Інтэрнаты заўсёды знаходзяцца пад асаблівай увагай ратавальнікаў. Калі выяўлена шмат парушэнняў, а прадпісанні сістэматычна не выконваюцца і ўсе меры ўздзеяння на адказных асоб вычарпаны, у рэйд запрашаюць журналістаў. Каб «герояў», якія ставяць пад пагрозу жыцці многіх людзей, ведала краіна. Між тым ёсць сумненні, што нешта зменіцца і пасля...
Звонку інтэрнат па вуліцы Д. Беднага, 7 (цяпер Мікольскай) выглядае даволі аптымістычна: цагляная дзевяціпавярховая пабудова з сіненькімі балкончыкамі. Унутры нядаўна пафарбаваныя сцены ў калідорах і адсутнасць прыкмет агульнага разбурэння. Але ж менавіта тут на працягу доўгага часу спецыялісты МНС выяўляюць адны і тыя ж небяспечныя парушэнні, сцвярджае афіцыйны прадстаўнік Гомельскага абласнога ўпраўлення МНС Марыя Клязовіч:
— Штодзень на тэрыторыі Гомельскай вобласці праводзяцца маніторынгі стану пажарнай небяспекі аб'ектаў. Асаблівая ўвага аддаецца правільным дзеянням персаналу ў выпадку ўзнікнення пажару.
Загадчык інтэрната Генадзь Сцепаненка пра парушэнні пажарнай бяспекі ведае добра і сам дэманструе вогнетушыцелі, якія аж з 2010 года не перазараджаліся. А значыць, зусім няма ўпэўненасці, што яны спрацуюць у неабходны момант. Інспектары МНС дадаюць, што пры гэтым не забяспечана пастаянная гатоўнасць і іх да выкарыстання (як і супрацьпажарнага водазабеспячэння), бо ключы ад шаф, дзе знаходзяцца першасныя сродкі пажаратушэння, — на вахце, што на першым паверсе будынка.
А яшчэ высвятляецца, што пры эвакуацыі няма магчымасці адчыніць дзверы ў будынку знутры без дапамогі ключа. А тыя дзверы, якія некалі былі здольныя абараніць ад пажару, даўно зламаныя. Загадчык установы кажа, што ў такім выглядзе іх прымаў ад папярэдніка і ў рабочым стане нават ніколі не бачыў.
Аўтаномныя пажарныя апавяшчальнікі ў пакоях інтэрната ўсталяваны былі даўно. Сёння ж яны з'яўляюцца сумнеўным дэкаратыўным элементам, бо літаральна ва ўсіх адсутнічаюць батарэйкі. Купляць новыя ніхто не збіраецца.
Калі размова заходзіць пра агульную сігналізацыю, высвятляецца, што ёсць толькі яе праект і наўрад ці дойдуць рукі да яго ўвасаблення: па прычыне адсутнасці фінансаў ва ўладальніка — філіяла «Будаўніча-мантажны поезд № 716» ААТ «Трэст Белтрансбуд».
Начальнік філіяла Юрый Носаў пасаду займае год і кажа, што інтэрнат для яго арганізацыі — камень на шыі, які зняць нельга і цягнуць больш няма магчымасці. Прызнаецца:
— Пажарную аўтаматыку наўрад ці зробім. Сто тысяч рублёў у нас няма. Гэта ж двухмесячны фонд заработнай платы. Як заробім грошы, так і будзем ліквідаваць выяўленыя недахопы. Я даўно хацеў аддаць гэты інтэрнат гораду, але ніхто яго не прымае. Тут некалькі разоў праводзілася абследаванне КЖРЭУП «Савецкае». Але, каб перадаць будынак ім на баланс, трэба правесці шэраг мерапрыемстваў па бягучым рамонце, аднаўленні фасада, па пажарнай бяспецы... Усё гэта вельмі дорага каштуе, а грошай у нас няма. Цяпер наша галаўная арганізацыя знаходзіцца ў рэжыме санацыі. Па законе ў нас ёсць магчымасць перадаць будынак інтэрната дзяржаве ў цяперашнім стане. Спадзяюся, што хутка гэты будынак пяройдзе іншаму ўласніку.
Тым часам інспектары МНС цікавяцца ў жанчыны на вахце, якая мае бэйдж «швейцар», пра алгарытм дзеянняў пры пажары. Таццяна Бурцава адказвае ўпэўнена, але не зусім дакладна:
— У надзвычайнай сітуацыі набяру 101, 112, потым апавяшчу кіраўніка нашай арганізацыі, потым — па тэлефонах усіх людзей, што знаходзяцца ў інтэрнаце. Адчыняю запасныя выхады, і ўсе эвакуіруюцца.
Між тым інспектар папраўляе: у надзвычайнай сітуацыі начальства трэба апавяшчаць у самую апошнюю чаргу, а найперш важна клапаціцца пра людзей, якія трапілі ў небяспеку. Да таго ж у інтэрнаце павінна быць добраахвотная пажарная дружына, у якой абавязкі размеркаваны: хто сустракае пажарных, хто дапамагае эвакуіраваць людзей, хто — тушыць пажар...
Зараз тут жывуць 37 чалавек, якія займаюць 26 пакояў. Сямейныя, з дзецьмі — на самых верхніх паверхах. Ніхто з іх не разлічвае на дадатковыя жыццёвыя прыгоды, але ж ратавальнікі маюць рацыю і сумны досвед. Таму патрабуюць ужо сёння зрабіць жыццё людзей бяспечным.
Замест пасляслоўя. У Гомельскім абласным упраўленні МНС паведамілі: у дачыненні да асоб, якія дапусцілі парушэнні ў інтэрнаце, будзе распачаты адміністрацыйны працэс.
Ірына АСТАШКЕВІЧ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».