Унікальная інавацыйная праграма павышэння кваліфікацыі выкладчыкаў “Універсітэт адукацыйных інавацый: тэорыя, методыка і практыка сучаснай адукацыі” стартавала ў Гродзенскім дзяржаўным універсітэце імя Я. Купалы.
На працягу пяці месяцаў (з лютага па май) слухачы будуць знаёміцца з інавацыйнымі адукацыйнымі тэхналогіямі і ствараць уласныя адукацыйныя прадукты — заданні, метадычныя распрацоўкі, апрабаваць іх на практыцы ў ходзе выкладчыцкай дзейнасці, а потым дзяліцца вынікамі з калегамі. Праграма дапаможа выкладчыкам ВНУ, каледжаў, настаўнікам школ знайсці новыя эфектыўныя рашэнні ў планаванні, правядзенні і змесце вучэбных заняткаў з выкарыстаннем інавацыйных адукацыйных тэхналогій.
Праграма курсаў уключае шэсць блокаў, кожны з якіх знаёміць з асобнай адукацыйнай тэхналогіяй актыўнага навучання: маюцца на ўвазе тэхналогія пашыранага сумеснага навучання, навучанне з выкарыстаннем мабільных праграм, відэа і гейміфікацыя, а таксама тэхналогія перакуленага і змешанага навучання. Удзельнікі курсаў атрымаюць адказы на пытанні, чаму сёння актыўнае навучанне знаходзіцца на верхніх радках рэйтынгу найбольш запатрабаваных адукацыйных тэхналогій? Як зрабіць мабільнае навучанне карысным спадарожнікам педагога і вучня? У якіх выпадках відэакантэнт пашырае змястоўную прастору навучальных заняткаў? Як навучэнцы з дапамогай тэхналогіі перакуленага навучання атрымліваюць новы адукацыйны досвед? Чаму сучасную ўніверсітэцкую рэчаіснасць нельга ўявіць без выкарыстання тэхналогіі змешанага навучання? У рамках курсаў слухачы набудуць практычныя навыкі выкарыстання праектнага метаду ў міждысцыплінарнай дзейнасці.
У якасці мадэратараў выступяць выкладчыкі ГрДУ імя Янкі Купалы — удзельнікі праекту “Змяненні ў адукацыйным асяроддзі: прасоўванне інавацыйнага выкладання і навучання для паляпшэння адукацыйнай дзейнасці студэнтаў у краінах Усходняга партнёрства PRINTeL”.
Асвойваць адукацыйную праграму слухачы будуць у двух групах: на рускай і англійскай мовах. Рэалізацыя праграмы на англійскай мове дазволіць пашырыць камунікатыўныя кампетэнцыі ў галіне англамоўных прафесійных стасункаў.
Вынікам навучання стануць уласныя адукацыйныя прадукты слухачоў, прадуктыўныя камунікацыі і каштоўны вопыт, што дасць магчымасць педагогам вызначыцца з выбарам найбольш перспектыўных тэхналогій для асабістай адукацыйнай практыкі.
Варта адзначыць, што ў Гродзенскім дзяржаўным універсітэце сфарміравана эфектыўная сістэма бесперапыннага павышэння прафесійнага майстэрства выкладчыкаў: рэгулярна арганізуюцца курсы "Методыка навучання праз адкрыццё: як навучаць усіх па-рознаму, але аднолькава”, “Асновы эўрыстычнага навучання ў ВНУ". Курсы павышэння кваліфікацыі па праграме "Асновы эўрыстычнага навучання ў ВНУ" у сакавіку бягучага года ўпершыню пройдуць на англійскай мове.
Надзея НІКАЛАЕВА
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».