Вы тут

Калі чакаць грып і як абараніцца ад адру


Сезон вакцынацыі ад грыпу ў разгары, і ўсім, каму прышчэпка паказана, важна не спазніцца — яе пажадана зрабіць да снежня. Тым часам эпідэмія яшчэ адной небяспечнай інфекцыі — адру — у некаторых суседніх краінах працягваецца. Медыкі расказалі, калі сёлета чакаць прыход грыпу, як абараніць сябе ад адру і чаму ад захворвання часам не выратоўваюць прышчэпкі.


З-за сёлетняга цёплага надвор'я мы менш хварэем

Узровень вострых рэспіраторных інфекцый у Беларусі зараз на 16 % ніжэйшы, чым у гэты перыяд летась.

— Зараз у нас спакойная сітуацыя з віруснымі інфекцыямі, што, магчыма, у нейкай ступені звязана з цёплым для гэтай пары надвор'ем, — адзначыла намеснік начальніка аддзела гігіены, эпідэміялогіі і прафілактыкі Міністэрства аховы здароўя Іна Карабан. — Людзі сёлета больш актыўна робяць прышчэпкі ад грыпу. Ужо вакцыянаваны 21 % насельніцтва.

Як нагадала Іна Карабан, прышчэпку трэба рабіць у цалкам здаровым стане:

— Калі прышчапіцца нават з лёгкім насмаркам, імунітэт можа не выпрацавацца і не абароніць, калі арганізм сустрэнецца з вірусам, — растлумачыла спецыяліст.

Актывізацыі віруса грыпу ў гэтым сезоне медыкі традыцыйна чакаюць у канцы студзеня — пачатку лютага. Але не выключаюць, што яна можа ссунуцца на люты — сакавік.

— Улічваючы даныя па Паўднёвым паўшар'і, дзе асаблівых усплёскаў віруса грыпу не было, не чакаецца вялікага росту захваральнасці і ў Паўночным паўшар'і, — адзначыла Іна Карабан. — Новай пандэміі ў гэтым сезоне, хутчэй за ўсё, не будзе. З іншага боку, пасля апошняй прайшло дзевяць гадоў. І калі ўлічваць той факт, што новы вірус, які і выклікае пандэмію, з'яўляецца кожныя восем-дзесяць гадоў, то варта праявіць насцярожанасць і не пагарджаць прышчэпкамі.

Загадчык кафедры дзіцячых інфекцыйных хвароб Беларускага дзяржаўнага медыцынскага ўніверсітэта Аксана Раманава падкрэсліла, што і сярод дзяцей пад'ёму захваральнасці на вострыя рэспіраторныя інфекцыі, характэрнага для гэтага перыяду, не назіраецца.

— У дзіцячай інфекцыйнай бальніцы Мінска, дзе я практыкую, росту вірусных інфекцый няма. Няма і хворых на адзёр, — паведаміла Аксана Раманава.

Адзёр не адступае

З лютага гэтага года, калі пачалі рэгістравацца першыя выпадкі адру, у Беларусі на яго захварэлі 241 чалавек ва ўсіх абласцях краіны, у тым ліку два чалавекі хварэюць зараз. Усе выпадкі заражэння — або завозныя, або кантактныя з тымі людзьмі, якія вярнуліся з-за мяжы. Хваробу прывозяць з Украіны, краін Еўропы і Егіпта.

— У суседніх краінах сёлета істотны ўздым захваральнасці. У бягучым годзе ў Еўропе зарэгістравана ўжо больш за 60 тысяч выпадкаў. Ад ускладненняў адру памерла 37 чалавек, у тым ліку 13 ва Украіне. Большасць выпадкаў была ў такіх краінах, як Сербія, Грэцыя, Італія, Францыя, Румынія, Украіна, Вялікабрытанія, Расія. Адзёр не абышоў і нашу краіну. Але выпадкі рэгістраваліся адзінкавыя, быў наладжаны пільны кантроль за ачагамі захворвання, вакцыянаваліся тыя, у каго адсутнічалі ці было недастаткова прышчэпак, — расказала Іна Карабан.

Сярод тых, хто захварэў на адзёр, 74 % не мелі прышчэпак. А вось у 26 % звесткі аб іх у амбулаторных картах былі.

— Імунная сістэма ў кожнага індывідуальная, і складана спрагназаваць, як яна адрэагуе на прышчэпку, выпрацуе ці не выпрацуе антыцелы. Да таго ж з часам імунітэт можа аслабляцца, калі прышчэпка рабілася даўно. У асноўным захворванне распаўсюджваецца сярод тых людзей, якія або ўвогуле не маюць, або маюць толькі адну прышчэпку, — растлумачыла Іна Карабан. — У выпадку з адром, калі менш за 70 % насельніцтва мае прышчэпкі, сітуацыя становіцца крытычнай.

У Польшчу не пусцяць без прышчэпак?

У суседняй Польшчы міністэрства аховы здароўя прапанавала не пускаць у краіну тых, хто не мае прышчэпак ад адру. Пакуль гэта толькі прапанова, і якое рашэнне будзе прынята, невядома, але навіна прымусіла пахвалявацца тых, хто часта падарожнічае да суседзяў. Разам з тым Іна Карабан адзначыла, што адзёр, згодна з міжнароднымі патрабаваннямі і медыка-санітарнымі правіламі, не адносіцца да настолькі небяспечных інфекцый, каб уводзіць абмежаванні на ўезд. Але кожная краіна мае права прымаць тыя меры, якія лічыць неабходнымі, каб абараніць сваіх грамадзян.

— Для нашых грамадзян гэта будзе дадатковым стымулам паклапаціцца пра сваё здароўе і зрабіць прышчэпку, — адзначыла спецыяліст.

Алена КРАВЕЦ

Загаловак у газеце: Восень — час інфекцый?

Выбар рэдакцыі

Грамадства

Як выхаваць даследчыка за школьнай партай?

Як выхаваць даследчыка за школьнай партай?

Чаму ўсе краіны, якія развіваюць інавацыйную эканоміку, робяць сёння стаўку на STЕM? 

Палітыка

Аляксандр Лукашэнка сустрэўся з прадстаўнікамі СМІ Расіі

Аляксандр Лукашэнка сустрэўся з прадстаўнікамі СМІ Расіі

Некалькі рэчаў сёлета адбываюцца ўпершыню.

Грамадства

Ці набудуць у гаспадароў старыя хаты?

Ці набудуць у гаспадароў старыя хаты?

Адэльскі сельскі савет, што ў Гродзенскім раёне, можна назваць брамай у Еўрасаюз.