Усе кінематаграфічныя дарогі зараз вядуць у Берлін: сёння, 7 лютага, тут пачынаецца 69 Міжнародны берлінскі кінафестываль, адзін з найгалоўнейшых кінафорумаў свету. Міжнароднае журы, якое прысуджае Залатога мядзведзя і Сярэбраных мядзведзяў (некалькі) сёлета ўзначальвае французская актрыса Жульет Бінош, вядомая па ролях у фільмах Кшыштафа Кесьлёўскага, Міхаэля Ханэке, Абаса Кіарастамі, Клер Дэні, Аліўе Асаяса ды іншых аўтараў.
69-ы фестываль знамянальны хаця б тым, што апошні год ім кіруе нязменны Дзіцер Кослік. Прафесійны кінематаграфічны свет даўно правакуе перамены: нямецкія рэжысёры нават падпісвалі калектыўнае, у выніку апублікаванае ў часопісе Spiegel, пісьмо з заклікам даць Берлінале новае жыццё. Кослік у сваю чаргу паабяцаў не прадляваць кантракт, тэрмін дзеяння якога канчаецца ў 2019-м.
Тым не менш форум у Берліне застаецца адным з самых чаканых кінасмотраў свету. У мінулым годзе, напрыклад, сюды акрэдытавалася 3800 журнаістаў, што перадавалі навіны з месца падзей па ўсёй, лічы, планеце. Агулам жа штогадова фестываль навадвае каля трохсот тысяч гасцей.
У дні фестываля, з 7 да 14 лютага, у Берліне маюць адбыцца прэм’еры новых фільмаў Агнешкі Холанд, Чжана Імоў, Франсуа Азона, Фаціха Акіна, Дэні Катэ, Андрэ Цешынэ, якія ўдзельнічаюць у асноўнай конкурснай праграме, што складаецца з 23 фільмаў.
Апроч асноўнага конкурса фестываль паказвае конкурсныя секцыі “Панарама”, “Форум”, “Рэтраспектыва” і іншыя.
Івэнты і праграма Берлінале ў пэўным сэнсе фарміруюць будучыя арыентыры сусветнага кінематографа, новыя пазіцыі ў нацыянальных пракатах (у тым ліку беларускім) і перавагі фестывальных адборшчыкаў.
Што будзе адбывацца і што будзе паказвацца на Берлінале, “Звязда” будзе сачыць уласнымі вачыма.
Ірэна КАЦЯЛОВІЧ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.