Цікавая выстаўка адкрылася ў Магілёве — усё, хто на яе завітае, змогуць пабачыць рэдкія кадры горада 1918 года. Рарытэтныя здымкі прадставіў калекцыянер Алег Лісоўскі, які зараз жыве ў Германіі і на працягу многіх гадоў купляў фатаграфіі на інтэрнэт-аўкцыёнах. Яго калекцыі ўжо неаднаразова выстаўляліся ў Магілёве і заўсёды карысталіся вялікай цікавасцю ў магіляўчан. Летась, напрыклад, экспанаваліся ўнікальныя здымкі Магілёва 1941—1944 гадоў, зробленыя нямецкімі салдатамі падчас акупацыі горада.
— Гэтым разам мы маем магчымасць убачыць горад такім, якім ён быў у перыяд з вясны да восені 1918 года, — адзначыў падчас адкрыцця выстаўкі дырэктар музея гісторыі Магілёва Аляксей Бацюкоў. — Гэтыя кадры зроблены невядомым фатографам падчас акупацыі горада войскамі кайзераўскай Германіі.
Акрамя здымкаў, на выстаўцы можна ўбачыць архіўныя дакументы таго перыяду, прадметы побыту і інтэр'ера. Выстаўка «Невядомы Магілёў — 2018. На разломе» будзе працаваць у горадзе да 30 лістапада.
Нэлі ЗІГУЛЯ
Мерапрыемства праводзіцца на добраахвотнай аснове.
Не выявіць ні секунды абыякавасці.
