Вы тут

Як лагічна і прыгожа гаварыць, утрымліваць увагу аўдыторыі?


Як лагічна і прыгожа гаварыць, правільна выбудоўваць сваё выступленне, утрымліваць увагу аўдыторыі? Пра гэта расказаў падлеткам радыёвядучы, бізнес-трэнер Дзмітрый Смірноў падчас інтэрактыўнага майстар-класа «Майстэрства прэзентацыі», які быў арганізаваны кампаніяй velcom у рамках сацыяльна-адукацыйнага праекта. У ім удзельнічаюць больш як 800 старшакласнікаў з 236 навучальных устаноў: ад сталіцы, абласных і раённых цэнтраў да вясковых школ і школ-інтэрнатаў. Праект velcom YOUTH дайшоў да самых зацікаўленых і матываваных школьнікаў, якія прапанавалі цікавыя ідэі, што павінны змяніць наш свет да лепшага. Яго адметнасць у тым, што ўся камунікацыя (ад падачы заяўкі да прэзентацыі ў фінале) будзе весціся на беларускай мове.


Ад майстар-класа, напэўна, многія чакалі нешта накшталт урока ў школе. Але звычайна, банальна і проста — не пра гэта мерапрыемства. Удзельнікі займалі месцы ў зале пад мульцік-гісторыю, у якім бульба расказвала, адкуль яна ўзялася. Потым на экране з'явіўся галоўны тэхнічны дырэктар
кампаніі velcom Крысціян ЛАКЕ,
які натхніў школьнікаў на плённую працу: «Наша будучыня — за такой моладдзю, як вы! Слухайце адно аднаго, развівайцеся і кідайце сабе выклік. Рухайцеся наперад, будзьце лідарамі свайго пакалення і дапамажыце нам, дарослым, справіцца з гэтым рытмам, а магчыма, і паскорыць яго».

Затым увагу падлеткаў захапіў Дзмітрый Смірноў (на здымку). Ён расказаў пра асноўныя прынцыпы якаснай і жывой прэзентацыі, а таксама растлумачыў правіла чатырох «с»: сваё, скандал, сенсацыя, смех — элементы, якімі стапрацэнтна можна прывабіць аўдыторыю. Прыкладамі з'яўляюцца Стыў Джобс і Ілан Маск — не толькі вынаходнікі, але і выдатныя прамоўцы.

Школьнікі былі актыўныя, бадзёрыя і жвавыя, падымалі рукі і не баяліся выказвацца. Падчас майстар-класа яны стараліся разабрацца, што такое ідэя, прапаноўвалі свае варыянты, як выкарыстоўваць будзільнік-кававарку, агароджу-люстэрка, шчотку на пульце ад гульнявой прыстаўкі...

Больш за ўсё старшакласнікаў уразіў і натхніў на крэатыў хатні парсючок. Ім была пастаўлена задача — прарэкламаваць міні-піга. Выказваліся арыгінальныя і вясёлыя ідэі. Так, да плюсоў парсючка школьнікі аднеслі яго невялікі памер, адсутнасць шэрсці, якую пакідаюць кошкі і сабакі, і спосаб... напужаць гасцей. Адна з дзяўчат прапанавала набыць яго дзеля падтрымкі вегетарыянства — як хатняга гадаванца.

Ідэі, прадстаўленыя на конкурс, — нестандартныя, непаўторныя і разнастайныя. Напрыклад, дзесяцікласніца сталічнай гімназіі № 30 Насця Шыракоўская вырашыла звярнуць увагу на праблему аўтызму:

— Цікавасць да гэтай тэмы ў мяне з'явілася яшчэ ў дзяцінстве, — прызналася дзяўчына, — мне таксама хацелі паставіць дыягназ «аўтычнае расстройства», бо я доўга не размаўляла. На мой погляд, у нас не вельмі разбіраюцца ў гэтай праблеме. Калі падлетак хоча стаць праграмістам, яму кажуць: «Не, ты можаш стаць толькі агароднікам, бо ты аўтыст!» Таксама я назіраю за сынам мамінай сяброўкі, аўтыстам. Калі звычайных дзяцей просяць назваць жывёл, яны прыгадваюць ката, сабаку, вожыка... А хлопчык піша на паперы «рыба-меч», прычым з дэфісам, без мяккага знака — адпаведна арфаграфічным правілам. Гэта прымушае мяне думаць, што ў дзяцей-аўтыстаў не нізкія інтэлектуальныя здольнасці, а зусім наадварот. Думаю, у іх ёсць патэнцыял, які трэба развіваць.

Ідэя вучня 10 класа Замастоцкай сярэдняй школы Івана Трыпуза — стварыць акуляры ці лінзы, якія сфатаграфуюць наваколле так, як мы яго бачым, таму што сучасныя фотаздымкі не даюць тую ж якасць успрымання, як нашы вочы.

...Наступныя майстар-класы «Майстэрства выступлення» і «Майстэрства лідара» пройдуць у снежні і студзені. Падчас іх удзельнікі пачнуць рэалізоўваць свае ідэі: запісваць відэаролікі ў выглядзе майстар-класа, дэбатаў ці дыскусіі. У фінал будуць выбраныя толькі дзесяць чалавек. Яны атрымаюць магчымасць працаваць з найлепшымі ментарамі і прадставяць свае прэзентацыі на канферэнцыі TEDxYouth@Mіnsk у маі 2019 года.

Юлія АДАМОВІЧ, студэнтка ІV курса факультэта журналістыкі БДУ

Загаловак у газеце: Хочаш змяніць свет? Пачні з... парсючка

Выбар рэдакцыі

Культура

Чым сёлета будзе здзіўляць наведвальнікаў «Славянскі базар у Віцебску»?

Чым сёлета будзе здзіўляць наведвальнікаў «Славянскі базар у Віцебску»?

Канцэрт для дзяцей і моладзі, пластычны спектакль Ягора Дружыніна і «Рок-панарама».

Грамадства

Час клопату садаводаў: на якія сарты пладовых і ягадных культур варта звярнуць увагу?

Час клопату садаводаў: на якія сарты пладовых і ягадных культур варта звярнуць увагу?

Выбар саджанца для садавода — той момант, значнасць якога складана пераацаніць.

Культура

Вольга Здзярская: Для мяне мая прафесія — жыццё

Вольга Здзярская: Для мяне мая прафесія — жыццё

Актрыса НАДТ імя М. Горкага — пра шлях да сцэны і натхненне.

Грамадства

«Любоў — галоўнае, што бацькі павінны даць сваім дзецям»

«Любоў — галоўнае, што бацькі павінны даць сваім дзецям»

Тата і мама — два самыя важныя чалавекі ў жыцці кожнага дзіцяці.