Вы тут

Мясцовае самакіраванне Шальчынінкая і Воранава ўзнаўляе былыя сувязі


У літоўцаў заўсёды мелася зацікаўленасць тым, як жывуць беларусы. Раней гэта былі блізкія суседзі, не існавала дзяржаўнай мяжы, раёны сябравалі на ўзроўні культурных і грамадскіх арганізацый, шмат было і асабістых кантактаў. І зараз нямала родных жывуць з абодвух бакоў мяжы і па магчымасці падтрымліваюць сувязі. А вось міждзяржаўныя адносіны аслабелі. Масавы прыезд прадстаўнікоў Літвы напрыканцы года стаў новым імпульсам да супрацоўніцтва. Госці пабывалі на сельскагаспадарчых прадпрыемствах, аб'ектах некалькіх сельскіх саветаў, ва ўстановах адукацыі, у тым ліку наведалі Пеляскую сярэднюю школу з літоўскай мовай навучання.


Вялікую дэлегацыю з Шальчынінкая ўзначаліла віцэ-мэр раёна Ядвіга Сінкевіч. Для абмену вопытам прыехалі прадстаўнікі аддзела адукацыі, кіраўнікі школ і дзіцячых садкоў, члены беларускага грамадскага таварыства, фермеры. Папярэднічала прыезду падпісанне пагаднення аб супрацоўніцтве паміж Воранаўскай раённай арганізацыяй «Беларускі саюз жанчын» і Шальчынінкайскім беларускім культурным цэнтрам «Раніца». Падчас сустрэчы кіраўніка цэнтра з раённымі ўладамі было вырашана арганізаваць прыезд літоўскай дэлегацыі.

— Многія прадстаўнікі нашай дэлегацыі маюць беларускія карані, некаторыя нават працавалі ў Воранаўскім раёне, — расказала старшыня беларускага цэнтра «Раніца» Рэгіна Дзмухоўская. — Таму многім цікава пабываць тут зноў, праз гады. Шмат фермераў выказалі жаданне прыехаць, у складзе дэлегацыі — іх палова. Таксама нямала і прадстаўнікоў сістэмы адукацыі.

Можна сказаць, гэты візіт стаў самым масавым за многія гады — прыехала каля 30 чалавек. Фарміраванне дэлегацыі адбывалася з улікам прыярытэтаў развіцця Воранаўскага раёна — сельская гаспадарка і адукацыя.

— Суседзі заўсёды цікавіліся нашымі дасягненнямі, тым, як ідуць справы ў розных галінах, як развіваецца інфраструктура, — зазначыла старшыня Воранаўскага Савета дэпутатаў Алена ГАНЕВІЧ. — Цікавіла літоўцаў развіццё сельскагаспадарчага кірунку, таму што ў нас дзяржаўная форма ўласнасці, а ў іх усё даўно перайшло ў прыватныя рукі.

Члены дэлегацыі змаглі ўпэўніцца ў сістэмнасці, выніковасці малочнатаварных фермаў. Яны звярнулі ўвагу на парадак, механізацыю працы, узровень земляробства, нарыхтоўку кармоў, увогуле высокі ўзровень сельскай гаспадаркі.

Бакі дамовіліся аб далейшай сустрэчы паміж фермерамі і прадстаўнікамі сельскагаспадарчых прадпрыемстваў «Эліт-Агра-Больцінікі» і «Доцішкі». Беларускія сельгасвытворцы маюць намер працаваць з літоўскімі калегамі па інвестыцыйных кірунках.

— Воранаўскі і Шальчынінкайскі раёны ў многім падобныя — яны аграрныя раёны. Толькі ў нас сельская гаспадарка ўся прыватная, — паведаміў фермер і дэпутат з Шальчынінкая Тадэвуш Рудзіс. — Раней я таксама працаваў у дзяржаўным сектары, цяпер амаль дваццаць гадоў займаюся раслінаводствам і жывёлагадоўляй. Да мяне далучыўся і сын Анджэй. Мы прыехалі сюды разам. Лічу, што для яго будзе карысна ўбачыць, як развіваецца ў сучасных умовах сельская гаспадарка нашых беларускіх суседзяў. Лічу, ёсць сэнс наладзіць партнёрскія зносіны з беларускім сельгаспрадпрыемствам.

Яшчэ адзін сумесны кірунак дзейнасці — адукацыя. Прадстаўнікі Літвы пагадзіліся, што ў Воранаўскім раёне напрацавана салідная матэрыяльная база сярэдніх і дашкольных устаноў. Яны наведалі сярэднія школы ў аграгарадках Беняконі і Доцішкі, дзіцячы садок у Больцініках, пабывалі ў вёсцы Пеляса, дзе працуе школа з літоўскай мовай навучання. Прадстаўнікі літоўскай дэлегацыі адзначылі высокі ўзровень навучання, добрую падрыхтоўку педагогаў. Беларускія калегі прапанавалі наладзіць сумесную работу па абмене вопытам паміж педагогамі, арганізаваць агульныя маладзёжныя праекты.

— Праблемы гэтага асяроддзя ў нас аднолькавыя — адмова ад шкодных звычак, здаровы лад жыцця, далучэнне да працы, дэмаграфічная сітуацыя. Гэта актуальна для абедзвюх краін, — падкрэсліла Алена Ганевіч.

Цікавіла літоўскіх гасцей і работа мясцовага самакіравання — тое, як будуецца сістэма органаў улады, узаемадзеянне паміж выканаўчай і прадстаўнічай уладамі. Яны атрымалі адказ на пытанне, якім чынам на месцы клапоцяцца аб дабрабыце насельніцтва, як дасягаюць гэтай мэты ў дачыненні да сельскіх жыхароў, як працуюць з імі. Наогул, як развіваюцца сельскія тэрыторыі Воранаўскага раёна.

Абмеркаваць больш паслядоўна канкрэтныя кірункі дзейнасці беларусы маюць намер пасля візіту ў Літву. Пакуль запланавана наведаць суседні раён вясной будучага года.

Маргарыта УШКЕВІЧ

Загаловак у газеце: Літоўскі дэсант на сумежжы

Выбар рэдакцыі

Калейдаскоп

Вясёлыя гісторыі чытачоў

Вясёлыя гісторыі чытачоў

Любачка і На варце маёмасці.

Грамадства

Як будзе праходзіць перапіс насельніцтва

Як будзе праходзіць перапіс насельніцтва

Старшыня Нацыянальнага статыстычнага камітэта Іна МЯДЗВЕДЗЕВА адзначае, што іх ведамства разлічвае перапісаць максімальную колькасць грамадзян з дапамогай укаранёных інавацый.

Грамадства

Адзіныя дзяўчаты-паркуршчыцы ў Беларусі распавядаюць пра свой спорт

Адзіныя дзяўчаты-паркуршчыцы ў Беларусі распавядаюць пра свой спорт

Гэты кірунак спорту ўвайшоў у жыццё былых студэнтак дзяржаўнага ўніверсітэта фізічнай культуры выпадкова.