Вынікі конкурсу ідэй «Прырода малой радзімы»

Часопіс «Родная прырода» і Міністэрства прыродных рэсурсаў і аховы навакольнага асяроддзя сумесна з Міністэрствам адукацыі падвялі вынікі рэспубліканскага экалагічнага конкурсу ідэй «Прырода малой радзімы».

На рэдакцыйную пошту прыйшло больш за 80 работ ад устаноў адукацыі з розных куткоў Беларусі. Забруджванне паветра, глеб і водных рэсурсаў, праблема адходаў, барацьба з інвазійнымі раслінамі і жывёламі, азеляненне і добраўпарадкаванне населеных пунктаў — тэмы, па якіх працавалі ўдзельнікі конкурсу, былі розныя. Аб'яднала іх любоў да роднай зямлі і імкненне агульнымі намаганнямі зрабіць яе экалагічна чыстай, прывабнай для турыстаў і ўтульнай для мясцовых жыхароў.

Хто ж стаў пераможцам? Сярод калектыўных работ тройка лідараў наступная:

1-е месца — «Распрацоўка 3D-атласа «Развіццё экалагічнага турызму на асабліва ахоўных прыродных тэрыторыях Гродзенскай вобласці», аўтары — Ксенія Сідаровіч і Ілья Гульнік, Едкаўская сярэдняя школа, Лідскі раён Гродзенскай вобласці;

2-е месца — «Папера з трыснягу», аўтары — удзельнікі навуковага таварыства вучняў па хіміі, сярэдняя школа № 2 г. п. Зэльва, Гродзенская вобласць;

3-е месца — экалагічны праект «100 %», аўтары — удзельнікі клуба ЮНЕСКА «Шок», сярэдняя школа № 9 г. Брэста.

Сярод індывідуальных работ перамаглі:

1-е месца — «Аўтаномны вулічны ліхтар для горада Брэста з гарызантальным ветрагенератарам і сонечнымі панэлямі», аўтар — Цімафей Авярчук, сярэдняя школа № 13 г. Брэста імя В. І. Хована;
2-е месца — экалагічная акцыя «Уцёкі з агародчыка», аўтар — Іна Бука, гімназія г. Буда-Кашалёва, Гомельская вобласць;
3-е месца — даследчая работа «Тайны смеццевага вядра», аўтар — Ганна Заяц, сярэдняя школа № 1 г. Петрыкава, Гомельская вобласць.

Мы сардэчна віншуем аўтараў работ з перамогай і запрашаем у Выдавецкі дом «Звязда» па падарункі. Дадатковую інфармацыю можна атрымаць па нумары 8 (017) 263-84-61.

Работы пераможцаў рэспубліканскага конкурсу ідэй «Прырода малой радзімы» можна прачытаць на старонцы часопіса «Родная прырода» http://zvіazda.by/be/edіtіon/rodnaya-pryroda, а таксама ў снежаньскім нумары выдання.

Спадзяёмся, ідэі, выказаныя пераможцамі, рэалізуюцца не толькі на іх малой радзіме, але і ў іншых рэгіёнах Беларусі, стануць перадумовай для паляпшэння экалагічнай сітуацыі ў краіне.

Вераніка КОЛАСАВА