другім месцы — Расія, далей — Германія, Ірландыя, Літва, Польшча. Наогул, квіткі на гульні добра прадаюцца ў 28 краінах. Усяго рэалізавана іх больш за 20 тысяч. Пра тое расказаў журналістам начальнік упраўлення па маркетынгу, камерцыйных пытаннях і рэкламе фонду “ІІ Еўрапейскія гульні-2019” Максім Кашкалда на нядаўняй сустрэчы ў Нацыянальным прэс-цэнтры.

Самымі папулярнымі спартыўнымі сесіямі сярод запланаваных 120-ці стануць, зразумела, цырымоніі адкрыцця й закрыцця Гульняў. На іх рэалізавана больш за 25% квіткоў, свабодных для продажу. Чакаецца, што сярод папулярных будуць і лёгкая атлетыка, мастацкая гімнастыка й акрабатыка, пляжны футбол і каратэ. На гэтыя сесіі прададзена квіткоў больш за 30 працэнтаў ад агульнай колькасці.

Пачаў адчувацца павышаны попыт на арэны з невялікай умяшчальнасцю. Таму на некаторыя віды спорту збіраюцца прадаваць квіткі на стаялыя месцы. Найперш тое датычыцца спаборніцтваў па стэндавай і кулявой стральбе. Паколькі на шасейную велагонку рэалізавана каля 50% ад агульнай колькасці квіткоў, намерваюцца расшырыць зону заўзятараў на стартавай і фінішнай лініях.

Безбар’ернае асяроддзе — таксама тое, за што выступае дырэкцыя Гульняў. Больш за 3 тысячы квіткоў на сённяшні дзень зарэзервавана для маларухомай групы насельніцтва.

Агульная колькасць даступных пасадкавых месцаў складае цяпер 381 тысячу. Але ў залежнасці ад попыту на квіткі яна можа быць павялічана да 535 тысяч. Кошт білетаў на спарт-сесіі для грамадзян Еўропы: ад 2 да 20 еўра.

Першы этап продажу квіткоў стартаваў 1 снежня, другі пачнецца ў сакавіку, трэці — у маі. Афіцыйным аператарам па іх распаўсюджванні прызнана таварыства “Тикетпро”. Любы жыхар любой краіны можа набыць квіткі анлайн. Яны распаўсюджваюцца й праз беларускага тураператара “Цэнтркурорт” і афіцыйнага турагента “Вокруг света”.

Хоць гульні будуць трансляваць у 120 краінах, арганізатары ўсё ж раяць стаць заўзятарамі непасрэдна на спартпляцоўках. Выкарыстанне навейшых тэхналогій пад час цырымоній адкрыцця й закрыцця, у тым ліку тэхналогіі дапоўненай рэальнасці, каляровых і праекцыйных эфектаў ды многіх элементаў, якія не даступныя для паказу па тэлебачанні, зробяць знаходжанне гледачоў непасрэдна на арэнах незабыўным.

Для гасцей Мінска пад час Еўрагульняў запрацуюць 4 фанзоны: каля Палаца спорту, комплексаў “Мінск-Арэна” і “Чыжоўка-Арэна”, стадыёна “Дынама”. Там будзе наладжаны гандаль стравамі беларускай нацыянальнай кухні й сувенірамі.

Ганна Лагун

Фота БЕЛТА

Выбар рэдакцыі

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».