Актэт балалаек «Віцебскія віртуозы» стаў дыпламантам першага Міжнароднага конкурсу-фестывалю ансамбляў «Нацыянальная калекцыя» ў Санкт-Пецярбургу.
Адзіны жаночы калектыў у конкурсе з унікальным складам інструментаў уразіў міжнароднае журы паўнатой гучання і арыгінальнымі аранжыроўкамі. Пра гэта карэспандэнту «Звязды» паведамілі ў Віцебскай абласной філармоніі.
Усяго арганізатарам фестывалю даслалі 42 відэазаяўкі, з якіх для ўдзелу ў другім туры было адабрана 27 ансамбляў з Расіі, Арменіі, Беларусі, Літвы, Манголіі ды іншых краін. У трэцім жа, што адбыўся на вядучай канцэртнай пляцоўцы горада, — у Дзяржаўнай акадэмічнай капэле, удзел узялі толькі дванаццаць канкурсантаў.
Як адзначылі члены міжнароднага журы, многія сучасныя калектывы працуюць у жанры эстрады, але, спрабуючы быць арыгінальнымі, губляюць індывідуальнасць. Актэт балалаек «Віцебскія віртуозы» пры ўсім сваім наватарстве здолеў не забыць свае вытокі і за гэта быў узнагароджаны дыпломам «За захаванне традыцый».
Варта адзначыць, што сёлета актэту споўнілася 45 гадоў. Лаўрэаты шматлікіх конкурсаў і фестываляў нястомна папаўняюць свой рэпертуар арыгінальнай музыкай, напісанай спецыяльна для балалайкі. Гэта музыка розных стыляў і кірункаў: п'есы камернага жанру, джазавыя кампазіцыі, народныя апрацоўкі і арыгінальныя п'есы для балалайкі.
Калектыў, які вылучаецца ўласнай манерай і стылем выканання, часта называюць «культурнай жамчужынай Віцебска». Яго руплівая праца і высокі ўзровень прафесійнай падрыхтоўкі сталі гарантам поспеху ў чарговым конкурсе.
Аляксандр ПУКШАНСКІ
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
